ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានចេញសេចក្តីអំពាវនាវដល់ធ្វើដំណើរឲ្យគោរពច្បាប់ចរាចរណ៍ និងបានដាក់ចេញវិធានការ១០ចំណុច ដើម្បីទប់ស្កាត់គ្រោះថ្នាក់ចរាចរណ៍ នៅក្នុងប្រទេសកម្ពុជា នាឱកាសបុណ្យចូលឆ្នាំថ្មីនេះ។
ប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក សូមថ្លែងនូវការកោតសរសើរប្រកបដោយក្តីមោទនភាពជាទីបំផុត ចំពោះអ្នកប្រើប្រាស់ផ្លូវដ៏ច្រើនលើសលប់ ដែលមានឆន្ទៈក្នុងការចូលរួមគោរព និងអនុវត្តន៍ច្បាប់ស្តីពីចរាចរណ៍ផ្លូវគោក យ៉ាងផុលផុស ក្នុងពេលធ្វើចរាចរណ៍ រួមចំណែកក្នុងការកាត់បន្ថយការបាត់បង់ជីវិត ការរងរបួស និងការខូចខាតទ្រព្យសម្បត្តិដោយសារគ្រោះថ្នាក់ចរាចរផ្លូវគោកនាពេលកន្លងទៅ។ ប៉ុន្តែគ្រោះថ្នាក់ចរាចរផ្លូវគោកនៅតែជាបញ្ហាប្រឈមចំពោះមុខ និងយូរអង្វែង ដែលអាចកើតឡើងភ្លាមៗ ក្នុងករណីអ្នកប្រើប្រាស់ផ្លូវមានការធ្វេសប្រហែស ឬខ្ជីខ្ជាមិនគោរពច្បាប់។ ក្នុងឱកាសដែលបុណ្យចូលឆ្នាំថ្មី ប្រពៃណីជាតិខ្មែរ ដែលនឹងប្រព្រឹត្តទីពីថ្ងៃទី១៤ ដល់ទី១៦ខែមេសាឆ្នាំ២០១៨ យានយន្តធ្វើចរាចរណ៍នឹងមានកំណើនខ្ពស់ខុសពីប្រក្រតី ដែលអាចមានគ្រោះថ្នាក់ចរាចរ ឬការកកស្ទះចរាចរណ៍ ដូចក្នុងពិធីបុណ្យនានាកន្លងមកផងដែរ។
ដើម្បីបង្ការនិងទប់ស្កាត់គ្រោះថ្នាក់ចរាចរផ្លូវគោកក្នុងឱកាសបុណ្យចូលឆ្នាំថ្មី គណៈកម្មាធិការជាតិសុវត្ថិភាពចរាចរណ៍ផ្លូវគោក សូមធ្វើការអំពាវនាវដល់សាធារណជន ជាអ្នកប្រើប្រាស់ផ្លូវ ចូលរួមអនុវត្ត ដើម្បីទប់ស្កាត់គ្រោះថ្នាក់ចរាចរ ១៖ ត្រូវពាក់មួកសុវត្ថិភាពជានិច្ចក្នុងពេលធ្វើដំណើរតាមទោចក្រយានយន្ត។ ២៖ មិនត្រូវបើកបរលើសល្បឿនកំណត់ជាដាច់ខាត។ ៣៖មិនត្រូវបើកបរក្រោមឥទ្ធិពលនៃគ្រឿងស្រវឹង។ ៤៖ ត្រូវគោរពសិទ្ធិអាទិភាព គោរពសញ្ញាចរាចរណ៍ និងប្រកាន់ស្តាំជានិច្ច។ ៥៖ ត្រូវពាក់ខ្សែក្រវ៉ាត់សុវត្ថិភាពជានិច្ចក្នុងពេលធ្វើដំណើរតាមរថយន្ត។៦៖មិនត្រូវបត់ឬវ៉ាជែងងក្នុងភាពប្រថុយប្រថាន ឬប្រើទូរស័ព្ទដោយគ្មានឧបករណ៍សំឡេងភ្ជាប់ទំនាក់ទំនង។ ៧៖ត្រូវត្រួតពិនិត្យលក្ខណៈបច្ចេកទេសយានយន្តជានិច្ច ។ ៨៖ សូមកុំផ្ទុកអ្នកដំណើរ ឬដឹកទំនិញ លើសច្បាប់កំណត់ ហើយចំពោះរថយន្តដឹកអ្នកដំណើរឬដឹកកម្មករមិនត្រូវផ្ទុកអ្នកដំណើរឬកម្មករលើដំបូល និងសូមមេត្តាកុំដំឡើងថ្លៃធ្វើដំណើរក្នុងឱកាសនេះ។៩៖មិនត្រូវបើកបរក្នុងស្មារតីប្រុងប្រយ័ត្នជានិច្ច ប្រកបដោយសីលធម៌យោគយល់អធ្រាស្រ័យ ។ ១០៖ ក្នុងករណីមានគ្រោះថ្នាក់ចរាចរណ៍កើតឡើង ស្នើប្រជាពលរដ្ឋគ្រប់រូបមេត្តាអត់ធ្មត់ ខន្តី អាធ្យាស្រ័យ ជៀសវាងការប្រើអំពើហិង្សា ហើយទាក់ទងសមត្ថកិច្ចដែលនៅជិតបំផុត មកដោះស្រាយតាមច្បាប់ជាធរមាន៕ ដោយ៖បញ្ញាស័ក្តិ