គ្រាន់តែកាត់ថ្លៃត្រី កម្រតម្លៃ ១.៥០០លានដុងភ្លាម ឈ្មួញកណ្តាលហៅឲ្យរាប់លុយភ្លែត ហេតុការណ៍នេះកើតឡើងប្រមាណជាង ១ឆ្នាំមុន ខណៈពេលដែលលោក Bui Dinh Thang បានចេញទៅនេសាទជំនួសឪពុកនៅច្រកទ្វារសមុទ្រ ក្នុងខេត្តនោះ (Thai Thuy, Thai Binh) នៅវេលាថ្ងៃត្រង់ លោក Bui Dinh Thang នេសាទបាន “ត្រីមាស” ១ក្បាល (ឈ្មោះវិទ្យាសាស្ត្រគឺ Otolithoides biauritus) ស្ថិតក្នុងអម្បូរត្រី (Sciaenidae) ។ ពួកត្រីទាំងនេះ ពេលរដូវបង្កាត់ពូជវាច្រើនសំងំរស់នៅតាមតំបន់ទឹកភ្លាវ នាច្រកសមុទ្រ។
លោកក៏បញ្ជាឲ្យទូកនេសាទរបស់ឪពុកខ្លួនវិលត្រឡប់មកកាន់កំពង់ផែនេសាទវិញ ហើយក៏ទូរស័ព្ទប្រាប់អ្នកផ្ទះ ។ ព្រោះតាមទម្លាប់របស់ប្រជានេសាទនៅស្រុកនោះរៀងរាល់ពេលចាប់បានត្រីចម្លែកឬត្រីមានតម្លៃថ្លៃ ចាំបាច់ត្រូវរៀបចំការសែនឲ្យបានត្រឹមត្រូវ ។ នាវានេសាទបានមកដល់កំពង់ផែវេលាម៉ោង ៩ ហើយត្រូវរង់ចាំការសែនព្រេនចប់រហូតដល់ម៉ោង ១១យប់ ទើបក្រុមគ្រួសារទូរស័ព្ទឲ្យនាវាចូលចំណត។
យុវជន ៤នាក់ បាននាំគ្នាសែងត្រី “មាស” ដែលមានបណ្តោយ ២,១ម៉ែត្រ ទទឹងជាងកន្លះម៉ែត្រ និងទម្ងន់ ៧០គីឡូក្រាម ឡើងមកលើគោក។
ភ្លាមៗនោះរថយន្តទំនើប១គ្រឿង ក៏បានចូលអែបកំពង់ផែ រួចក៏បើកពីក្រោយរថយន្តដឹកត្រីមកកាន់ផ្ទះលោក Bui Dinh Thang ។
លោក Bui Dinh Thang មនុស្សដែលមានសំណាង ។
ស្មានពុំដល់ថា ឈ្មួញកណ្តាលដែលជិះរថយន្តទំនើប សួរតែមួយម៉ាត់ថា តើត្រីនេះលក់តម្លៃប៉ុន្មាន? ។ ប្តីប្រពន្ធលោក Thang និងឪពុកម្តាយបង្កើត បានពិភាក្សាគ្នាគិតថា កាត់ថ្លៃ ១.៥០០លានដុង ហើយបើកាត់ថ្លៃយ៉ាងហោចត្រឹម ១ពាន់លានដុង (ប្រមាណ ២៥.០០០ដុល្លារ) ក៏លក់ទៅ ។ លោក Thang ក៏ចេញទៅប្រាប់ឈ្មួញអំពីតម្លៃខាងលើ ស្មានពុំដល់ថា ឈ្មួញម្នាក់នេះពោល ៖ ១.៥០០លានដុង ? ណ្ហើយចុះ! ហៅប្រពន្ធលោកមករាប់លុយទៅ ។
ពិតណាស់ក្រុមគ្រួសារម្ចាស់ត្រីពិតជាអរពេលលក់បានតម្លៃនេះ ប៉ុន្តែគេពុំដឹងថា ឈ្មួញនោះលក់បានតម្លៃប៉ុន្មាននោះទេ ។
តាមប្រភពព័ត៌មានដោយឡែកនោះ មច្ឆាដែលគេហៅថា ត្រីមាសមានឈ្មោះវិទ្យាសាស្ត្រដូចពោលខាងលើ មានតម្លៃថ្លៃណាស់ ដោយឡែកតែក្រពះនៅស្រស់របស់ត្រីនេះ ក្នុង១គីឡូក្រាម មានតម្លៃចន្លោះពី 45.000 – 55.000 USD/kg ហើយសាច់របស់វា មានតម្លៃចន្លោះពី 750USD-1000USD/kg ។
បច្ចុប្បន្នត្រីនេះត្រូវបានគេរុករកនិងនេសាទស្ទើដាច់ពូជទៅហើយ ។ តាមអ្នកវិទ្យាសាស្ត្រគេឃើញត្រីនេះ មាននៅប្រទេសចិន វៀតណាម ឥណ្ឌូណេស៊ី និងម៉ាឡេស៊ី៕ ចន្ទ្រា
ច្រកទ្វារសមុទ្រ Ba Lat កន្លែងលោក Thang នេសាទបានត្រីខាងលើ ។