កោះកុង ៖ ជនដៃដល់ម្នាក់ រួមជាមួយនឹងបក្ខពួក ដែលស្ទាក់កាប់បុរសម្នាក់ បណ្ដាលឲ្យរយះក្បាលដេរចំនួន១០ថ្នេរ ក្រោយចេញពីរាំធុងបាស់ក្នុងវត្ត ត្រូវបានប៉ូលិសវាយខ្នោះ។ បច្ចុប្បន្ន សមត្ថកិច្ចកំពុងកសាងសំណុំរឿង បញ្ជូនមកការិយាល័យជំនាញ ដើម្បីចាត់ការបញ្ជូនទៅសាលាដំបូងខេត្តកោះកុង ដោយចោទប្រកាន់ពីបទបង្កហិង្សាមានស្ថានទម្ងន់ទោស នៅថ្ងៃទី១០ ខែមេសានេះ។
សមត្ថកិច្ចមូលដ្ឋានខេត្តកោះកុង បានឲ្យដឹងថា ជនរងគ្រោះឈ្នោះ ហ៊ាន ប៊ុនស៊ាន ភេទប្រុស មុខរបរមិនពិតប្រាកដ មានទីលំនៅ ភូមិ៣ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង ។ ចំណែក ជនសង្ស័យ ដែលឃាត់ខ្លួនឈ្មោះ ព្រំ សុតា ហៅវហា ភេទប្រុស អាយុ១៨ឆ្នាំ មុខរបរ សិស្ស មានទីលំនៅ ភូមិបឹងឃុនឆាង សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង និងបក្ខពួក២នាក់ទៀត មិនស្គាល់អត្តសញ្ញាណ បានគេចខ្លួនបាត់។
បើតាមរបាយការណ៍របស់ស្នងការដ្ឋាននគរបាលខេត្តកោះកុង នៅថ្ងៃទី៩ខែមេសាឆ្នាំ២០១៨ បានបញ្ជាក់ថាកាលពីយប់ថ្ងៃទី៨ ខែ មេសា ឆ្នាំ ២០១៨ វេលាម៉ោងជាង ១១ នាទីយប់ មានករណីកាប់បង្ករបួសស្នាម នៅចំណុចក្បាលស្ពាន ជាប់កន្លែងបាល់ទះមនោរមន្យ ស្ថិតក្នុងភូមិ១ សង្កាត់ស្មាច់មានជ័យ បង្កឡើងដោយក្មេងទំនើង ១ ក្រុម មានគ្នាប្រមាណ ៣ នាក់ បណ្តាលឲ្យរងរបួសធ្ងន់ចំនួន ១ នាក់ ឈ្មោះ ហ៊ាន ប៊ុនស៊ាន ភេទប្រុស អាយុ ២១ឆ្នាំ កម្មកររោងចក្រ (ត្រូវក្បាលដេរចំនួន ១០ថ្នេរ) រីឯជនបង្កឈ្មោះ ព្រំ វេហា ភេទប្រុស អាយុ ១៨ ឆ្នាំ កម្មកររោងចក្រ និងបក្ខពួកចំនួន ២ នាក់ទៀត បានរត់គេចខ្លួន។
នគរបាលមូលដ្ឋានក្រុងខេរមភូមិន្ទ បានបញ្ជាក់ពីអង្គហេតុនៃរឿងកាប់គ្នានេះថា ទីតាំងរាំ នៅម្តុំវត្តជោត្តញ្ញាណ ដំបូងមកពីរាំមើលមុខគ្នា បន្ទាប់មកជនរងគ្រោះ និងប្រពន្ធ បានឈប់រាំ ជិះម៉ូតូចេញពីកន្លែងរាំ ក៏ត្រូវជនសង្ស័យ និងបក្ខពួក ជិះម៉ូតូមកស្ទាក់កាប់ នៅចំណុចខាងលើ។ ករណីនេះ កម្លាំងជំនាញយើង កំពុងស្រាវជ្រាវ រកជនបង្កមកផ្តន្ទាទោសតាមច្បាប់៕ ដោយ៖បញ្ញាស័ក្តិ
