ភ្នំពេញ ៖ អគ្គស្នងការនគរបាលជាតិ បានធ្វើការអំពាវនាវឲ្យគ្រប់នាយកដ្ឋាន-អង្គភាព និងស្នងការរាជធានី-ខេត្តទាំងអស់ត្រូវពង្រឹងសន្តិសុខ និងអន្តរាគមន៍ជួយដល់ប្រជាពលរដ្ឋឲ្យបានទាន់ពេលវេលានៅក្នុងឱកាសបុណ្យចូលឆ្នាំថ្មីនាពេលខាងមុខនេះ។
លោកនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានថ្លែងក្នុងកិច្ចប្រជុំបូកសរុបសភាពការណ៍ និងលទ្ធផលកិច្ចប្រតិបត្តិការប្រចាំខែមីនា និងទិសដៅអនុវត្តការងារប្រចាំខែមេសា នៅអគ្គស្នងការដ្ឋាននគរបាលជាតិ នៅថ្ងៃទី៩ ខែមេសា ឆ្នាំ២០១៨។ នាយឧត្តមសេនីយ៍ សន្តិបណ្ឌិត នេត សាវឿន ក៏បានអំពាវនាវដល់ប្រជាពលរដ្ឋឲ្យជួយសហការជាមួយកងកម្លាំងសមត្ថកិច្ច ខណៈមានបទល្មើសអ្វីកើតឡើងត្រូវរាយការណ៍ឲ្យបានទាន់ពេលវេលា ដើម្បីឈានដល់ចាត់វិធានការឲ្យបានឆាប់រហ័សចំពោះជនល្មើស រួមទាំងជួយសហការចរាចរណ៍ដើម្បីកុំឲ្យមានការកកស្ទះផងដែរ ។
ថ្លែងប្រាប់អ្នកសារព័ត៌មានក្រោយពីកិច្ចប្រជុំនេះលោកនាយឧត្តមសេនីយ៍ គៀត ច័ន្ទថារិទ្ធ អគ្គស្នងការរងនគរបាលជាតិ បានឲ្យដឹងថា នៅក្នុងកិច្ចប្រជុំនេះ លោកនាយឧត្តមសេនីយ៍ សន្តិបណ្ឌិត នេត សាវឿន បានអំពាវនាវឲ្យគ្រប់នាយដ្ឋាន-អង្គភាព និងស្នងការរាជធានី-ខេត្តទាំងអស់ត្រូវខិតខំធ្វើយ៉ាងណាពង្រឹងនូវសន្តិសុខ សុវត្ថិភាពជូនដល់ភ្ញៀវជាតិ និងអន្តរជាតិឲ្យបានទាន់ពេលវេលានៅបុណ្យចូលឆ្នាំខាងមុខនេះទាំងសន្តិសុខសង្គម និងចរាចរណ៍ ។
សូមបញ្ជាក់ថា សភាពការណ៍បទល្មើស និងកិច្ចប្រតិបត្តិការបទល្មើសព្រហ្មទណ្ឌក្នុងខែមីនាកន្លងទៅ បទល្មើសជារួមថយចុះ ២៧លើក ស្មើ១១ភាគរយ (២១១/២៣៨លើក) ប៉ុន្តែពិនិត្យឃើញថា បទល្មើសឧក្រិដ្ឋ កើន ៧លើក ស្មើ ១៦ភាគរយ (៥១/៤៤លើក) បទល្មើសមជ្ឈឹមថយ ៣៤លើក ស្មើ ១៨ភាគរយ (១៦០/១៩៤លើក) បណ្តាលឲ្យមនុស្សស្លាប់ចំនួន ១៦នាក់ របួស៨៧នាក់ រងគ្រោះ ២០នាក់ បាត់ម៉ូតូ ២៥គ្រឿង រថយន្ត៥គ្រឿង និងសម្ភារៈមាស-ប្រាក់មួយចំនួន ៕ ដោយ ៖ បញ្ញាស័ក្តិ