នេះជារឿងមួយដ៏ភ្ញាក់ផ្អើលតែម្តង ខណៈបានដឹងថា បុរសវ័យក្មេងរូបរាងស្រស់សង្ហាម្នាក់ បានបង្កើតសេវាទទួលជូនស្រីៗ ដែលពុំមានមិត្តប្រុស ទៅកាន់ទីកន្លែងដែលពួកគេចង់ទៅ។ ហើយជាមួយសេវាដ៏ចម្លែកនេះផងដែរ ដំបូងៗ មនុស្សជាច្រើនក៏មានអារម្មណ៍គិតថា តើអ្នកណាឆ្កួតទៅដើរលេងជាមួយមនុស្សមិនដែលស្គាល់គ្នាសោះយ៉ាងម៉េចទៅ?។
តែទោះយ៉ាងណា សេវាកម្មនេះ បន្ទាប់មកមានការចាប់អារម្មណ៍ ដោយនារីម្នាក់បានជួលប្រុសស្អាតរូបនោះ អមដំណើរដើរលេងកម្សាន្ត និងព្រមទាំងធ្វើបុណ្យជាមួយគ្នាតាមខេត្ត រយៈពេល ៦ ថ្ងៃ ៥ យប់។
នារីខាងលើដែលមានគណនីហ្វេសប៊ុកឈ្មោះ Warada Pattananon បានបញ្ចេញឲ្យដឹងថា នាងបានជួលម្ចាស់ផេកឈ្មោះ ‘Let me be your friend, Ubon Ratchathani’ ដែលផ្តល់សេវាកម្មនេះ ដើម្បីដើរលេងកម្សាន្ត ព្រោះនាងនៅទៅម្នាក់ឯង គឺមិនងាយស្រួលក្នុងការបើកបរនោះទេ ហើយម្យ៉ាងទៀត នាងត្រូវធ្វើកិច្ចការងារច្រើន ក្នុងការបញ្ជូនឯកសារអេឡិចត្រូនិចជាប់រហូត។
នាងបានបន្តថា «ម្ចាស់ផេកនេះ គឺជាមនុស្សដ៏ល្អ ដោយគាត់យកចិត្តទុកដាក់និងជួយខ្ញុំគ្រប់បែបយ៉ាង។ គាត់ត្រូវធ្វើការឲ្យខ្ញុំច្រើន ដោយចូលគេងយប់ៗជ្រៅ និងក្រោកពីព្រលឹមទៀតផង។ ជាចុងក្រោយ នាងបានប្រាប់ថា ប្រសិនបើអ្នកអត់មានគ្នាទៅជាមួយ សូមយកគាត់ធ្វើជាមិត្តភក្តិទៅ មិនខកបំណងនោះទេ។
គួរបញ្ជាក់ឲ្យដឹងផងដែរថា នៅលើផេកប្រុសស្អាត ‘Let me be your friend, Ubon Ratchathani’ គឺមានដាក់តម្លៃសេវាជូនដើរលេង ដោយគិតថ្លៃ ២០០ បាត ក្នុងរយៈពេល ២ ម៉ោង ហើយប្រសិនជួលពេញ១ថ្ងៃ គិតតម្លៃ ១០០០ បាត៕ រក្សាសិទ្ធិដោយ៖ លឹម ហុង