ភ្នំពេញ ៖ ករណីឧប្បត្តិហេតុគ្រោះថ្នាក់ចរាចរណ៍រវាងរថភ្លើងបានប៉ះទង្គិចជាមួយនឹងរថយន្តសាំងយ៉ុង បណ្ដាលឲ្យស្លា.ប់តៃកុងរថយន្ត នៅវាលរេញកាលពីម្សិលមិញនោះ ពេលនេះត្រូវបានដោះស្រាយបញ្ចប់រួចរាល់ជាស្ថាពរហេីយ នៅព្រឹកថ្ងៃទី១៤ ខែតុលា ឆ្នាំ២០២១នេះ ។
សេចក្ដីប្រកាសព័ត៌មាន របស់ក្រសួងសាធារណការ និងដឹកជញ្ជូន មានកិត្តិយស សូមជម្រាបជូនដល់សាធារណជនឱ្យបានជ្រាបថា ករណីឧប្បត្តិហេតុគ្រោះថ្នាក់ចរាចរណ៍រវាងរថភ្លើងបានប៉ះទង្គិចជាមួយនឹងរថយន្តសាំងយ៉ុងនៅវាលរេញ ស្ថិតក្នុងស្រុកព្រៃនប់ ខេត្តព្រះសីហនុ កាលពីថ្ងៃទី១៣ ខែតុលា ឆ្នាំ២០២១ម្សិលមិញ ពេលនេះត្រូវបានដោះស្រាយ បញ្ចប់រួចរាល់ជាស្ថាពរហើយ នៅវេលាព្រឹកថ្ងៃទី១៤ ខែតុលា ឆ្នាំ២០២១នេះ។
សូមបញ្ជាក់ជូនថា សមត្ថកិច្ចមិនបានធ្វើការឃាត់ខ្លួនអ្នកបើកបររថភ្លើងនោះឡើយ ដោយគ្រាន់តែធ្វើការ សាកសួរនាំព័ត៌មានមួយចំនួនតែប៉ុណ្ណោះ ហើយបច្ចុប្បន្ននេះ អ្នកបើកបររថភ្លើងក៏ត្រូវបានអនុញ្ញាតឱ្យវិលត្រលប់ ទៅកាន់គេហដ្ឋានវិញផងដែរ។
តៃកុងរថភ្លើង ដែលបានបុកប៉ះគ្នាជាមួយ រថយន្តនៅប្រជុំជនផ្សារវាលរេញ ក្នុងឃុំសំរុង ស្រុកព្រៃនប់ខេត្តព្រះសីហនុ បណ្តាលឲ្យអ្នកបើកបររថយន្តស្លាប់ពេលបញ្ជូនទៅមន្ទីរពេទ្យ កាលពីព្រឹកថ្ងៃទី១៣ ខែតុលា ឆ្នាំ២០២១ ត្រូវបានសមត្ថកិច្ច ដោយមានការសម្របសម្រួលផ្លូវច្បាប់ពីព្រះរាជអាជ្ញារងអមសាលាដំបូងខេត្តព្រះសីហនុ បានឃាត់ខ្លួនជាបណ្តោះអាសន្ននាំមកសាកសួរតាមនីតិវិធីនៅរសៀលថ្ងៃដដែលនោះផងដែរ។
បើតាមសមត្ថកិច្ចប្រាប់ថា ក្រោយបុកប៉ះរថយន្តឆ្លងផ្លូវជាតិលេខ៤រួច រថភ្លើងបានបន្តដំណើរទៅដល់ស្ថានីយ៍វាលរេញ ទើបអាជ្ញាធរនិងសមត្ថកិច្ចឃាត់បាននៅស្ថានីយ៍រណបនោះ ។
ប្រភពពីសមត្ថកិច្ចថា ការឈានដល់ឃាត់ខ្លួនអ្នកបើកបររថភ្លើងជាបណ្តោះអាសន្ន ដើម្បីស្រាវជ្រាវបន្ត រកដើមហេតុ រវាងអ្នកបើកបររថភ្លើងនិងអ្នកបើក បិទបារ៉ាសកន្លែងផ្លូវរថភ្លើងឆ្លងកាត់ ដោយសារថា ពេលរថភ្លើងបើកឆ្លងផ្លូវជាតិលេខ៤ មិនមានបិទបារ៉ាសទេ ។
ហេតុការណ៍រថភ្លើងបុករថយន្ត កើតឡើង នៅវេលាម៉ោង០៦ ព្រឹកថ្ងៃទី១៣ ខែតុលា ឆ្នាំ២០២១ នៅចំណុចផ្លូវរថភ្លើងកាត់ផ្លូវជាតិលេខ៤ ជិតប្រជុំជនផ្សារវាលរេញ ក្នុងភូមិសំរុងក្រោម ឃុំសំរុង ស្រុកព្រៃនប់ ខេត្តព្រះសីហនុ បណ្តាលអោយ អ្នកបើកបររថយន្តឈ្មោះ ឈិន សុខជា ភេទប្រុស អាយុ៣១ឆ្នាំ មុខរបរ បើកបររថយន្តដឹកកម្មករ ទីលំនៅភូមិទួលទទឹង១ ឃុំទួលទទឹង ស្រុកព្រៃនប់ ខេត្តព្រះសីហនុ រងរបួសធ្ងន់ ក្រោយមកបានស្លា.ប់៕ រក្សាសិទ្ធិដោយ ៖ កូលាប
