ក្រចេះ៖ រថយន្តម៉ាក សាំយុងមួុយគ្រឿងបើកយ៉ាងលឿនជ្រុលទៅបុកម៉ូតូ 2គ្រឿងបណ្តាលឲ្យបុរស2នាក់ស្លាប់ភ្លាមៗនៅនឹងកន្លែង និងម្នាក់រងរបួុសធ្ងន់ ខណៈបន្ទាប់ពីបង្ករគ្រោះថ្នាក់អ្នកបើករថយន្តបានដាក់មេប្រូចបាត់ស្រមោល។ ជុំវិញករណីនេះនគរបាល ស្រុកស្នួល បានឱ្យដឹងថា កម្លាំងជំនាញកំពុងស្រាវជ្រាវ រកម្ចាស់រថយន្តម៉ាកសាំយ៉ុង ពណ៍សរពាក់ស្លាកលេខ ភ្នំពេញ 2AH.1406 ឱ្យចូលខ្លួនមកដោះស្រាយ ។
ករណីគ្រោះថ្នាក់ចរាចណ៍ បង្កឱ្យមានមនុស្សស្លាប់និងរបួសនេះ បានកើតឡើងកាលពីវេលាម៉ោង៩ព្រឹក ថ្ងៃទី១១ខែមេសា នៅលើដងផ្លូវជាតិលេខ7 ក្នុងភូមិក្បាលត្រាច ឃុំស្រែចារ ស្រុកស្នួល ខេត្តក្រចេះ ។
អធិការនគរបាលស្រុកស្នួល លោក ចាន់ សុខគីម បានឱ្យដឹងថា ករណីគ្រោះថ្នាក់ចរាចរណ៍មួយនេះ គឺបង្កឡើងដោយរថយន្តម៉ាកសាំយ៉ុង ពណ៍សរ បើកបរពីទិសខាងជើងមកទិសខាងត្បូង បានបើកបរក្នុងល្បឿនលឿន លុះមកដល់កន្លែងកើតហេតុ ក៏បានបុករះម៉ូតូ២គ្រឿង បណ្តាលឱ្យមានអ្នកបើកបរម៉ូតូ២នាក់ស្លាប់ និងរងរបួសម្នាក់ ។
លោកអធិការបន្តថា ជនរងគ្រោះទាំងពីរនាក់ ១ឈ្មោះ លឹម បូ អាយុ៤៥ឆ្នាំ រស់នៅភូមិក្បាលត្រាច ឃុំស្រចារ ស្រុកស្នួល ខេត្តក្រចេះ ទី២ ឈ្មោះ ផាត ស៉ីមថា អាយុ២៧ឆ្នាំ រស់នៅភូមិព្រែកកំពែង ឃុំអញ្ចើម ស្រុកត្បូងឃ្មុំ ខេត្តត្បូងឃ្មុំ ជនរងគ្រោះទាំង២នាក់ បានស្លាប់និងកន្លែងកើតហេតុ ។
បើតាមសាក្សីនៅកន្លែងកើតហេតុបាននិយាយថា នៅមុនពេលកើតហេតុ គេបានឃើញជនរងគ្រោះបានជិះម៉ូតូ ឆ្លងកាត់ផ្លូវ ពីលិចទៅកើត ក៏ត្រូវរថយន្តសាំយ៉ុង បុកស្លាប់នៅនិងកន្លែងតែម្តង ។ ហើយរថយន្តនោះ ក៏ជ្រុលទៅបុក ម៉ូតូមួយគ្រឿងទៀត បង្កឱ្យអ្នកបើកបរម៉ូតូស្លាប់នៅនិងកន្លែងដូចគ្នា ចំណែកអ្នករួមដំណើរម្នាក់ទៀតរបួសធ្ងន់ ។
រថយន្តសាំយ៉ុងបង្ក រួមនិងម៉ូតូម៉ាកហុងដាឌ្រីមពីរគ្រឿង ត្រូវបាននគរបាលនាំមករក្សាទុក នៅអធិការនគរបាលស្រុកស្នួល រងចាំដោះស្រាយតាមច្បាប់ ៕ ដោយ ៖ បញ្ញស័ក្តិ