ភ្នំពេញ ៖ មន្ត្រីជាន់ខ្ពស់ក្រសួងសុខាភិបាល បានអំពាវនាវដល់ម្ចាស់ភោជនីយដ្ឋាន ទូទាំងប្រទេស ត្រូវបង្កើនអនាម័យចំណីអាហារ ឲ្យបានកាន់តែខ្ពស់ ដើម្បីផ្ដល់សុខុមាលភាពជូនប្រជាពលរដ្ឋ ពិសេសការបង្ការការពុលអាហារនៅកម្ពុជា ។
ក្នុងឱកាសចែកវិញ្ញាបនបត្រ ដល់ម្ចាស់អាជីវកម្ម នៅថ្ងៃទី១១ ខែមេសា ឆ្នាំ២០១៨ នាទីស្ដីការក្រសួងសុខាភិបាល លោកស្រីវេជ្ជបណ្ឌិត ឱ វណ្ណឌីន អគ្គនាយកបច្ចេកទេសសុខាភិបាល បានថ្លែងដោយសូមអំពាវនាវដល់ម្ចាស់ភោជនីយដ្ឋាន សហការគ្នាជាមួយក្រសួងសុខាភិបាល ក្នុងការផ្ដល់នូវសុវត្ថិភាពផ្នែកអនាម័យចំណីអាហារ ជូនដល់ប្រជាពលរដ្ឋយើង ។ពិសេសយើង នឹងបន្ដជំរុញដល់ភាគីពាក់ព័ន្ធទាំងអស់គ្នា ប្រឹងប្រែងបន្ដការងារនេះ ឲ្យបានកាន់តែល្អ ដើម្បីធានាថា ភោជនីយដ្ឋាននៅកម្ពុជា មានស្ដង់ដារ អាហារឆ្ងាញ់ មានគុណភាព និងអនាម័យល្អ ។
លោកស្រីវេជ្ជបណ្ឌិត បានស្នើឲ្យម្ចាស់ភោជនីយដ្ឋាន និងអ្នកដែលបានមករៀនវគ្គបណ្ដុះបណ្ដាល ជាមួយមន្ដ្រីជំនាញ របស់ក្រសួងសុខាភិបាល ត្រូវបន្ដបើកវគ្គបណ្ដុះបណ្ដាលនេះ ទៅដល់បុគ្គលិករបស់ខ្លួនបន្ដទៀត ដើម្បីផ្ដល់នូវសុខុមាលភាពដល់ពលរដ្ឋយើង។
លោកបណ្ឌិត ហេង ប៊ុនគៀត ប្រធាននាយកដ្ឋានឱសថ ចំណីអាហារ និងបរិក្ខារពេទ្យ និងគ្រឿងសំអាងនៃក្រសួងសុខាភិបាល បានថ្លែងថា ការចុះវិញ្ញាបនបត្រនេះ មានសារសំខាន់ខ្លាំងណាស់ ក្នុងការធានា និងជំនឿចិត្ដដល់អតិថិជន ជាតិអន្ដរជាតិ ពិសេសអាចទាក់ទាញភ្ញៀវទេសចរមួយ ហើយការអនុវត្ដន៍នេះ មិនមែនតែស្រុកទេ គឺមាននៅគ្រប់បណ្ដាប្រទេសដើម្បីបញ្ជាក់នូវស្ដង់ដារគុណភាព និងអនាម័យជូនអ្នកបរិភោគ ។
លោកបន្ដថា ថ្លែងទៀតថា សម្រាប់ថ្ងៃចែកវិញ្ញាបនបត្រ ម្ចាស់អាជីវកម្ម ឬម្ចាស់ភោជនីយដ្ឋាននៅក្នុងថ្ងៃនេះ មិនមែនជាលើកទី១ទេ ហើយធ្វើជារៀងរាល់ខែតែម្ដង ហើយមកទល់នឹងពេលនេះ មានភោជនីយដ្ឋានសរុប ជិត៤ពាន់កន្លែងហើយទូទាំងប្រទេស តែចំនួននេះមិនទាន់ឆ្លើយតបសមស្របនៅឡើយទេ ដូច្នេះសូមស្នើឲ្យអាជីវករ ប្រកបអាជីវកម្ម ភោជនីយដ្ឋាន អាហារដ្ឋានទាំងអស់ សហការជាមួយនឹងក្រសួងសុខាភិបាល ធ្វើយ៉ាងណាឲ្យភោជនីយដ្ឋាន ទូទាំងប្រទេសយើង ទទួលបានវិញ្ញាបនបត្រ បញ្ជាក់អនាម័យឲ្យបានគ្រប់ៗគ្នា ដើម្បីការពារអ្នកញុំា កុំឲ្យប៉ះពាល់ដល់សុខភាព ឬការពុលអាហារ និងផ្ដល់ជំនឿទុកចិត្ដ រួមទាំងទាក់ទាញភ្ញៀវកាន់តែច្រើនបន្ថែមទៀត៕ ដោយ ៖ បញ្ញាស័ក្តិ
