ភ្នំពេញ ៖ មន្ត្រីក្រោមឱវាទរដ្ឋបាលរាជធានីភ្នំពេញក្នុងមុខតំណែងជានាយករងរដ្ឋបាល នាយក នាយករងទីចាត់ការ និងប្រធាន អនុប្រធានការិយាល័យក្នុងរចនាសម្ព័ន្ធរដ្ឋបាលរាជធានីភ្នំពេញសរុបចំនួន២៦នាក់ ត្រូវបានប្រកាសនាព្រឹកថ្ងៃទី១៨មេសានេះ ក្រោមអធិបតីភាពលោកឃួង ស្រេង អភិបាលនៃគណៈអភិបាលរាជធានីភ្នំពេញ។
លោកឃួង ស្រេង ក្នុងឱកាសនោះបានថ្លែងការកោតសរសើរចំពោះការខិតខំប្រឹងប្រែងរបស់បងប្អូនមន្ត្រីរាជការក្រោមឱវាទរដ្ឋបាលរាជធានីភ្នំពេញ ព្រមទាំងទទួលបានលទ្ធផលយ៉ាងល្អប្រសើរក្នុងការបម្រើ និងអភិវឌ្ឍន៍រាជធានីភ្នំពេញ។
លោកបន្តថា រដ្ឋបាលរាជធានីភ្នំពេញមានតួនាទីសំខាន់ជាប្រតិបត្តិករក្នុងការបម្រើសេវាសាធារណៈជូនប្រជាពលរដ្ឋទាំងសេវាសំណូមពរ និងសេវាតម្រូវការ។ លោកបន្តទៀតថា ជាមន្ត្រីត្រូវខិតខំពង្រឹងសមត្ថភាព មានភាពទន់ភ្លន់ រួសរាយរាក់ទាក់ជាមួយបងប្អូនប្រជាពលរដ្ឋដែលមករកសេវា។ ជាមួយគ្នានេះ ត្រូវធានាថាសេវារបស់ខ្លួនប្រកបដោយតម្លាភាព គណនេយ្យភាព។ បង្កើនសាមគ្គីភាពផ្ទៃក្នុងនិងប្រកាន់ជំហរជាអ្នកបម្រើ និងការពារផលប្រយោជន៍របស់ប្រជាពលរដ្ឋ។
លោកឃួង ស្រេង មានប្រសាសន៍ទៀតថា រដ្ឋបាលរាជធានីភ្នំពេញមានប្រព័ន្ធ Hot Line សម្រាប់ទទួលព័ត៌មានពីប្រជាពលរដ្ឋ។ តែប្រព័ន្ធ Hot Line នេះហាក់ដូចជាមិនសូវដំណើរការ ដូច្នេះត្រូវបន្តពង្រឹង Hot Line នេះឡើងវិញនៅពេលដែលប្រជាពលរដ្ឋបានងាកទៅប្រើប្រព័ន្ធFacebook។ តែទោះបីយ៉ាងណាយើងមានប្រអប់សំបុត្រដើម្បីទទួលព័ត៌មានពីប្រជាពលរដ្ឋនៅតាមសង្កាត់ ខណ្ឌ។
គួរបញ្ជាក់ថា មន្ត្រីរដ្ឋបាលរាជធានីភ្នំពេញដែលត្រូវប្រកាសតែងតាំងមានចំនួន២៦រូបនេះ រួមមាន ១ លោកស្រីសក់ ចិន្តារី ជានាយករងរដ្ឋបាលរាជធានីភ្នំពេញ លោក កែវ ពន្លក ជានាយករងរដ្ឋបាលរាជធានីភ្នំពេញ លោក សុខ ចំរើន ជានាយកទីចាត់ការទំនាក់ទំនងសាធារណៈនិងសហប្រតិបន្តិការអន្តរជាតិ លោកស្រី ដោ សម្ផស្ស ជានាយិការងទីចាត់ការរដ្ឋបាល ចំណែក២២រូបទៀត ជានាយក នាយករងទីចាត់ការនិងប្រធាន អនុប្រធានការិយាល័យ៕ ដោយ ៖ បញ្ញាស័ក្តិ