ភ្នំពេញ៖ លោកស៊ូ ស៊ីវុត្ថា និងមន្ត្រីការិយាល័យភូមិបាលខណ្ឌព្រែកព្នៅ រួមជាមួយនឹងមេធាវីការពារក្តី កាលពីថ្ងៃទី៩ ខែមេសា ឆ្នាំ២០១៨នេះ បានចូលខ្លួនទៅបំភ្លឺ នៅតុលាការក្រុងភ្នំពេញ តាមដីកាកោះហៅ របស់តុលាការនៅក្នុងរឿងទំនាស់ដីធ្លីមួយ នៅក្នុងខណ្ឌព្រែកព្នៅ ជាមួយឈ្មោះ នុត រស្មី ដែលជាអ្នកតំណាងឲ្យលោកឧកញ៉ា សុខ ហេង ដែលពោរពេញរឿងអាស្រូវទំនាស់ដីធ្លីក្នុងអាណាចក្រខណ្ឌព្រែកព្នៅ។ ក្រោយបញ្ចប់ការសាកសួរ តុលាការ បានអនុញ្ញាតលោកស៊ូ ស៊ីវុត្ថាវិលត្រឡប់ទៅផ្ទះវិញ ដោយគ្មានចាប់ខ្លួននោះទេ។
នៅចំពោះមុខចៅក្រម ពេជ្រ វិជ្ជា លោក ស៊ូ ស៊ីវុត្ថា អមដោយមេធាវី ការិយាល័យភូមិបាលខណ្ឌព្រែកព្នៅ មេធាវីសាលារាជធានី និងមេធាវីក្រសួងរៀបចំដែនដីនគរូបនីយកម្មនិងសំណង់ បានបំភ្លឺ និងផ្តល់ឯកសារគតិយុត្តិទាំងឡាយ ដែលទាក់ទង និងរបាយការណ៍សសេរទៅកងរាជអាវុធហត្ថ ហើយត្រូវគេចោទប្រកាន់ថា ក្លែងដោយអ្នកជំនាញ ត្រង់ឃ្លាឈ្មោះ នុត រស្មី ថា(បើមានបណ្តឹងសូមឲ្យទៅដោះស្រាយ់នៅសាលាខណ្ឌពួកគេពុំអាចផ្អាកតាមការនែនាំរបស់មន្ត្រីភូមិបាលបានឡើយ ទាល់តែខាងសាលាខណ្ឌមកផ្អាកទើបគេអាចផ្អាកបាន) ពាក្យពេជ្រទាំងនេះ គឺកើតឡើងនៅពេលមន្ត្រីភូមិបាលខណ្ឌព្រែកព្នៅ បានទៅឃាត់ការសាងសង់របង របស់ ឈ្មោះ នុត រស្មី តំណាងឲ្យឧកញ៉ា សុខ ហេង លើកម្មសិទ្ធិអ្នកដទៃ។ លោកឧកញ៉ា សុខ ហេង ធ្លាប់ត្រូវបានសមត្ថកិច្ចចាប់ខ្លួនពាក់ព័ន្ធរឿងទំនាស់ដីធ្លី។ យោងតាម ដីកាសន្និដ្ឋានបញ្ជូនរឿងឱ្យស៊ើបសួរ លេខ៣០៦៤ អយឃ ចុះថ្ងៃទី៤ ខែសីហា ឆ្នាំ២០១៧ របស់លោកស្រី ស៊ឺ វណ្ណនី បានចោទប្រកាន់លោក ឧកញ៉ា សុខ ហេង និងគូកន ពីបទក្លែងបន្លំឯកសារសាធារណៈ និងប្រើប្រាស់ឯកសារសាធារណៈក្លែង ប្រព្រឹត្តនៅរាជធានីភ្នំពេញ កាលពីថ្ងៃទី២០ ខែសីហា ឆ្នាំ២០១៦ យោងតាមមាត្រា៦២៦ មាត្រា៦២៩ និងមាត្រា៦៣០ នៃក្រមព្រហ្មទណ្ឌ ។ ដីកានេះក៏បានស្មើសុំឱ្យចៅក្រមស៊ើបសួរ ឃុំខ្លួនជនត្រូវចោទឈ្មោះ សុខ ហេង ជាបណ្ដោះអាសន្ននៅពន្ធនាគារផងដែរ។
លោក ស៊ូ ស៊ីវុត្ថា និងលោកមេធាវីបានមកបំភ្លឺថ្ងៃទី៩មេសានេះ គឺដើម្បីបង្ហាញពីភាពស្អាតស្អំ របស់មន្ត្រីការិយាល័យភូមិបាលខណ្ឌព្រែកព្នៅ ហើយបានបដិសេធ នូវរាល់ការចោទប្រកាន់ ដែលថា ក្លែងដោយអ្នកជំនាញ និងពុំមានការឃុំខ្លួ្លន។
