ក្នុងអត្ថបទត្រៀមថ្លែងក្នុងសវនាការនាព្រឹទ្ធសភា និរដ្ឋសភាអាមេរិក ស្ថាបនិកនិងជា CEO, Mark Zuckerberg សារភាពថា លោកបាន “ឧត្តមគតិជ្រុល ហើយបរាជ័យក្នុងការទប់ស្កាត់គ្រឹះនៃប្រព័ន្ធនេះ ត្រូវបានគេឆ្លៀតឱកាសបង្កបញ្ហាបាន” ។
លោក Zuckerberg មានជំនួបជាមួយសភាអាមេរិកមួយចំនួន មុនពេលចូលរួមក្នុងសវនាការផ្លូវការនាសភាទាំងពីររបស់អាមេរិក។
ក្នុងអត្ថបទត្រៀមទុក Zuckerberg សរសេរថា “យើងខ្ញុំពុំបានគ្រប់គ្រងទាំងស្រុងដែលជាភារកិច្ចរបស់ខ្លួន ។ នេះគឺជាកំហុសឆ្គងធំមួយ ។ វាជាកំហុសរបស់ខ្ញុំ ហើយខ្ញុំសុំទោសចំពោះបញ្ហានេះ” ។ តាមនោះ Zuckerberg ហៅ facebook ថា គឺជាក្រុមហ៊ុនធ្វើដើម្បីឧត្តមគតិនិងដើរតាមលទ្ធិសុទិដ្ឋិនិយម ។ យើងខ្ញុំប្រមូលផ្តុំទៅលើរឿងរ៉ាវល្អៗដែលនាំមកតាមរយៈការតភ្ជាប់ទំនាក់ទំនងរវាងមនុស្សគ្រប់រូប ។
លោកក៏បានសារភាពថា ៖ ពិតច្បាស់ណាស់ថា យើងខ្ញុំពុំបានមានសកម្មភាពគ្រប់គ្រាន់ដើម្បីទប់ស្កាត់កុំឲ្យឧបករណ៍មួយនេះ រងការជ្រៀតជ្រែកបង្កអន្តររាយតាមរយៈព័ត៌មានក្លែងក្លាយ អន្តរាគមន៍របស់បរទេសមកលើការបោះឆ្នោត ពាក្យពេចន៍បង្កប់នូវគំនុំគុំកួន សិទ្ធិឯកជនលើទិន្នន័យរបស់ខ្លួន ។ល។
Mark Zuckerberg បន្ទាប់ពីជំនួបជាមួយសមាជិកព្រឹទ្ធសភា Bill Nelson នៃគណបក្សប្រជាធិបតេយ្យកាលពីថ្ងៃ ៩ ខែមេសា នា Washington DC។
ក្នុងអត្ថបទត្រៀមទុកមុនដដែលនេះ Zuckerberg សរសេរថា ខ្ញុំសូមបញ្ជាក់ច្បាស់អំពីអាទិភាពរបស់យើងខ្ញុំគឺការការពារសហគមន៍វាគឺជាគោលដៅសំខាន់ជាងការបង្កើនប្រាក់ចំណេញអតិប្បរមាទៅទៀត ។ តាមរយៈនោះ CEO facebook ឲ្យដឹងថា ក្រុមហ៊ុននេះនឹងស៊ើបអង្កេតបណ្តាប្រតិបត្តិការទាំងស្រុង ហើយនឹងបញ្ចប់ប្រសិនបើរកឃើញថា មានការប្រើប្រាស់ទិន្នន័យមិនសមហេតុផល ។
គួររំលឹកថា ហ្វេសបុកកំពុងរងសម្ពាធជាច្រើន ពីសំណាក់អ្នកច្បាប់អង់គ្លេស និងអាមេរិក ទាក់ទិនដល់សកម្មភាពអាជីវកម្មទិន្នន័យរបស់ Cambridge Analytica ។ ទិន្នន័យអ្នកប្រើហ្វេសបុកចំនួន ៨៧លាននាក់ បានត្រូវ Cambridge ចូលមកធ្វើអាជីវកម្មខុសច្បាប់ក្នុងអំឡុងពេលបោះឆ្នោតប្រធានាធិបតីអាមេរិកនៅឆ្នាំ ២០១៦ វាក៏ត្រូវបានប្រើប្រាស់ដើម្បីនិម្មិតជាការផ្សាយពាណិជ្ជកម្មនយោបាយនៅលើ facebook ផងដែរ ៕ សូយន
