ខេត្តព្រះសីហនុ ៖ មន្ទីរទេសចរណ៍ខេត្តព្រះសីហនុ បានបង្ហាញចំនួនភ្ញៀវទេសចរជាតិអន្តរជាតិ បានចូលទៅទស្សនាខេត្តនេះ រយៈពេល ៣ថ្ងៃ ចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០១៨ មានចំនួនជាង ១៥ម៉ឺននាក់។
លោក តាំង សុចិត្រគ្រឹះស្នា ប្រធានមន្ទីរទេសចរណ៍ខេត្តព្រះសីហនុ បានឲ្យដឹងថា មានភ្ញៀវចម្រុះជាតិ ប្រមាណ១៥០.៧៨០នាក់ គឺ មានការកើនឡើង៥%។ ក្នុងនោះភ្ញៀវជាតិមានចំនួន១៤៤,២៥៥នាក់ មានការកើនឡើង៤,២ធៀបទៅនឹងឆ្នាំ២០១៧ និងភ្ញៀវអន្តរជាតិមានចំនួន៦,៥២៥មានការកើនឡើង២៥%ធៀបទៅនឹងឆ្នាំ២០១៧។
លោកបន្តថា ខេត្តព្រះសីហនុ ជាខេត្តទេសចរណ៍នាទិសនិរតី និង ជាតំបន់ទេសចរណ៍ខេត្ត៣ជាប់គ្នា ក្នុងនោះមានខេត្តព្រះសីហនុ កំពត និង កែប ។ ក្នុងនោះភ្ញៀវទេសចរ ដែលចូលមកកម្សាន្តខេត្តព្រះសីហនុ អាចបន្តដំណើរទៅលេងរម្មនីយដ្ឋានភ្នំបូកគោ ខេត្តកំពត និង អាចបញ្ចប់ដំណើរកម្សាន្តនៅខេត្តកែប ឬ មួយភ្ញៀវទេសចរអាចមកកម្សាន្តខេត្តកែប កំពត និង បញ្ចប់នៅខេត្តព្រះសីហនុ។
លោក តាំង សុចិត្រគ្រឹះស្នា បានបន្តថា ការកើនឡើងចំនួនភ្ញៀវទេសចរដោយសារមន្ទីរបានសហការជាមួយអាជ្ញាធរក្រុង ខេត្ត ផ្សព្វផ្សាយដល់បងប្អូនអាជីវករ ប្រកបអាជីវកម្មទេសចរណ៍ឲ្យចូលរួមថែរក្សាអនាម័យ បរិស្ថានអោយបានល្អ ពិសេសតារាងតម្លៃម្ហូបអាហារត្រូវសរសេរដាក់ជូនភ្ញៀវ ចៀសវាងការតម្លើងថ្លៃខ្ពស់ហួសហេតុ ធ្វើអោយខាតបង់ផលប្រយោជន៍ របស់ខ្លួននៅពេលខាងមុខទៀត។
ចំណែកបញ្ហាសន្តិសុខសណ្តាប់ធ្នាប់វិញ គឺគេសង្កេតឃើញថា មានភាពល្អប្រសើរជាងឆ្នាំមុនៗ ។ ជាពិសេសជាងនេះ ភ្ញៀវទេសចរ ដែលមកកម្សាន្តនៅខេត្តព្រះសីហនុ ក៏មានការចាប់អារម្មណ៍ចេញទៅកម្សាន្តនៅតាមបណ្តាកោះនានា រួមមាន៖ ឆ្នេរកោះរ៉ុងសន្លឹម ឆ្នេរកោះតូច ឆ្នេរសុខសាន្ត ឆ្នេរកោះព្រីង ឆ្នេរកោះឬស្សី និង មានឆ្នេរកោះផ្សេងទៀត ដែលកំពុងទាក់ទាញភ្ញៀវទេសចរយ៉ាងសំខាន់ ឲ្យចូលមកកម្សាន្តខេត្តព្រះសីហនុ មានការកើនឡើងពីមួយឆ្នាំទៅមួយឆ្នាំ។
