ស្ត្រីអាយុ៥០ឆ្នាំម្នាក់ រស់នៅ Wuhan ប្រទេសចិន បានកំពុងប្រឈមនឹងជំងឺខ្វិន បន្ទាប់ពីបានអនុវត្តរបបហូបអាហារបួសដ៏តឹងរ៉ឹង ក្នុងរយៈពេលជាង ៣០ ឆ្នាំ មក ។
យោងតាម Oriental Daily ស្ត្រីខាងលើនេះបានធ្លាប់ជួបបញ្ហាលើសទម្ងន់ នៅពេលនាងមានអាយុ ២០ ឆ្នាំ ។ នាងត្រូវបានគេរាយការណ៍ថា មានទម្ងន់ប្រហែល ៥៥ គ.ក្រ នៅពេលនោះ ។ ដូច្នេះ នាងបានសម្រេចចិត្តហូបបួស ដើម្បីសម្រកទម្ងន់ ។
នាងទទួលបានលទ្ធផលគួរឲ្យភ្ញាក់ផ្អើលមួយចំនួន ពីការអនុវត្តរបបហូបតមនេះ ហើយអាចរក្សារូបរាងនៅត្រឹមទម្ងន់ ៤៥ គ.ក្រ ។
Tan បាននិយាយថា៖ «បានចៀសឆ្ងាយពីការហូបសាច់ និងអាហារមានជាតិខ្លាញ់ ។ ដូច្នេះ ទម្ងន់ខ្លួនរបស់ខ្ញុំធ្លាក់នៅត្រឹម ៤៥ គ.ក្រ ហើយខ្ញុំបាននិងកំពុងរក្សារបៀបរស់នៅបែបនេះអស់រយៈពេល ៣០ ឆ្នាំ មកហើយ» ។
Tan បន្តថា៖ «ថ្មីៗនេះ ខ្ញុំមានអារម្មណ៍ដូចជាជើងរបស់ខ្ញុំមិនស្មើគ្នា ខណៈពេលដើរ, វាមានអារម្មណ៍ដូចជាខ្ញុំកំពុងដើរលើកប្បាស ។ លើសពីនេះ ជើង និងដៃទាំងពីររបស់ខ្ញុំ ជារឿយៗមានអារម្មណ៍ស្ពឹកតែម្តង» ។
ដោយបារម្ភអំពីស្ថានភាពបែបនេះ Tan បានទៅកាន់មន្ទីរពេទ្យ ដើម្បីស្វែងរកមូលហេតុ ។ នាងពិតជាស្លុតរន្ធត់យ៉ាងខ្លាំង នៅពេលដែលគ្រូពេទ្យបានរកឃើញថា ប្រព័ន្ធសរសៃប្រសាទឆ្អឹងខ្នងរបស់នាងបានខូចខាតក្នុងកម្រិតផ្សេងៗគ្នា បង្កជាស្ថានភាពដ៏ចម្លែកបែបនេះកើតឡើង ដែលត្រូវបានឃើញនៅលើអ្នកជំងឺទឹកនោមផ្អែម និងអ្នកខ្វះអាហារូបត្ថម្ភ ។
ការពិនិត្យបន្ថែមបានបង្ហាញថា នាងកំពុងរងទទួលនូវកង្វះវីតាមីន B12 ដ៏ធ្ងន់ធ្ងរ ដែលជាសារធាតុចិញ្ចឹមដ៏សំខាន់មួយ ដែលទទួលខុសត្រូវក្នុងការជួសជុលសរសៃប្រសាទ ។ ជាការពិត កម្រិតវីតាមីន B12 នៅក្នុងខ្លួនរបស់ Tan មានត្រឹមតែ ១០ % នៃមនុស្សមធ្យមប៉ុណ្ណោះ ។
យោងតាមអ្នកជំនាញខាងសរសៃប្រសាទនៅមន្ទីរពេទ្យ, វីតាមីន B12 ជួយការពារ និងផ្គត់ផ្គង់ការរីកចម្រើនសរសៃប្រសាទ នៅក្នុងខ្លួនមនុស្ស ។ គ្រប់អាហារទាំងអស់មានបរិមាណវីតាមីន B12 ផ្សេងៗគ្នា ហើយសាច់ជាធម្មតាមានភាគរយៈវីតាមីននេះខ្ពស់ជាង ។
ដូច្នេះ ការហូបបន្លែបួសដូច Tan គឺមានលក្ខណៈស្មុគស្មាញខ្លាំង ។ ប្រសិនសរសៃប្រសាទខូចខាតធ្ងន់ដោយសារតែកង្វះវីតាមីន B12 នោះអ្នកជំងឺប្រហែលមិនអាចដើរបាន ។ ដូចគ្នានោះដែរ ការរួញសាច់ដុំក៏អាចកើតឡើងនៅក្នុងករណីជាក់ស្តែងមួយចំនួន ។
តាមការស្រាវជ្រាវមួយនៅលើអ៊ីនធើរណេត ក៏បានបង្ហាញថា ការហូបបួសក៏ត្រូវបានផ្សារជាប់នឹងការកង្វះវីតាមីន B12 និងអាចកើតជំងឺបេះដូងផងដែរ ។ ការហូបបួសដែលមិនរាប់បញ្ចូលទឹកដោះគោ និងស៊ុត គឺងាយនឹងកើតជំងឺនេះណាស់ ។
ទោះយ៉ាងណា នៅពេលនេះ គេក៏ពុំដឹងច្បាស់ថា តើវេជ្ជបណ្ឌិតនឹងមានវិធីព្យាបាលអ្វី ឬ ចេញវេជ្ជបញ្ជាសម្រាប់ Tan ទេ ប៉ុន្តែ គេសង្ឃឹមថា ការខូចខាតសរសៃប្រសាទរបស់នាង នឹងអាចត្រឡប់មកវិញ ហើយថានាងអាចជាសះស្បើយទាំងស្រុងពីស្ថានភាពនេះ ៕ ចន្ទី
