បាត់ដំបង ៖ មានករណីហិង្សាដោយចេតនាមួយ បង្កឡើងដោយជនសង្ស័យដែលទើបចេញពីពន្ធនាគារ បានយកកាំបិតប៉័ងតោកាប់ទៅលើជនបុរសម្នាក់ទៀតរយះក្បាល។
សមត្ថកិច្ចនគរបាលមូលដ្ឋាន បានបញ្ជាក់ថា ក្រោយពីទទួលបាននូវបទបញ្ជារដ៏ខ្ពង់ខ្ពស់ពី លោកឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង ដឹកនាំបញ្ជាដោយលោក ឧត្តមសេនីយ៍ត្រី ជេត វណ្ណនី ស្នងការរងទទួលផែនយុត្តិធម៌ និងមានការសម្របសម្រួល ពីលោក នួន សាន ព្រះរាជ្ញាអមសាលាដំបូងខេត្តបាតដំបង បានធ្វើការចាប់ខ្លួនជនដៃដល់ម្នាក់។
ករណីនេះកើតឡើងនៅថ្ងៃទី៥ខែមេសាឆ្នាំ២០១៨ វេលាម៉ោង៣រសៀល នៅចំណុចផ្សារលក់ត្រី ស្ថិតនៅភូមិមោង ឃុំមោង ស្រុកមោងឫស្សី ខេត្តបាត់ដំបង មានករណី ហឹង្សាដោយចេតនា មួយកើតឡើងបង្កដោយជនសង្ស័យម្នាក់ឈ្មោះ ឈួន រួញ ហៅឡុញ ភេទប្រុស អាយុ ២៩ឆ្នាំ រស់នៅចំណុចកើតហេតុ បានប្រើកាំបិតប៉័ងតោ កាប់ទៅលើជនរងគ្រោះម្នាក់ ឈ្មោះ ស៊ឹម គក់ ភេទប្រុស អាយុ៥៥ឆ្នាំ រស់នៅភូមិតាតុក១ ឃុំមោង ស្រុកមោងឫស្សី ខេត្តបាត់ដំបង នៅពេលទៅជួយលក់បបរប្រពន្ធ ត្រូវចំ៣កន្លែង គឺដាច់ចង្អុលដៃស្តាំ ១ របួសថ្ពាល់ស្តាំ ១កន្លែង ៣សង់ទីម៉ែត្រ របួសសៀតផ្កាខាងស្តាំ ១កន្លែង ១០សង់ទីម៉ែត្រ។
ជនសង្ស័យឃាត់ខ្លួនបាន ។ ជនល្មើសបែកថ្នាំ ទើបចេញពីពន្ធនាគារ កាលពីថ្ងៃទី២ខែមីនា ឆ្នាំ២០១៨ ឃាត់ខ្លួនតាមបញ្ជាលោក នួន សាន ព្រះរាជអាជ្ញាសាលាដំបូងខេត្តបាត់ដំបង កាលពីវេលាម៉ោង៥ល្ងាច ថ្ងៃទី៥ខែមេសាឆ្នាំ២០១៨ រីឯជនរងគ្រោះ បញ្ជូនទៅមន្ទីរពេទ្យខេត្ត។
ករណីនេះ ជនសង្ស័យត្រូវបានសមត្ថកិច្ចបាននិងកំពុងកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការបន្តតាមនីតិវិធីច្បាប់៕ ដោយ ៖ បញ្ញាស័ក្តិ
