កំពត ៖ ផែននគរបាលព្រហ្មទណ្ឌខេត្តកំពត បានឲ្យដឹងថា ព្រឹកថ្ងៃទី ៦ខែមេសាឆ្នាំ២០១៨ មាននារីគរ ឈ្មោះឈានឈាន អាយុ ២៥ ឆ្នាំ ( នៅលីវ) ជាជនជាតិចិន និង ជាគ្រូបង្រៀននៅសាលាចិន (ឃៀតឃួន ) ស្ថិតនៅភូមិកំពង់ត្រាចទី១ ឃុំកំពង់ត្រាចខ/ក ស្រុកកំពង់ត្រាច ហើយ សព្វថ្ងៃ ស្នាក់បណ្តោះអាសន្ននៅសាលាចិន បានប្តឹងថា រូបគាត់ត្រូវបានសិស្សចាប់រំលោភ ពេលនាំដើរលេង កាលពីម៉ោងជាង៥ល្ងាច ថ្ងៃទី ៥ខែមេសាឆ្នាំ២០១៨ នៅចំណុចជើងភ្នំកំពង់ត្រាច ស្ថីតនៅភូមិដំណាក់កន្ទួត ឃុំដំណាក់កន្ទួតខាងត្បូង ស្រុកកំពង់ត្រាច ។
នៅថ្ងៃកើតហេតុខាងលើ ម៉ោងប្រហែល ៥ ជាងពេលល្ងាច ជនសង្ស័យបានបបួលរូបគាត់ទៅដើរលេង រួចរូបគាត់និងជនសង្ស័យបានជិះម៉ូតូរបស់ជនសង្ស័យតែពីរនាក់ ទៅដល់កែប ហើយជិះម៉ូតូ មកដល់កន្លែងកើតហេតុខាងលើ បានចាប់រំលោភរូបគាត់បានសម្រេច រួចជនសង្ស័យក៏បានដឹកគាត់ មកដល់សាលាចិនវិញ រួចជិះម៉ូតូចេញទៅបាត់។
តាមរយៈនេះ ថ្ងៃទី៦ខែមេសាឆ្នាំ២០១៨វេលា ម៉ោង១១ព្រឹក អធិការស្រុកកំពង់ត្រាច បានតាមរក និងឃាត់ខ្លួនឈ្មោះ ទឹម លីធាន ភេទប្រុស អាយុ ១៩ ឆ្នាំ ជាសិស្សថ្នាក់ទី៥ E រៀននៅសាលាចិនខាងលើ មានទីលំនៅភូមិអូររលួស ឃុំដំណាក់កន្ទួតខាងត្បូងស្រុកកំពង់ត្រាច។ ជននេះបានសារភាពថា បានប្រព្រឹត្តដូចការចោទប្រកាន់ មែន។ សមត្ថកិច្ចកំពុងកសាងសំណុំរឿងបញ្ជូនទៅតុលាការចាត់ការតាមច្បាប់៕ ដោយ៖បញ្ញាស័ក្តិ
