ព្រះសីហនុ៖មន្ត្រីអង្គការក្រៅរដ្ឋាភិបាល និង ប្រជាពលរដ្ឋមួយចំនួន រស់នៅខេត្តព្រះសីហនុ បានស្នើដល់ថ្នាក់ដឹកនាំ អង្គភាពប្រឆាំងអំពើពុករលួយ និង អគ្គនាយកដ្ឋានគយ និងរដ្ឋាករកម្ពុជា ឲ្យបញ្ជូនមន្ត្រីចុះស៊ើបអង្កេត ទៅលើសកម្មភាព របស់មន្ត្រីគយប្រចាំការ នៅតាមច្រកកំពងផែនានាទាំងរដ្ឋ និងឯកជន ដែលសង្ស័យអាចមានមន្ត្រីគយខ្លះ អាចមានជាប់ពាក់ព័ន្ធបទល្មើសបើកដៃឲ្យឈ្មួញ នាំចូលទំនិញគេចពន្ធខុសច្បាប់ ជាថ្នូរទទួលបានសំណូកពុករលួយពលរដ្ឋមានលំនៅឋានក្បែរកំពង់ផែទំនប់រលក ស្ថិតក្នុងសង្កាត់លេខ១ ក្រុងព្រះសីហនុ បានអះអាងឲ្យអ្នកយកព័ត៌មាន CEN.COM.KH ប្រចាំខេត្តព្រះសីហនុដឹងថា ទំនិញគេចពន្ធជាច្រើនប្រភេទ រួមមាន៖ ម៉ូតូសេរីទំនើបៗ សំភារៈសំណង់ ភេសជ្ជៈកំប៉ុង ឬដប ស្រាបៀ គ្រឿងសំអាង ឬគ្រឿងសំអាតកាយ គ្រឿងអេឡិចត្រូនិច និងទូរស័ព្ទដៃសេរីទំនើបៗជាដើម ទំនងជាត្រូវបានគេលួចនាំចូលតាមចក្រកំពង់ផែទាំងកំពង់ផែរដ្ឋ និងកំពង់ផែឯកជននាមូលដ្ឋាននេះ។ ក្នុងនោះអាចមានជាប់ពាក់ព័ន្ធ កំពង់ផែឯកជនទំនប់រលក ឬហៅថា ផែលោក សូ ជុងហ៊ួរ និងកំពង់ផែឯកជនមួយចំនួនទៀត នៅស្រុកស្ទឹងហាវ។
ក្រុមអាជីវករ និងកម្មករបំរើការងារនៅផែមួយចំនួន បានអះអាងថា កំពង់ផែទំនប់រលក ឬហៅថា ផែលោក សូ ជុងហ៊ួរ អាចមានសកម្មភាពនាំចូលទំនិញគេចពន្ធខុសច្បាប់អនាធិបតេយ្យច្រើន ព្រោះសង្កេតឃើញថា រាល់ថ្ងៃនេះ ទំនិញនាំចូលតាមច្រកកំពង់ផែនេះភាគច្រើន មិនត្រូវបានមន្ត្រីការិយាល័យគយ និងរដ្ឋាករ ព្រមទាំងសមត្ថកិច្ចពាក់ព័ន្ធ ប្រចាំការនៅកំពង់ផែនេះ ធ្វើការត្រួតពិនិត្យ ឲ្យបានត្រឹមត្រូវទេ។
ពួកគេកត់សម្គាល់ថា ជារៀងរាល់ថ្ងៃទំនិញ ដែលដឹកតាមរថយន្តសណ្តោងធំៗ និងមានបិទបាំងជិត មិនត្រូវបានមន្ត្រីគយ និសមត្ថកិច្ចប្រចាំការ នៅច្រកកំពង់ផែទំនប់រលកនេះ ត្រួតពិនិត្យឲ្យបានដិតដល់នោះទេ។