លោក ស៊ិន វីរៈ ព្រះរាជអាជ្ញារងអយ្យការអមសាលាដំបូងរាជធានីភ្នំពេញ ចោទប្រកាន់លោក ស៊ូ ស៊ីវុត្ថា ពីបទ ក្លែងដោយអ្នកជំនាញ តាមមាត្រា៥៥១ នៃក្រមព្រហ្មទណ្ឌ ដែលប្រឈមមុខនឹងការជាប់ពន្ធនាគារពី២ឆ្នាំ ទៅ៥ឆ្នាំ និងពិន័យជាប្រាក់ពី៤លានរៀល ទៅ១០លានរៀល។
សូមរំលឹកថា កាលពីថ្ងៃទី១៤ ខែកុម្ភៈ ឆ្នាំ២០១៨ លោក យ៉េត ចរិយា ព្រះរាជអាជ្ញាអមសាលាដំបូងរាជធានីភ្នំពេញ បានជូនដំណឹងដល់លោក អង្គវង្ស វឌ្ឍនា រដ្ឋមន្ត្រីក្រសួងយុត្តិធម៌ អំពីការបើកការស៊ើបសួរលើឈ្មោះ ស៊ូ ស៊ីវុត្ថា អាយុ៥០ឆ្នាំ ជាប្រធានភូមិបាល ខណ្ឌព្រែកព្នៅ ដោយយោងសំណុំរឿងព្រហ្មទណ្ឌលេខ ៤៧៣៥ ចុះថ្ងៃទី០១ ខែសីហា ឆ្នាំ២០១៧ របស់អយ្យការអមសាលាដំបូងរាជធានីភ្នំពេញ តាមមាត្រា៥១ថ្មី នៃច្បាប់ស្តីពីវិសោធនកម្មច្បាប់ស្តីពីសហលក្ខន្តិកៈមន្ត្រីរាជការស៊ីវិល។ អយ្យការអមសាលាដំបូងរាជធានីភ្នំពេញ រកឃើញថា លោក ស៊ូ ស៊ីវុត្ថា មានតម្រុយសន្មតថា បានប្រព្រឹត្តបទល្មើសក្លែងដោយអ្នកជំនាញប្រាកដមែន ហេតុដូច្នេះ អយ្យការអមសាលាដំបូងរាជធានីភ្នំពេញ សម្រេចបើកការស៊ើបសួរ។
យោងតាមដីកាសន្និដ្ឋានបញ្ជូនរឿងឲ្យស៊ើបសួរបង្ហាញថា លោក ស៊ូ ស៊ីវុត្ថា ដែលជាអ្នកជំនាញខាងរដ្ឋបាល បានធ្វើសេចក្ដីបញ្ជាក់មួយតាមរយៈ លិខិតលេខ០៧៧របក ចុះថ្ងៃទី២០ ខែកក្កដា ឆ្នាំ២០១៧ ផ្ញើទៅកងរាជអាវុធហត្ថរាជធានីភ្នំពេញ ត្រង់ទំព័រទី២ បន្ទាត់ទី៧ ដែលមានខ្លឹមសារថា ឈ្មោះ នុត រស្មី បានលើកឡើងថា បើមានបណ្តឹងពីបុគ្គលណាមួយ សូមឲ្យទៅដោះស្រាយនៅសាលាខណ្ឌព្រែកព្នៅ ហើយពួកខ្លួនពុំអាចផ្អាកសកម្មភាពបានទេលុះត្រាតែ សាលាខណ្ឌមកផ្អាកទើបខ្លួនផ្អាកសកម្មភាពបាន។
ព្រះរាជអាជ្ញាចាត់ទុកថា ខ្លឹមសារនៃលិខិតបញ្ជាក់នេះ គឺជាការក្លែងទិន្នន័យ នៃរបាយការណ៍ ជាលាយលក្ខណ៍អក្សររបស់ខ្លួន ដែលត្រូវអាជ្ញាធរចាត់ទុកថាជាការពិត ហើយត្រូវកងរាជអាវុធហត្ថជឿជាក់ ហើយបានដាក់បន្ទុកលើឈ្មោះ នុត រស្មី ហើយធ្វើការឃាត់ខ្លួនតែម្ដង នៅក្នុងរឿងទំនាស់ដីធ្លីមួយ នៅក្នុងខណ្ឌព្រែកព្នៅ៕ ដោយ៖បញ្ញាស័ក្តិ