ទាក់ទិនបញ្ហានេះដែរ លោក យន្ត មីន អភិបាលខេត្តព្រះសីហនុ មានប្រសាសន៍នៅក្នុងឱកាសបើកសម្ភោធដាក់ឲ្យដំណើរការព្រឹត្តការណ៍និរតីសង្ក្រាន្តឆ្នាំ២០១៨ ដើម្បីអបអរសាទរបុណ្យចូលឆ្នាំថ្មីប្រពៃណីជាតិខ្មែរ ឆ្នាំចសំរិទ្ធិស័កព.ស២៥៦២។ លោកបាននបញ្ជាក់ថា ការបើកសម្ភោធដាក់ឲ្យដំណើរការការងារខាងលើក្នុងគោលបំណងលើកស្ទួយវប្បធ៌មប្រពៃណីជាតិក៏ដូចជាលើកកម្ពស់កិត្យានុភាពជាតិយើងនៅលើឆាកអន្តរជាតិ ដើម្បីទាក់ទាញភ្ញៀវទេសចរជាតិអន្តរជាតិ ឲ្យចូលមកកម្សាន្តខេត្តព្រះសីហនុ ឲ្យបានច្រើនកុះករថែមទៀត។
លោកបន្តថា តាមរយៈកំណើនភ្ញៀវទេសចរ នឹងអាចជួយជំរុញដល់សកម្មភាពអភិវឌ្ឍន៍សេដ្ឋកិច្ចជាតិ ជាពិសេសវិស័យពណិជ្ជកម្ម និងវិស័យទេសចរណ៍ឲ្យកាន់តែមានភាពរីកចម្រើនថែមទៀត។
លោកអភិបាលខេត្ត យន្ត មីន បានឲ្យដឹងទៀតថា ខេត្តព្រះសីហនុជាខេត្តតំបន់ឆ្នេរមួយ ស្ថិក្នុងចំណោមខេត្តចំនួន ៣ទៀតគឺ ខេត្តកំពត ខេត្តកែប និងខេត្តកោះកុង។ ក្នុងនោះ ខេត្តព្រះសីហនុជាខេត្តតំបន់ឆ្នេរ សំបូរទៅដោយធនធានធម្មជាតិនិងមានសក្តានុពលសេដ្ឋកិច្ចលើគ្រប់វិស័យពិសេស សក្តានុពលលើវិស័យទេសចរណ៍ដោយសារខេត្តនេះ មានប្រជុំកោះជាច្រើន មានឆ្នេរសមុទ្រខ្សាច់សរស្អាត សម្បត្តិធម្មជាតិ និងភាពអំណោយផលផ្នែកភូមិសាស្ត្រជាច្រើនទៀត សម្រាប់ជាមូលដ្ឋានក្នុងការទាក់ទាញភ្ញៀវទេសចរណ៍ និងការអភិវឌ្ឍន៍ដើម្បីបង្កើនកម្រិតជីវភាពរបស់ប្រជាពលរដ្ឋក្នុងមូលដ្ឋាន។
ទន្ទឹមនេះខេត្តព្រះសីហនុ ត្រូវបានជាប់ជាសមាជិឆ្នេរសមុទ្រដែលស្អាតបំផុតនៅលើពិភពលោកក្នុងចំណោមខេត្តខាងលើ និងត្រូវបានរាជរដ្ឋាភិបាលកម្ពុជា បានប្រសិទ្ធនាមថា ជាតារារះនាទិសនិរតី។ លើសពីនេះលោកថា ខេត្តព្រះសីហនុ ក៏ត្រូវបានរាជ រដ្ឋាភិបាលចាត់ទុកនិងប្រកាសប្រែក្លាយទៅជាតំបន់សេដ្ឋកិច្ចពិសេសគំរូពហុបំណងស្របតាមគោលនយោបាយអភិវឌ្ឍន៍វិស័យឧស្សាហកម្ម កម្ពុជាឆ្នាំ២០១៥-២០២៥។
បន្ថែមលើនេះ លោក យន្ត មីន បានបង្ហាញមោទនៈភាពថា ឆ្នាំ២០១៨នេះ ក្រុង-ខេត្តព្រះសីហន ក៏ទទួលបានពានរង្វាន់ជ័យលាភី ផ្ការំដួល ៣ទងដែលជានិម្មិតរូបទីក្រុងស្អាតពីប្រមុខរាជរដ្ឋាភិបាលថែមទៀត។
លោក យន្ត មីន បានបញ្ជាក់ថាកត្តាទាំងអស់ខាងលើនេះហើយ ដែលបានជម្រុញឲ្យភ្ញៀវទេសចរមានចំនួនកើនឡើងជាបន្តបន្ទាប់ពីមួយឆ្នាំទៅមួយឆ្នាំ៕ ដែន សីមា
