រាជធានីភ្នំពេញ ៖ ឃាតករម្នាក់ដែលសម្លាប់នារីម៉ាស្សាក្នុងផ្ទះម្តុំផ្សារដើមថ្កូវ ត្រូវចាប់ខ្លួនបាន នៅម៉ោង១រសៀលថ្ងៃទី១៨ មេសានេះ ដោយបាននាំខ្លួនទៅសាកសួរនៅអធិការដ្ឋាននគរបាលខណ្ឌចំការមន ។
ឃាតករឈ្មោះ ហុង សុខហេង អាយុ៤១ឆ្នាំ ជាអ្នកកាន់ឡស្ទីម និងត្រូវជាពូថៅកែហាងម៉ាស្សាKS ដោយបានសម្លាប់នាងប្លន់យកខ្សែក ខ្សែដៃ ទូរស័ព្ឌ និងស្បែកជើងពីនារីរងគ្រោះ ប៉ុន្តែសមត្ថកិច្ចបានដកហូតវត្ថុតាងមួយចំនួនមកវិញ ។
គួររំលឹកថា នារីរងគ្រោះ ឈ្មោះសួង លីនណា អាយុ៣១ឆ្នាំ ជានារីម៉ាស្សា នៅហាងមួយកន្លែងក្បែររង្វង់មូលផ្សារដើមថ្កូវ (ជិតកន្លែង កើតហេតុ) និងមានស្រុកកំណើតនៅភូមិភ្នំសំពៅខាងកើត ឃុំភ្នំសំពៅ ស្រុកបាណន់ ខេត្តបាត់ដំបង ។ នារីរងគ្រោះជាស្ត្រីមេម៉ាយ មានកូនប្រុសតូចៗ២នាក់ ។ នារីម៉ាស្សាម្នាក់ត្រូវឃាតករវាយសម្លាប់យ៉ាងព្រៃផ្សៃកាលពីព្រឹកថ្ងៃទី១៧ មេសា ស្ថិតក្នុងបន្ទប់ជាន់ទី១ ផ្ទះលេខ៣៦៥ (ក្បែររង្វង់មូលផ្សារដើមថ្កូវ) ផ្លូវលេខ១៦៣ ភូមិ២ ក្រុម១៦ ក្នុងសង្កាត់ ផ្សារដើមថ្កូវ ខណ្ឌចំការមន ៕ ដោយ៖បញ្ញាស័ក្តិ
