ក្រោយមានអ្នកសួរនាំចង់ផ្ទុះឆាត ព្រោះល្បីឮថាត្រូវបានឡើងតំណែងមានមុខងារជាឯកឧត្តម នៅពេលនេះ សម៉ីខ្លួនផ្តាល់តារាចម្រៀងលោក ហេង ពិទូ បានចេញមកបញ្ជាក់ច្បាស់ៗហើយ។
តាមពិតទៅ លោក ហេង ពិទូ ពិតជាមានក្តីរំភើប និងក៏ដូចអស់សំណើចហួសចិត្តនិងខ្លួនឯងជាខ្លាំង នៅពេលលោកបានដឹងថា មានឈ្មោះ ហេង ពិទូ ដូចរូបលោកដែរ ទើបត្រូវបានទទួលតំណែងក្លាយជាឯកឧត្តម កាលពីពេលថ្មីៗនេះ ដែលធ្វើឲ្យបងប្អូនមហាជន និងក៏ដូចមិត្តភក្តិ មានការយល់ច្រឡំថារូបលោក ហើយពួកគេបានឆាតសួរនាំព្រោងព្រាតតែម្តង។
ដោយសារតែឯកឧត្តម ហេងពិទូ នោះមិនមែនជារូបលោក ហេតុនេះ លោកក៏បានចេញមកបញ្ជាក់ទៅកាន់បងប្អូនអ្នកសួរនាំ ឲ្យបានដឹងយ៉ាងដូច្នេះថា៖ «អរគុណ សំរាប់ការជូនពរខ្ញុំ តែខ្ញុំចង់ប្រាប់ថា មិនមែនជាខ្ញុំទេ ឈប់យល់ច្រឡំទៀតទៅ»។
គួរបញ្ជាក់ថា កាលពីពេលថ្មីៗនេះ នៅក្នុងព្រះរាជក្រឹត្យរបស់ព្រះករុណាសម្ដេចព្រះបាទនរោត្តមសីហមុនី បានត្រាស់តែងតាំងឈ្មោះឯកឧត្តម ហេង ពិទូ ឱ្យកាន់តួនាទីជាអនុរដ្ឋលេខាធិការ នៃក្រសួងមហាផ្ទៃ៕ រក្សាសិទ្ធិដោយ៖ លឹម ហុង
