ប្រទេសរុស្សីបានវេតូដំណោះស្រាយពង្រាងរបស់អាមេរិច នៅក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃអង្គារម្សិលមិញ នេះ ដែលសេចក្តីសម្រេចនោះនឹងបង្កើតឲ្យមានការស៊ើបអង្កេតឯករាជ្យមួយ លើការវាយប្រហារដោយអាវុធគីមីនៅក្នុងប្រទេសស៊ីរី។ នេះបើតាមការចេញផ្សាយរបស់សារព៌តមានអាមេរិច CNN។
សេចក្តីសម្រេចរបស់អាមេរិចក៏បានធ្វើការថ្កោលទោសការវាយប្រហារដោយអាវុធគីមី ដែលត្រូវគេសង្ស័យថា ជាទំនួលខុសត្រូវរបស់របបដឹកនាំរបស់ប្រធានាធិបតី Bashar Hafez al-Assad និងទាមទារឲ្យមានការចូលទៅកាន់តំបន់ Douma ជាបន្ទាប់របស់ក្រុមមនុស្សធ៌ម និងស្នើឲ្យមានការស៊ើបអង្កេតផងដែរ។
ឯកអគ្គរដ្ឋទូតអាមេរិចប្រចាំអង្គការសហប្រជាជាតិអ្នកស្រី Nikki Haley បានថ្លែងថា “នៅពេលប្រជាជននៃតំបន់ Douma ជាមួយនឹងសហគមន៏អន្តរជាតិរងចាំមើលក្រុមប្រឹក្សាសន្តិសុខចាត់វិធានការ មានប្រទេសមួយបានដើរចេញឆ្ងាញ។” អ្នកស្រីចង់សំដៅលើប្រទេសរុស្សី។
“ប្រវត្តិសាស្ត្រនឹងកត់ត្រាវានៅថ្ងៃនេះ ប្រទេសរុស្សីបានជ្រើសរើសយកការការពារបិសាច ជាជាងជីវិតប្រជាជនស៊ីរី។ រុស្សីបានធ្វើឲ្យខូចជំនឿចិត្តរបស់ក្រុមប្រឹក្សាសន្តិសុខ”។
សូមបញ្ជាក់ថា ការវាយប្រហារដោយអាវុធគីមីនៅក្នុងប្រទេសស៊ីរីកាលពីថ្ងៃសៅរ៍កន្លងទៅនេះ ស្ថិតក្នុងទីក្រុង Douma បណ្តាលឲ្យមនុស្សចំនួន ៤៩នាក់ស្លាប់បាត់បង់ជីវិត និងជាច្រើននាក់ទៀតរងរបួស៕ សុភ័ក្ត្រ
