ខេត្តព្រះសីហនុ ៖ លោកជំទាវ ម៉ែន សំអន ឧបនាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញបើកសម្ពោធសណ្ឋាគារ ហ្គោបូអ៊ីស្ត អេនធើធេនម៊ិន មានទីតាំងនៅក្នុងក្រុងព្រះសីហនុ កាលពីព្រឹកថ្ងៃទី១០ ខែមេសា ឆ្នាំ២០១៨។ សណ្ឋាគារទើបបើកសម្ភោធពេលនេះ បានបង្កើតការងារឲ្យបុគ្គលិកកម្ពុជាជាង ៦០០នាក់មានការងារធ្វើនៅក្នុងសណ្ឋាគារនេះ។
អញ្ជើញបើកសម្ភោធសណ្ឋាគារលំដាប់ផ្កាយ៤ នៅខេត្តព្រះសីហនុពេលនេះមាន លោកជំទាវ ម៉ែន សំអន ឧបនាយករដ្ឋមន្ត្រីនិងជារដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច, ឯកឧត្តម មីន ស៊ូ ឯកអគ្គរដ្ឋទូតនៃប្រទេសមីយ៉ាន់ម៉ា ប្រចាំប្រទេសកម្ពុជា និងលោក ឈិន សេងងួន អភិបាលរងខេត្តព្រះសីហនុ បានអញ្ជើញសម្ពោធដាក់អោយដំណើរការសណ្ឋាគារ ហ្គោបូអ៊ីស្ត អេនធើធេនម៊ិន មានទីតាំងក្នុងសង្កាត់លេខ៤ ក្រុងព្រះសីហនុ។ អាជីវកម្មសណ្ឋាគារនេះនឹងមានបុគ្គលិកកម្ពុជាយ៉ាងតិច ៦០០នាក់ បានចូលធ្វើការងារនៅកន្លែងនេះ។ នាឱកាសនោះដែរ លោក ឈិន សេងងួន មាន ប្រសាសន៍ថា ការបណ្តាក់ទុន របស់ក្រុមហ៊ុន Gobo East Entertainment ក្នុងវិស័យទេសចរណ៍ ស្របពេលដែលកំណើនភ្ញៀវទេសចរ និងអ្នកវិនិយោគគិនបរទេសមកទស្សនាខេត្តព្រះសីហនុ បានកើនឡើងជាលំដាប់។ ហើយថា សមិទ្ធិផលនេះ ឆ្លុះបញ្ចាំងនូវជោគជ័យក្នុងការអនុវត្តនូវគោលនយោបាយរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានខិតខំទាក់ទាញការវិនិយោគក្នុង និងក្រៅប្រទេស បង្កើននូវទំនុកចិត្ត និងជំនឿជឿជាក់ដល់វិនិយោគិន ធុរ:ជន ក្នុងវិស័យអចលនទ្រព្យ ដែលកំពុងបោះជំហានយ៉ាងលឿននៅកម្ពុជា ជាពិសេសក្នុងមូលដ្ឋានខេត្តព្រះសីហនុ។
លោកជំទាវឧបនាយករដ្ឋមន្ត្រី ម៉ែន សំអន បានអបអរសាទរចំពោះសមិទ្ធិផលថ្មី ដែលក្រុមហ៊ុនសំរេចចិត្តចូលមកវិនិយោគនៅខេត្តព្រះសីហនុ ជាជម្រើសដ៏ល្អ ព្រោះក្រុងនេះ ជាទីតាំងយុទ្ធសាស្ត្រដ៏ល្អ ជាប់មាត់ស្រស់ស្អាត មានកំពង់ផែអន្តរជាតិ និងអាកាសយាន្តដ្ឋានអន្តរជាតិ មានសក្កានុពលសេដ្ឋកិច្ច និងពាណិជ្ជកម្មដ៏សំខាន់ របស់កម្ពុជា ។ ដូច្នេះភ្ញៀវទេសចរអន្តរជាតិជាច្រើនពិតជាចេញ ចូល និងស្នាក់នៅក្រុងព្រះសីហនុច្រើន ដើម្បីរក្សាស្ថេរភាព និងកំណើនសេដ្ឋកិច្ចកម្ពុជាតាមរយៈការផ្ដល់ចំណូល និងផ្តល់ឱកាសការងារដល់ប្រជាពលរដ្ឋ និងកាត់បន្ថយភាពក្រីក្រ៕ ដែន សីមា