ករណីនេះ ប្រជាពលរដ្ឋសង្ស័យថា ទំនិញនាំចូលតាមច្រកកំពង់ផែនានា ក្នុងមូលដ្ឋានខេត្តព្រះសីហនុ ទំនងជាអាចលួចនាំចូលគេចពន្ធខុសច្បាប់អនាធិបតេយ្យ ដែលមន្ត្រីគយ និងសមត្ថកិច្ចពាក់ព័ន្ធ ប្រចាំការនៅកំពង់ផែមួយចំនួននោះ បានឃុបឃិតជាមួយឈ្មួញ ជាថ្នូរចែកផលប្រយោជន៍ឲ្យគ្នាទៅវិញទៅមក ដោយមិនបានត្រួតពិនិត្យទំនិញនាំចូលតាមច្រកកំពង់ផែនីមួយៗឲ្យបានដិតដល់ជាដើម។
ករណីនេះ ប្រជាពលរដ្ឋ និងមន្ត្រីរាជការថ្នាក់ទាបមួយចំនួនរស់នៅខេត្តព្រះសីហនុ បានសំណូមពរ ដល់ លោក គុណ ញឹម អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា ពិសេសលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ឲ្យបញ្ជូនមន្ត្រីចុះស៊ើបអង្កេត និងស្រាវជ្រាវលើករណីបទល្មើសនាំទំនិញគេចពន្ធ តាមច្រកកំពង់ផែទំនប់រលក និងច្រកកំពង់ឯកជនមួយចំនួនទៀត នាស្រុកស្ទឹងហាវខេត្តព្រះសីហនុ ឲ្យដិតដល់ ដើម្បីទប់ស្កាត់អំពើពុករលួយ ដែលនាំឲ្យបាត់បងប្រាក់ចំណូលថវិកាជាតិនាថ្ងៃអនាគត។
ទាក់ទិនបញ្ហានេះដែរ អ្នកឃ្លាំមើលផែនការអភិវឌ្ឍសង្គមមួយចំនួន ប្រចាំខេត្តព្រះសីហនុ រួមមាន៖ គមអាដហុក និងអង្គការលីកាដូជាដើម ក៏បានស្នើដល់ថ្នាក់ដឹកនាំស្ថាប័នប្រឆាំងអំពើពុករលួយ និងអគ្គនាយកដ្ឋានគយ និងរដ្ឋាករកម្ពុជា ឲ្យបញ្ជូនមន្ត្រីចុះស្រាវជ្រាវលើករណីចោទប្រកាន់ ទៅលើបទល្មើសឃុបឃិត នាំចូលទំនិញគេចពន្ធតាមចក្រកំពង់ផែមួយចំនួននាខេត្តព្រះសីហនុ ដើម្បីបង្កើនចំណូលជាតិ។
លោកស្រី ជៀប សុធារី អ្នកសម្របសម្រួលសមាគមអាដហុក ប្រចាំខេត្តព្រះសីហនុ ផ្តល់សម្ភាសឲ្យអ្នកយកព័ត៌មាន CEN.COM.KH ប្រចាំខេត្តព្រះសីហនុដឹង នៅរសៀលថ្ងៃអាទិត្យ ទី២៩ ខែតុលាថា ធ្លាប់បានទទួលព័ត៌មានជុំវិញបទល្មើសនាំចូលទំនិញគេចពន្ធ ត្រូវឈ្មួញនាំចូលតាមចក្រកំពង់ផែមួយចំនួន ពិសេសកំពង់ផែឯកជនរួមមាន ផែទំនប់រលក ឬផែសូ ជុងហ៊ួរ និងកំពង់ផែឯកជននៅស្រុកស្ទឹងហាវជាដើម។
