យន្តហោះ Boeing 737 មានលេខសម្គាល់ 1380 របស់ក្រុមហ៊ុន Southwest Airlines អាមេរិក កាលពីថ្ងៃទី ១៧ ពេលកំពុងហោះហើរឆ្លងកាត់បុរីញូយ៉ក បានផ្ទុះម៉ាស៊ីនមួយគ្រឿង ហើយបំណែករបស់វាបានធ្វើឲ្យតួយន្តហោះរងការខូចខាតយ៉ាងធ្ងន់ធ្ងរ ព្រមទាំងបណ្តាលឲ្យមនុស្សម្នាក់ស្លាប់ ៧នាក់ រងរបួស ។ ហើយយន្តបានចុះសំចតនៅអាកាសយាន្តដ្ឋាន Philadelphia ។
អ្នកដំណើរកំពុងត្រូវបានដកដង្ហើមដោយអុកស៊ីហ្សែន បន្ទាប់ពីម៉ាស៊ីនយន្តហោះផ្ទុះធ្វើឲ្យបែកកញ្ចក់បង្អួច
តាមគណៈកម្មការសុវត្ថិភាពគមនាគមអាមេរិក (NTSB) ឲ្យដឹងថា យន្តហោះជួបគ្រោះអាសន្ននេះបាននឹងកំពុងផ្ទុកមនុស្ស ១៤៩នាក់ ។ រីឯជនរងគ្រោះ Jennifer Riordan គឺជានាយកធនាគារ Wells Fargo នៅ New Mexico មានកូនពីរនាក់ ។ ឥន្ធនៈដែលជ្រាបចេញពីម៉ាស៊ីនមួយ ពេលកំពុងចុះសំចតបន្ទាន់ ត្រូវបានពន្លត់ទាន់ពេល មុនគ្រាដែលវាឆេះរាលដាល ។
អ្នកដំណើរឈ្មោះ Amy Serafini និង Hollie MacKay ដែលអង្គុយនៅពីក្រោយជនរងគ្រោះឲ្យដឹងថា ក្រោយពេលដែលលាន់ស្នូរផ្ទុះកញ្ចក់យន្តហោះ ដែលជនរងគ្រោះអង្គុយបានបែក ហើយវាបានស្រូបនាងចេញតាមប្រឡោះនោះ បុរសមាឌធំពីររូប និងអ្នកដំណើរផ្សេងទៀតបានប្រឹងអូសទាញស្ត្រីរងគ្រោះរូបនេះ ឲ្យចូលមកក្នុងយន្តហោះវិញ បន្ទាប់មកទោះបីគ្រូពេទ្យបានប្រឹងប្រែងធ្វើឲ្យបេះដូងលោតឡើងវិញ ប៉ុន្តែបរាជ័យ ។ អ្នកដំណើរដដែលនិយាយថា ឈាមខ្ទាតពេញយន្តហោះមនុស្សទាំងអស់ស្ទើរតែឆ្កួត ហើយនាំគ្នាស្រែកខ្លាំងៗ ។
កញ្ចក់បង្អួចយន្តហោះ បានត្រូវបែកខ្ទេច រួចស្រូបទាញស្ត្រីម្នាក់ចេញក្រៅ តែអ្នកដំណើរបានរួមគ្នាទាញគាត់ចូលវិញ ។
ទិដ្ឋភាពក្នុងយន្តហោះ
តាមទិន្នន័យពីគេហទំព័រ FlightAware.com ឲ្យដឹងថា ជើងហោះហើរលេខ ១៣៨០នេះ កំពុងឆ្ពោះទៅប៉ែកខាងលិច ពេលហោះហើរឆ្លងកាត់តំបន់ភាគខាងត្បូងបុរី New York ។ យន្តហោះស្ថិតនៅកម្ពស់ 9.800m ហើយស្ថិតក្នុងល្បឿន ៨០០kh/h បច្ចុប្បន្នអាជ្ញាធរកំពុងបើកការស៊ើបអង្កេត ។
ម៉ាស៊ីនយន្តហោះផ្ទុះដែលបំណែករបស់វាខ្ទាតធ្វើឲ្យខូចខាតតួយន្តហោះមួយផ្នែក និងធ្វើឲ្យបែកកញ្ចក់យន្តហោះបណ្តាលឲ្យមនុស្សម្នាក់ស្លាប់៕
