នៅថ្ងៃទី ១១ ខែមេសា ម្សិលមិញនេះ ប្រធានាធិបតីអាមេរិក Donald Trump បានព្រមានរុស្ស៊ីថា គប្បីត្រៀមបម្រុងឲ្យហើយទៅ ព្រោះស៊ីរីនឹងត្រូវរងទទួលកាំជ្រួច “ថ្មី ស្អាតហើយឆ្លាតវ៉ៃ” ។
ប្រធានាធិបតីអាមេរិក Donald Trump
ជាឆ្លើយតបអ្នកនាំពាក្យក្រសួងការបរទេសរុស្ស៊ី Maria Zakharova ថ្លែងថា ៖ “កាំជ្រួចឆ្លាតវៃ គួរគប្បីតម្រង់ឆ្ពោះទៅរកពួកភេរវករ ពុំមែនសំដៅរដ្ឋាភិបាលស៊ីរី ដែលស្របច្បាប់ ហើយប្រើពេលវេលាអស់ច្រើនឆ្នាំ ដើម្បីប្រឆាំងនឹងពួកភេរវករ អន្តរជាតិលើទឹកដីរបស់ពួកគេទេ” ។
រុស្ស៊ី បានងាកមកចោទប្រកាន់វិញថា អាមេរិកកំពុងរកវិធីបំបែកសាច់រឿង ជុំវិញការស៊ើបអង្កេតករណីអាវុធគីមីសាស្ត្រ ដែលជាជម្លោះទើបផ្ទុះឡើងថ្មីៗនេះ ក្នុងរកណីចោទប្រកាន់គ្នាទៅវិញទៅមកពីការវាយប្រហារដោយអាវុធគីមីសាស្ត្រ នៅ Ghouta ខាងកើត ។
មុននោះលោក Trump បានព្រមានកាលពីថ្ងៃទី ៩ ខែមេសាថា អាមេរិកនឹងវាយប្រហារស៊ីរីក្នុងអំឡុងពេលពី ២៤ម៉ោង-៤៨ម៉ោង ខាងមុខ ព្រោះសង្ស័យថា កងទ័ពស៊ីរីបានប្រើប្រាស់អាវុធគីមីនៅប្រជុំជន Douna បណ្តាលឲ្យមនុស្សរាប់សិបនាក់ស្លាប់៕ សូយន
