រាជធានីភ្នំពេញ ៖ នារីស្រស់ស្អាតម្នាក់ត្រូវបានជនដៃដល់ សម្លាប់នៅក្នុងផ្ទះលេខ៣៦៥ ផ្លូវលេខ១៦៣ ដែលមានទីតាំងស្ថិតនៅក្នុងសង្កាត់ផ្សារដើមថ្កូវ ខណ្ឌចំការមន កាលពីវេលាម៉ោង១០ព្រឹក ថ្ងៃទី១៧ ខែមេសា ឆ្នាំ២០១៨។
សមត្ថកិច្ចមូលដ្ឋាន បានឲ្យដឹងថា នារីរងគ្រោះ ត្រូវបានគេប្រទះឃើញ ដេកស្លាប់ដោយមានស្នាមខ្សែរឹតក និងក្បាលមានស្នាមបែកយ៉ាងធំ មើលលែងចង់ស្គាល់ទៅហើយ។
នារីរងគ្រោះត្រូវបានគេប្រាប់ថា មានកូនប្រុស២នាក់ ឈ្មោះ រិទ្ធិ រាជ្យ អាយុ៥ឆ្នាំ និង ឈ្មោះរិទ្ធិសក្តិ អាយុ៣ឆ្នាំ ហើយខណៈពេលនេះ សមត្ថកិច្ចកំពុងតែធ្វើការពិនិត្យ និងស្រាវជ្រាវរកមើលថា តើនេះជាករណីឃាតកម្មប្លន់យកទ្រព្យសម្បត្តិ ឬយ៉ាងណា ដោយពិនិត្យឃើញថា សពបានបាត់ចិញ្ជៀន ខ្សែក ខ្សែដៃ។ បន្ទាប់ពីពិនិត្យរួច សមត្ថកិច្ចបានប្រគល់សាកសព ទៅឲ្យក្រុមគ្រួសារយកទៅធ្វើបុណ្យ នៅឯស្រុកកំណើត។ សមត្ថកិច្ចបានស្រាវជ្រាវ ឈានទៅដល់ការឃាត់ខ្លួនមនុស្ស២នាក់ ហើយបានយកទៅសាកសួរនៅអធិការដ្ឋានខណ្ឌចំការមន រាជធានីភ្នំពេញ ៕ ដោយ៖បញ្ឋញាស័ក្តិ
