ខេត្តកណ្តាល ៖ នៅ ថ្ងៃទី១៨ ខែមេសា ឆ្នាំ២០១៨ លោក អ៊ី សុវណ្ណ ចៅក្រមសើបសួរសាលាដំបូងខេត្តកណ្តាល បានសម្រេចចេញដីការឃុំខ្លួន ស្ត្រីឈ្មោះ កែវ រតនៈ ហៅចែហ្គិចបានធ្វើសកម្មភាពយកសាំង ទៅចាក់ដុតក្នុងរោងចក្រផលិតគ្រឿងសង្ហារឹម និងក្តារកុងផ្លាកេមួយកន្លែង យីហោ “ប្រាយវ៉េរ ហ្វើនីឈ័រ” ដែលត្រូវគេដឹងថា ជារោងចក្រប្តីរបស់ខ្លួន បណ្តាលឱ្យមានការឆាបឆេះសន្ធោសន្ធៅ។
ជនត្រូវចោទចែហ្គិច ធ្លាប់មានរឿងអាស្រូវជាច្រើននិងធ្លាប់ជាប់ពន្ធនាគារផងនោះ ត្រូវបាន សមត្ថកិច្ច បញ្ជូនទៅ ដាក់ពន្ធនាគារ ខេត្តកណ្តាល ជាបណ្តោះអាសន្ន រង់ចាំបើកសវនាការបន្តទៀត។ ស្ត្រីជើងខ្លាំងឈ្មោះ កែវ រតនៈ ហៅ ចែហ្គិចរូបនេះ ត្រូវបានលោក ឯក ស៊ុនរស្មី ព្រះរាជអាជ្ញារងអមសាលាដំបូងខេត្តកណ្ដាល ចោទប្រកាន់ពីបទ ប្រើប្រាស់ឯកសារសាធារណៈក្លែង បទគំរាមកំហែងថានឹងសម្លាប់ និងបទធ្វើឱ្យខូចខាតដោយចេតនាមានស្ថានទម្ងន់ទោសដោយសារការប្រើប្រាស់វិធីគ្រោះថ្នាក់ដល់បុគ្គល ប្រព្រឹត្តនៅចំណុចរោងចក្រផលិតគ្រឿងសង្ហារឹម និងក្តាកុងផ្លាកេ ប្រាយវ៉េ ហ្វើនីឈ័រ ភូមិទឹកជា ឃុំពើក ស្រុកអង្គស្នូល ខេត្តកណ្តាល កាលពីអំឡុងឆ្នាំ២០១៨ តាមមាត្រា៧៨ច្បាប់ស្ដីពីចរាចរណ៍ផ្លូវគោក និងតាមមាត្រា៦៣០ មាត្រា២៣៣ មាត្រា៤១៣នៃក្រមព្រហ្មទណ្ឌ។
ស្ត្រីជើងខ្លាំងនេះ បានធ្វើសកម្មភាពយកសាំងចំនួន២កាន ទៅចាក់ដុតក្នុងរោងចក្រផលិតគ្រឿងសង្ហារឹម និងក្តារកុងផ្លាកេមួយកន្លែង យីហោ “ប្រាយវ៉េរ ហ្វើនីឈ័រ” ដែលត្រូវគេដឹងថា ជារោងចក្រប្តីរបស់ខ្លួន បណ្តាលឱ្យមានការឆាបឆេះសន្ធោសន្ធៅ កាលពីវេលាម៉ោង១០ព្រឹក ថ្ងៃទី១៦ ខែមេសា ឆ្នាំ២០១៨ នៅចំណុចឃុំពើក ស្រុកអង្គស្នួល។ ទីបំផុត ក្រោយពីគេចខ្លួនបានតែប៉ុន្មានម៉ោង ត្រូវអាវុធហត្ថរាជធានីភ្នំពេញចុះឃាត់ខ្លួន។
ឈ្មោះកែវ រតនៈ ហៅហ្គិច អាយុ៣៨ឆ្នាំ មុខរបរមេផ្ទះ សព្វថ្ងៃស្នាក់នៅផ្ទះលេខ១៤ ផ្លូវ២៦៥ សង្កាត់ទឹកល្អក់៣ ខណ្ឌទួលគោក មានប្តីឈ្មោះហុង ម៉ុងហេង និងមានកូន២នាក់ក្នុងបន្ទុក។
ក្រោមវិធានការជំនាញរបស់សមត្ថកិច្ចអាវុធហត្ថរាជធានីភ្នំពេញ ស្ត្រីជើងខ្លាំងឈ្មោះកែវ រតនៈ ហៅ ហ្គិច ព្រមសារភាពថា រូបនាងពិតជាបានចាក់សាំងដុតឈើកៅស៊ូក្នុងរោងចក្រ ប្រាយវ៉េរ ហ្វើនីឈ័រ ដែលជាកម្មសិទ្ធិរបស់ប្តីនាងពិតប្រាកដមែន ព្រោះតែរូបនាងមានទំនាស់ក្នុងគ្រួសារ ហើយប្តីនាងមិនព្រមចូលផ្ទះ ដើម្បីដោះស្រាយគ្នា ទើបនាងសម្រេចចិត្តទៅដុតឈើកៅស៊ូក្នុងរោងចក្ររបស់ប្តីនាងតែម្តង៕ ដោយ៖បញ្ញាស័ក្តិ