ថ្មីៗនេះ អ្នកនេសាទវ័យក្មេងម្នាក់មកពីភូមិ Hadji Taha បានធ្វើឲ្យពលរដ្ឋដែលមកចោមរោមមើល បានមានការភ្ញាក់ផ្អើលយ៉ាងខ្លាំង បន្ទាប់ពីពួកគេឃើញគាត់នាំមកនូវមឹកយក្ស១ប្រវែង ២.៥ ម៉ែត្រ ។ ការនេសាទដ៏កម្រនេះ បានធ្វើឡើងនៅក្នុងសមុទ្រ នៃស្រុក Sibutu ខេត្ត Tawi-Tawi ប្រទេសហ្វីលីពីន ។
មឹកយក្សនេះ ត្រូវបានដឹកតាមទូក មកកាន់ឆ្នេរសមុទ្រដោយអ្នកនេសាទមួយចំនួន ។ ពួកគេបន្ទាប់មក ក៏បានយកម៉ែត្រវាស់ និងរកឃើញថាវាមានប្រវែងរហូតដល់ ២.៥ ម៉ែត្រ ឯណោះ ។
Harold Eduardo Curtis ជាអ្នកនេសាទម្នាក់នៅលើកោះនេះ ដែលបានឃើញមឹកយក្សនេះ បាននិយាយថា៖ «ខ្ញុំបានស្គាល់អ្នកនេសាទដែលចាប់បានមឹកនេះ ។ វាពិតជាមានការលំបាកសម្រាប់គាត់ ក្នុងការនាំយកវា ព្រោះទម្ងន់របស់វា» ។
អ្នកភូមិជាច្រើនមានការរំភើបចិត្តយ៉ាងខ្លាំង ចំពោះលក្ខណៈសាច់របស់វា បន្ទាប់បានភ្លក់ក្រោយពេលចម្អិន ។ ចំណែក Curtis ក៏បានសម្តែងនូវអារម្មណ៍រំភើបផងដែរ បន្ទាប់ពីបានភ្លក់រសជាតិសាច់របស់វា ៕ ចន្ទី