ខេត្តព្រះសីហនុ ៖ នាយកក្រុមហ៊ុន ជី. ធី. វី. ស៊ី, ស្ពីដប៊ូតកម្ពុជា (G.T.V.C, Speed Boad Cambodia) លោកឧកញ៉ា ទៀ វិចិត្រ បានបន្តនាំយកអង្ក ម្ហូបអាហារគ្រឿងឧបភោគបរិភោគ និងថវិកាមួយចំនួន ជួយឧបត្ថម្ភជូននាយនាវី នាយនាវីរង និងពលនាវឹកកងទព័ជើងទឹក នៃកងនាវាដឹកជញ្ជូន មានមូលដ្ឋាននៅតំបន់ទំនប់រលក ក្រុង-ខេត្តព្រះសីហនុ។
ព្រមគ្នានេះ លោកឧកញ៉ា ទៀ វិចិត្រ បានឲ្យដឹងថា នៅរសៀលថ្ងៃពុធ ទី១១ ខែមេសា ឆ្នាំ២០១៨នេះ រូបលោកក៏បានបើកសម្ភោធខ្លោងទ្វារទើបស្ថាបនាថ្មី ដែលអង្គភាពកងនាវាដឹកជញ្ជូនខាងលើ បានស្នើឲ្យរូបលោកជួយឧបត្ថមស្ថាបនាខ្លោងទ្វារនេះឡើង និងដាក់ឲ្យប្រើប្រាស់នៅរសៀលថ្ងៃនេះ។ លោកបន្តថា ដើម្បីអបអរពិធីបុណ្យចូលឆ្នាំថ្មី ប្រពៃណីជាតិខ្មែរ នឹងចូលមកដល់នៅថ្ងៃទី១៤ ដល់ថ្ងៃទី១៦ ខែមេសា ឆ្នាំ២០១៨ លោកបាននាំយកគ្រឿងឧបភោគបរិភោគ និងថិវិកាមួយចំនួន ទៅផ្តល់ជូននាយនាវី នាយនាវីរង និងពលនាវឹកកងទព័ជើងទឹក នៃអង្គភាពកងនាវាដឹកជញ្ជូនផ្លូវទឹក ដើម្បីជាការដឹងគុណ និងលើកទឹកចិត្តនាឱកាសពិធីបុណ្យចូលឆ្នាំថ្មីឆ្នាំនេះ។
ជាមួយគ្នានេះ លោកឧកញ៉ា ទៀ វិចិត្រ ក៏បានធ្វើពិធីជប់លៀង និងមានប្រគុំតន្ត្រីសម័យ ជូននាយនាវី នាយនាវីរង និងពលនាវឹកកងទព័ជើងទឹក នៃកងនាវាដឹកជញ្ជូន ដែលកំពុងប្រចាំការនៅអង្គភាពនេះបានសប្បាយរីករាយ នៅមុនពិធីបុណ្យចូលឆ្នាំចូលមកដល់។ លោកបន្តថា ការចូលរួមឧបត្ថមសម្ភារៈហូបចុក និងថវិកាបន្តិចបន្តួចនាពេលនេះ ដើម្បីជាការដឹកគុណ និងលើកទឹកចិត្តដល់បងៗកងទ័ពក្នុងអង្គភាពកងនាវាដឹកជញ្ជូនទាំងអស់ ដែលបានចំណាយពេលវេលា និងកម្លាំងកាយចិត្តការពារជាតិមាតុភូមិ ឲ្យមានសុខសុវត្ថិភាព ក្រោមការដឹកនាំ របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជម្រុញឲ្យសង្គមជាតិមានការរីកចំរើន និងមានសន្តិភាពហូតមកដល់ពេលនេះ។
លោកឧកញ៉ា ទៀ វិចិត្រ ឲ្យដឹងថា គ្រឿងឧបភោគបរិភោគ និងថវិកា ដែលរូបលោកបាននាំយកទៅផ្តល់ជូនកងទព័ជើងទឹក នៃកងនាវាដឹកជញ្ជូននៅរសៀលថ្ងៃទី១១ ខែមេសា ឆ្នាំ២០១៨នេះ សរុបមានចំនួនជិត ៦០នាក់ ដោយក្នុងម្នាក់ៗទទួលបានថវិកា ៨ម៉ឺនរៀល។ ក្នុងនោះក៏បានជួយឧបត្ថម្ភដល់អតីតកងទ័ពចូលនិវត្ត៍ចំនួន ៤នាក់ ដោយផ្តល់ជូនម្ហូបអាហារ និងថវិកាក្នុងម្នាក់ៗចំនួន ១៥ម៉ឺនរៀល។ ពិសេសជាងនេះ គឺបានជួយឧបត្ថមការចំណាយទៅលើកម្មវិធីទទួលទានអាហារសាមគ្គីជុំគ្នា ដល់អង្គភាពនាវាដឹកជញ្ជូន ដើម្បី អបអរពិធីបុណ្យចូលឆ្នាំថ្មីទាំងស្រុង នៅល្ងាចថ្ងៃដដែលនេះ៕ ដែន សីមា
