ភ្នំពេញ ៖ ដោយកម្ពុជាទទួលរងនូវឥទ្ធិពលរបស់សម្ពាធទាប បង្កឱ្យមានភ្លៀងធ្លាក់ពីមធ្យមទៅច្រើន ក្នុងក្របខ័ណ្ឌស្ទើរទូទាំងប្រទេស នៅតាមតំបន់ជាច្រើននៃខេត្តបាត់ដំបង បន្ទាយមានជ័យ និងខេត្តពោធិ៍សាត់ កោះកុង ស្វាយរៀង ព្រៃវែង ប៉ៃលិន ជាដើម បានទទួលភ្លៀងកក់ខែ ក្នុងកម្រិតពីខ្សោយទៅបង្គួរ នារសៀលថ្ងៃទី ១៧ ខែមេសា នេះ ដោយក្នុងនោះ ផ្ទះប្រជាពលរដ្ឋជាច្រើនខ្នងបានដួលរលំ។
បើតាមក្រសួងធនធានទឹកនិងឧតុនិយម បានឲ្យដឹងថា នាវេលាម៉ោងប្រមាណ ៤:២០ នាទីរសៀលថ្ងៃទី ១៧ ខែមេសា មានកើតឡើងនូវបាតុភូតខ្យល់កន្ត្រាក់ នៅចំណុចភូមិទួលច្រេស ឃុំចំបក់ ស្រុកស្វាយជ្រំ ខេត្តស្វាយរៀង បណ្តាលឱ្យផ្ទះប្រជាពលរដ្ឋចំនួន ៣ ខ្នង ដួលរលំ និង ២ ខ្នងផ្សេងទៀត របើកដំបូល ។
ផ្ទះប្រជាពលរដ្ឋ ចំនួន ១ ខ្នង ស្ថិតក្នុងឃុំថ្កូវ ស្រុកកំពង់ត្របែក ខេត្តព្រៃវែង បានរងការខូចខាតយ៉ាងដំណំ ដោយសារខ្យល់កន្ត្រាក់វាយបោកបក់ នាល្ងាចថ្ងៃទី ១៧ ខែមេសា ។
ភ្លៀងកក់ខែមួយមេធំ រយៈពេលប្រមាណ ២ ម៉ោង ដែលកម្រិតពី ៧៧-៩៥ មិល្លីម៉ែត្រ នារសៀលថ្ងៃទី ១៧ ខែមេសា នេះ បានបង្កឱ្យទឹកស្ទឹងប៉ៃលិន ក៏ដូចជា ទឹកនៅបណ្តាអូរមួយចំនួនក្នុងខេត្តប៉ៃលិន ហក់ឡើងពេញព្រៀប ។ ពេលនេះ ភ្លៀងនៅបន្តធ្លាក់ស្រិចៗនៅ ឡើយ ។
ក្រសួងធនធានទឹក និងឧតុនិយម បានចេញសេចក្តីជូនដំណឹង អំពីបញ្ហាអាកាសធាតុនៅកម្ពុជា ដោយបានបញ្ជាក់ថា ចាប់ពីថ្ងៃទី១៥ ដល់ថ្ងៃទី២២ ខែមេសា ឆ្នាំ២០១៨ កម្ពុជាទទួលរងឥទ្ធិពលរបស់សម្ពាធទាប នឹងបង្កឱ្យមានភ្លៀងធ្លាក់ពីមធ្យមទៅច្រើន ក្នុងក្របខ័ណ្ឌស្ទើរទូទាំងប្រទេស។
ក្រសួងធនធានទឹក បានឲ្យដឹងទៀតថា សូមបងប្អូនប្រុងប្រយ័ត្ន ចំពោះបាតុភូត ផ្គរ រន្ទះ និងខ្យល់កន្ត្រាក់ នៅពេលមេឃរកកលភ្លៀង ជាពិសេសបណ្តាខេត្ត នៅតំបន់ទំនាបកណ្តាលភាគពាយ័ព្យ ចាប់ពីថ្ងៃទី១៥ ដល់ថ្ងៃទី១៧ ខែមេសា ឆ្នាំ២០១៨៕ ដោយ៖បញ្ញាស័ក្តិ
