មនុស្សយ៉ាងហោចណាស់ចំនួន ៣០នាក់ ដែលភាគច្រើនជាក្មេង បានស្លាប់បាត់បង់ជីវិត បន្ទាប់ពីរថយន្តក្រុងមួយគ្រឿងរបស់ពួកគេ បានបើករអិលធ្លាក់ជ្រោះ ក្នុងរដ្ឋ Himachal Pradesh ប្រទេសឥណ្ឌា។ នេះបើតាមការចេញផ្សាយរបស់ BBC។
អ្នកដំណើរនៅក្នុងឡានភាគច្រើនជាក្មេងៗ ដែលមានអាយុ ក្រោម ១០ឆ្នាំ។ នេះបើតាមការបញ្ជាក់របស់ប៉ូលិស។ ចំណែកអ្នកបើកបរ និងគ្រូ ២នាក់ក៏ស្លាប់នៅក្នុងហេតុការណ៏ ដែលកើតឡើងកាលពីថ្ងៃច័ន្ទម្សិលមិញផងដែរ។
បើតាមអ្នកឃើញហេតុការណ៏នោះបានឲ្យដឹងថា រថយន្តក្រុងបានរអិលធ្លាក់ចុះ នៅពេលដែលវាបានបត់នៅជ្រុងខាងឆ្វេងនៃផ្លូវ លើភ្នំ។
អាជ្ញាធរនៅក្នុងតំបន់ ស្នើឲ្យមានការស៊ើបអង្កេតលើឧបទ្ទវហេតុនោះ។
សូមបញ្ជាក់ថា ករណីគ្រោះថ្នាក់ចរាចរណ៏តែងតែកើតមានជាញឹកញាប់នៅក្នុងប្រទេសឥណ្ឌា ដោយសារតែការបើកបរមិនបានល្អ បញ្ហាផ្លូវ និងរថយន្តជាដើម៕ សុភ័ក្ត្រ