បន្ទាយមានជ័យ ៖ អាវុធហត្ថក្រុងប៉ោយប៉ែត្រ ខេត្តបន្ទាយមានជ័យ បានឲ្យដឹងថា មានករណីមនុស្សស្រីចងកសម្លាប់ខ្លួន នៅក្នុងបន្ទប់៤៩ ជាន់ទី៤ ក្នុងផ្ទះសំណាក់សុផល ថាវី កាលពី ថ្ងៃទី១៦ ខែមេសា ឆ្នាំ២០១៨ វេលាម៉ោង១៦និង៣០នាទី ស្ថិតនៅភូមិក្បាល ស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។
ក្រោយពីបានទទួលព័ត៌មានពីម្ចាស់ផ្ទះសំណាក់សុផល ថាវី កម្លាំងអាវុធហត្ថក្រុងបានចុះទៅត្រួតពិនិត្យកន្លែងកើតហេតុ ឃើញមាន ទ្វារបន្ទប់បិទជិត ចាក់សោពីខាងក្នុង នៅក្នុងបន្ទប់មានសាកសពជនរងគ្រោះឈ្មោះ ជិន ពិសី ភេទស្រី អាយុ២៤ឆ្នាំ ជនជាតិខ្មែរ មានទីលំនៅភូមិស្រះជ្រៃ ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តមានជ័យ ។
តាមការពិនិត្យសាកសព ឃើញថា៖ ក្បាលពុំមានស្លាកស្នាមអ្វីទេ បំពង់កមាន ស្នាមរឹតនឹងកន្សែងពោះគោ បំពង់កផ្នែកខាងលើបែក ដងខ្លួនពុំមានស្លាកស្នាមអ្វីទេ អវយវៈចុងដៃ ចុងជើង មានស្នាមស្រុងឈាម ចុងកំភួនដៃខាងឆ្វេង មានស្នាមឆូតប្រវែង ៤សង់ទីម៉ែត្រ បិតបង់ ។
តាមការសន្និដ្ឋានសាកសពិតជាស្លាប់ដោយសារចងកធ្វើអត្តឃាត ។ ប៉ុន្តែសមត្ថកិច្ច នៅពុំទាន់បញ្ជាក់អំពីមូលហេតុករណីនេះទេ កំពុងស្ថិតក្នុងដំណាក់កាលស្រាវជ្រាវនៅឡើយ៕ ដោយ ៖ បញ្ញាស័ក្តិ