ប្រព័ន្ធផ្សព្វផ្សាយព័ត៌មានហុងកុង ឲ្យដឹងថា នាវាផ្ទុកយន្តហោះ Roosevelt របស់កងទ័ពជើងទឹកអាមេរិក កំពុងឆ្ពោះទៅកាន់សមុទ្រចិនខាងត្បូង ខណៈពេលដែលនាវាផ្ទុកយន្តហោះ LIAONING របស់ចិនក៏កំពុងមានវត្តមាននៅទីនោះ ។
ក្រុមនាវាប្រយុទ្ធ និងនាវាផ្ទុកយន្តហោះ Theodore Roosevelt របស់កងទ័ពជើងទឹកអាមេរិក ក្រុមប្រយុទ្ធនៃនាវាផ្ទុកយន្តហោះលេខ៩ នៃយោធាជើងទឹកអាមេរិក នាំមុខដោយនាវាផ្ទុកយន្តហោះ Theodore Roosevelt បានបញ្ចប់ដំណើរទស្សនកិច្ចនៅសិង្ហបុរីកាលពីថ្ងៃ ៣ ខែមេសា ហើយកំពុងឆ្ពោះទៅកាន់សមុទ្រចិនខាងត្បូង នេះបើតាមកាសែត Sing Tao Daily ។
មុននោះកាសែត Oriental Daily News ក៏បានឲ្យដឹងថា ក្រុមនាវាយន្តហោះប្រយុទ្ធ Roosevelt និងប្រញាប់ចាប់ផ្តើមការធ្វើសមយុទ្ធនៅសមុទ្រចិនខាងត្បូង។
ទង្វើរបស់កងទ័ពអាមេរិកប្រព្រឹត្តទៅក្នុងស្ថានភាពដែលកងយោធាជើងទឹកចិន ត្រូវបានគិតថា កំពុងចាត់ឲ្យនាវាផ្ទុកយន្តហោះ LIAONING មកកាន់សមុទ្រចិនខាងត្បូងដែរ ដើម្បីចូលរួមសមយុទ្ធអូសបន្លាយពីថ្ងៃទី ៥ ដល់ថ្ងៃទី ១១ ខែមេសា ។
រូបភាពផ្កាយរណបថតដោយ Planet Labs នៅថ្ងៃទី ២៦ ខែមីនា បានបង្ហាញឲ្យឃើញនាវាផ្ទុកយន្តហោះ LIAONING ព្រមទាំងនាវាប្រយុទ្ធប្រមាណ ៤០គ្រឿង កំពុងបង្ហាញវត្តមាននៅឯតំបន់ក្រៅឆ្នេរសមុទ្រនៃកោះហៃណាម ដែលហាក់ដូចជាសំដៅបង្អួតកងកម្លាំងមុនពេលធ្វើសមយុទ្ធ។
សកម្មភាពខាងលើក៏ហាក់ដូចជាវិធីមួយរបស់ចិន សម្តែងប្រតិកម្មចំពោះការដែលយោធាអាមេរិក មុននោះបានចាត់ឲ្យនាវាពិឃាត USS Mustin សម្តែងពីសកម្មភាពបញ្ជាក់អំពីសេរីភាពនាវាចរណ៍ (FONOP) កាលពីថ្ងៃទី ២៣ ខែមីនា ៕ សូយន
