នៅថ្ងៃទី ០៩ មេសា ប្រធានាធិបតីអាមេរិកដូណាល់ ត្រាំ ឲ្យដឹងថា លោកនឹងជួបមេដឹកនាំកូរ៉េខាងជើង គីម ជុងអ៊ុន ក្នុងខែឧសភា ឬដើមខែមិថុនាខាងមុខ។
ប្រធានាធិបតីអាមេរិកដូណាល់ ត្រាំ ឲ្យដឹងថា លោកនឹងជួបមេដឹកនាំកូរ៉េខាងជើង គីម ជុងអ៊ុន ក្នុងខែឧសភា ឬដើមខែមិថុនាខាងមុខ។
ទង្វើនេះប្រព្រឹត្តទៅក្រោយពេលមានព័ត៌មានថា ក្រុងព្យុងយ៉ាងត្រៀមខ្លួនជាស្រេចដើម្បីពិភាក្សាអំពីការរំសាយនុយក្លេអ៊ែរអាមេរិក-កូរ៉េខាងជើង។
ថ្លែងទៅកាន់អ្នកសារព័ត៌មានមុនពេលបើកអង្គប្រជុំរដ្ឋាភិបាល លោកត្រាំ លើកឡើងច្បាស់ថា សន្និសីទកំពូលអាមេរិក-កូរ៉េខាងជើង នឹងត្រូវបានរៀបចំក្នុងខែឧសភា ឬដើមខែមិថុនា។
ក្រៅពីនោះប្រធានាធិបតីត្រាំ ក៏បានអះអាងថា ក្រុងវ៉ាស៊ីនតោន នឹងព្យុងយ៉ាងអាចកសាងឡើងនូវកិច្ចព្រមព្រៀងមួយអំពីការរំសាយនុយក្លេអ៊ែរនាជំនួបខាងមុខនេះ។
តាមអ្នកនាំពាក្យមិនបញ្ចេញឈ្មោះម្នាក់របស់ក្រុមប្រឹក្សាសន្តិសុខជាតិអាមេរិក ឲ្យដឹងថា មន្ត្រីជាន់ខ្ពស់របស់ប្រទេសទាំងពីរ ក៏កំពុងធ្វើការជាមួយគ្នាយ៉ាងសម្ងាត់ដើម្បីត្រៀមបម្រុងដល់ព្រឹត្តិការណ៍ប្រវត្តិសាស្ត្រនេះ ។ ប្រភពព័ត៌មានពី CNN កាលពីថ្ងៃ ៧ មេសា ឲ្យដឹងថា អាមេរិក-កូរ៉េខាងជើង កំពុងរៀបចំជំនួបចរចាដោយផ្ទាល់និងសម្ងាត់ជាច្រើន មុនពេលប្រព្រឹត្តទៅជំនួបកំពូលរវាងមេដឹកនាំប្រទេសទាំងពីរ ។ CNN ឲ្យដឹងថា នាយកស្ថាប័នចារកម្ម CIA -អ្នកដែលត្រូវបានផ្តើមសំណើរតែងតាំងជាប្រមុខការទូតអាមេរិកលោក Mike Pompeo រួមជាមួយក្រុមជំនួយការកំពុងធ្វើការជាមួយភាគីកូរ៉េខាងជើង តាមរយៈបណ្តាញចារកម្មដើម្បីត្រៀមបម្រុងការងារទាំងឡាយសម្រាប់ជំនួបកំពូលជាប្រវត្តិសាស្ត្រនោះ។
មកទល់បច្ចុប្បន្នអ្នកជំនាញការជាច្រើននៅបន្តមន្ទិលសង្ស័យថា កូរ៉េខាងជើងពុំប្រាកដ ហើយក៏ប្រហែលមិនអាចលុបចោលកម្មវិធីនុយក្លេអ៊ែររបស់ខ្លួនឡើយ ។ ខ្លះទៀតថា ក្រុងព្យុងយ៉ាងអាចសំណូមពរឲ្យវ៉ាស៊ីនតោន ទទួលយកសំណើរមួយចំនួនជាអាទិ៍ឲ្យអាមេរិកដកកងទ័ពចេញពីកូរ៉េខាងត្បូង ខណៈពេលមួយចំនួនតូចលើកឡើងថា កិច្ចព្រមព្រៀងរំសាយនុយក្លេអ៊ែរគឺបំណងប្តូរយកជំនួយដ៏ធំសម្បើមមួយ។ ទោះយ៉ាងណាភាគច្រើននិយាយថា ជំនួបនេះនឹងពុំមានផលវិជ្ជមានទេ ៕ សូយន