ភ្នំពេញ-ខ្សែភាពយន្តភាគរឿង ”ម្ចាស់បំណុល” ដែល ភិន សុដាលីស និងលោក ភឹម តារាវិបុល សម្ដែងរួមគ្នាជាថ្មី នឹងផ្ដើមចាក់បញ្ចាំងផ្លូវការចាប់ពីថ្ងៃទី ២៤ ខែមេសា ឆ្នាំ២០១៨ នៅក្រោយពិធីបុណ្យចូលឆ្នាំប្រពៃណីជាតិរួច។ ខ្សែភាពយន្តនេះនឹងចាក់ផ្សាយរៀងរាល់ថ្ងៃ ព្រហស្បតិ៍ សុក្រ និង សៅរ៍ វេលាម៉ោង ៧ និង៥០នាទីដល់ម៉ោង ៩យប់។
ទាំងអ្នកនាង ភិន សុដាលីស និងលោក ភឹម តារាវិបុល បានបង្ហាញក្ដីរំពឹងដូចគ្នាចំពោះស្នាដៃថ្មីគឺរឿង”ម្ចាស់បំណុល” ត្រៀមបង្ហាញវត្តមានជាផ្លូវការលើកញ្ចក់ទូរទស្សន៍ PNN នៅក្រោយពិធីចូលឆ្នាំប្រពៃណីជាតិរួច។ ការអះអាងដូច្នេះ បន្ទាប់ពីអ្នកទាំងពីរ ខកខានចាប់ដៃគូជាមួយគ្នាជិត ៥ឆ្នាំមកហើយ បន្ទាប់ពីរឿង “អច្ឆរិយៈស្នេហ៍” រឿង “ឆ្អែតចិត្ត” រឿង “ខ្មោចទឹក”ជាដើម។
អ្នកនាង ភិន សុដាលីស និយាយថា នាងពិតជារឿងរំភើប បន្ទាប់ពីមានឱកាសចាប់ដៃគូជាថ្មីជាមួយតារាប្រុសលោក ភឹម តារាវិបុល។ តារាស្រីរូបនេះ និយាយថា “ម្ចាស់បំណុល” គឺពិតជាស្នាដៃថ្មីមួយប្លែក សម្រាប់ទស្សនិកជន។អ្នកនាងបញ្ជាក់ថា ៖ “បើតាមខ្ញុំមើលសាច់រឿងនេះ គឺមានលក្ខណៈល្អច្រើនណាស់ អាចនឹងធ្វើឱ្យទស្សនិកជនពេញចិត្ត។ ខ្ញុំ និងបង បុល ខានសម្ដែងយូរហើយក្ដី តែខ្ញុំគិតថា គ្មានបញ្ហាអ្វីទេ ព្រោះយើងមានបទពិសោធន៍នេះរួមគ្នាច្រើនហើយ ទោះវាយូរបន្តិចក៏ដោយ”។
អ្នកនាង ភិន សុដាលីស បន្តថា ក្រៅតែពីការរំពឹងទីផ្សារគាំទ្រពីទស្សនិកជនសម្រាប់ការចាប់ដៃគូជាថ្មីនឹងលោក ភឹម តារាវិបុល អ្នកនាងក៏រំពឹងផងដែរថា ស្នាដៃថ្មីនេះនឹងជួយលើកទីផ្សាររបស់ខ្លួនមួយកម្រិតទៀតបន្ទាប់ធ្លាក់ចុះខ្លាំងនាពេលកន្លងទៅ។
ដោយឡែកសម្រាប់លោក ភឹម តារាវិលបុល វិញ្ញលោកនៅតែសរសើរដៃគូចាស់របស់ខ្លួនពីការសម្ដែងដោយភាពស៊ីសង្វាក់គ្នា បើទោះជាខកខានសម្ដែងយូរហើយក្ដី។ ប្រការនេះបានធ្វើឱ្យលោកមានក្ដីរពឹងខ្ពស់ថារឿង”ម្ចាស់បំណុល” នឹងទទួលការគាំទ្រពីទស្សនិកជន។
លោកបានលើកឡើងថា ៖ “បើយើងមើលពីគុណភាពរឿងនេះធៀបនឹងរឿងមុនដែលខ្ញុំសម្ដែងជាមួយគាត់គឺខុសគ្នាកាន់តែឆ្ងាយ។ អីចឹងហើយទើបខ្ញុំគិតថាវានឹងទទួលជោគជ័យ”។ តារាសម្ដែងរូបនេះបានបន្តថា បើទោះជាខានចាប់ដៃរួមគ្នាយូរបន្តិចហើយក្ដី ក៏ប៉ុន្តែសម្រាប់ការសម្ដែងវិញគឺគ្មានអ្វីចោទជាបញ្ហាទេ។ យ៉ាងណាលោកមានតែសប្បាយរីករាយទៅវិញនៅពេលការសម្ដែងជាថ្មីគឺកាន់តែមានភាពប្រសើរឡើង៕ ដោយ-គីមស្រីរ័ត្ន