ប្រភពពីស៊ីនហួរឲ្យដឹងថា ទីភ្នាក់ងារព័ត៌មានកូរ៉េខាងជើង (KCNA) កាលពីថ្ងៃទី ១០ ខែមេសា បានអំពាវនាវឲ្យកូរ៉េខាងត្បូង បើកការស៊ើបអង្កេតសារជាថ្មីអំពីករណីនាវាអមការពារ Chronan ត្រូវបាញ់ពន្លិចកាលពីខែមីនា ឆ្នាំ ២០១០ ហើយក៏បានហៅបញ្ហានេះថា គឺជាឧបសគ្គមួយចំពោះការកែសម្រួលទំនាក់ទំនងអន្តរកូរ៉េ ។
នាវា Cheonan របស់កូរ៉េខាងត្បូងត្រូវបានស្ទូចឡើងពីបាតសមុទ្រនៅខែមេសា ឆ្នាំ ២០១០
KCNA ឲ្យដឹងថា ពីមួយថ្ងៃទៅមួយថ្ងៃមានការអំពាវនាវជាច្រើនសុំឲ្យធ្វើការស៊ើបអង្កេតឡើងវិញករណីលិចនាវានេះនៅកូរ៉េខាងត្បូង ដោយហេតុថា ពលរដ្ឋកូរ៉េខាងត្បូង ៧០% ពុំជឿលើលទ្ធផលនៃការស៊ើបអង្កេត។
KCNA លើកឡើងច្បាស់ថា ៖ “សំណូមពរនៃការស៊ើបអង្កេតឡើងវិញកាន់តែខ្លាំងក្លាឡើងពីមួយថ្ងៃទៅមួយថ្ងៃ ស្របនឹងបរិយាកាសនៃការសម្របសម្រួលជាតិ និងបំណងឯកភាពប្រទេសកាន់តែកើនឡើង ។ ហេតុនេះករណីខាងលើពិតជាឧបសគ្គធំមួយលើវិថីកែសម្រួលចំណងទាក់ទងរវាងខាងជើង និងខាងត្បូង” ។
គួររំលឹកថា នាវិកចំនួន ៤៦នាក់ បានស្លាប់ បន្ទាប់ពីនាវា Cheonan បានលិចកាលពី ៨ឆ្នាំមុន ។ កូរ៉េខាងត្បូងចាត់ទុកថា គ្រាប់បែកក្នុងទឹកមួយរបស់កូរ៉េខាងជើងបានវាយលុកមកលើនាវាអមការពារនេះ ។ ប៉ុន្តែភាគីក្រុងព្យុងយ៉ាងតែងបដិសេធនូវការចោទប្រកាន់បែបនេះ៕ សូយន