ផ្តើមពីបញ្ហានេះ លោកស្រី សុធារី បានស្នើដល់ថ្នាក់ដឹកនាំស្ថាប័នប្រឆាំងអំពើពុករលួយ និងស្ថាប័នពាក់ព័ន្ធ រួមមាន៖ អគ្គនាយកដ្ឋានគយ និងរដ្ឋាករកម្ពុជាជាដើម ត្រូវបញ្ជូនមន្ត្រីចុះស្រាវជ្រាវ និងឈានទៅនាំខ្លួន មន្ត្រីគយ ឬមន្ត្រីស្ថាប័នពាក់ព័ន្ធដទៃទៀត ដែលប្រចាំការនៅតាមច្រកកំពង់ផែនីមួយៗឲ្យបានឆាប់។
មន្ត្រីឃ្លាំមើលសង្គមរូបនេះ បន្តថា បើរកឃើញកំហុសឆ្គង ទៅលើមន្ត្រីមួយចំនួន ដែលបានឃុបឃិតជាមួយឈ្មួញ ជាថ្នូរទទួលបានសំណូកពុករលួយ ហើយអនុញ្ញាត ឲ្យនាំចូលទំនិញគេចពន្ធខុសច្បាប់ ចូលតាមច្រកកំពង់ផែនីមួយៗ ត្រូវកសាងសំណុំរឿងបុគ្គលទាំងនោះ បញ្ជូនទៅកាន់តុលាការផ្តន្ទាទោសឲ្យបានធ្ងន់ធ្ងរ ដើម្បីជាការព្រមាន។
ទោះជាបែបនេះក្តី លោកស្រី ជៀប សុធារី បានទទួលស្គាល់ថា កន្លងមកបានឃើញសមត្ថកិច្ចស្ថាប័នជំនាញខ្លះ មានស្ថាប័នគយ និងរដ្ឋាករខេត្តព្រះសីហនុ បានសហការជាមួយកម្លាំងនគរបាល និងកងរាជអាវុធហត្ថខេត្តនេះ បានចុះត្រួតពិនិត្យរកឃើញម៉ូតូ និងសម្ភារៈប្រើប្រាស់មួយចំនួន ត្រូវឈ្មួញបាននាំចូល និងដាក់លក់នៅតាមហាងមួយចំនួន នាខេត្តព្រះសីយនុ ដោយមិនបានបង់ពន្ធនាំចូល និងចាប់ផាកពិន័យបង់ពន្ធជូនរដ្ឋបានជាច្រើនករណីជាបន្តបន្ទាប់មកនេះ។
CEN.COM.KH មិនទាន់អាចទាក់ទង លោក ទុំ ណូ ប្រធានសាខាគយ និងរដ្ឋាករខេត្តព្រះសីហនុ និងមិនទាន់អាចទាក់ទង លោក ឡឹង សុភាព ប្រធានការិយាល័យគយ និងរដ្ឋាករផែទំនប់រលក ឬហៅថា ផែសូ ជុងហ៊ួរ ដើម្បីបំភ្លឺតាមទូរស័ព្ទ ទៅលើករណីចោទប្រកាន់ដែលថា មានបទល្មើសនាំចូលទំនិញគេចពន្ធអនាធិបតេយ្យ ត្រូវគេលួចនាំចូលតាមច្រកកំពង់ផែមួយចំនួន មានផែទំនប់រលកជាដើម ដោយមានាករឃុបឃិត រវាងមន្ត្រីគយ និងសមត្ថកិច្ចជំនាញប្រចាំការ នៅតាមច្រកកំពង់ផែចំនួន បាបឃុបឃិតជាមួយឈ្មួញ ជាថ្នូរចែកផលប្រយោជន៍ឲ្យគ្នាទៅវិញទៅមក ហើយអនុញ្ញាត ឲ្យឈ្មួញនាំចូលទំនិញគេចពន្ធ បានទេ នៅរសៀលថ្ងៃអាទិត្យ ទី២៩ ខែតុលា ឆ្នាំ២០១៧៕ ដោយ៖ សត្យា