ព្រៃវែង៖សមត្ថកិច្ចនគរបាលខេត្តព្រៃវែង បានស្រាវជ្រាវឈានដល់ឃាត់ខ្លួនជនសង្ស័យម្នាក់ ដែលបានចាប់រំលោភសម្លាប់កុមារីម្នាក់ក្នុងចេតិយ ។ ជនដៃដល់រូបនេះ នាពេលកន្លងមក ក៏ធ្លាប់ចាប់រំលោភបងស្រី របស់ក្មេងរងគ្រោះផងដែរ ហើយត្រូវបានសម្របសម្រួលគ្នាដោយលួចលាក់ស្ងាត់ៗជាថ្នូរនឹងថវិកាមួយចំនួន។
នគរបាលមូលដ្ឋានខេត្តព្រៃវែង បានប្រាប់ឲ្យដឹងថា ជនសង្ស័យឈ្មោះ ពេជ ពិសី ភេទប្រុស អាយុ២៥ឆ្នាំ រស់នៅភូមិសទ្ធា ឃុំរំចេក ស្រុកព្រះស្ដេច ខេត្តព្រៃវែង ត្រូវបានឃាត់ខ្លួន នៅរសៀលថ្ងៃទី១៨ ខែមេសា ឆ្នាំ២០១៨ នៅចំណុចភូមិរបស់ខ្លួន។
នៅក្នុងដំណាក់កាលសមត្ថកិច្ច ជនសង្ស័យម្នាក់នេះ បានសារភាពថា ពិតជាបានចាប់ រំលោភកុមារីរងគ្រោះ ឈ្មោះ ចាន់ ស្រីជេត ភេទស្រីអាយុ៥ឆ្នាំនៅភូមិសទ្ធាឃុំរំចេក ស្រុកព្រះស្តេច ក្នុងចេតិយវត្តសន្ធោ រួចច្របាច់កសម្លាប់ យកសពបោះចោល ក្នុងស្រះទឹក ពិតប្រាកដមែន។
ជនសង្ស័យបានសារភាពបន្តថា កាលពីឆ្នាំ២០១៧ ធ្លាប់បានចាប់រំលោភ បងបង្កើតរបស់ជនរងគ្រោះម្ដង រួចមកហើយ ដែលនាងទើបអាយុ១០ឆ្នាំ ប៉ុន្តែកាលណោះ ជនសង្ស័យនិងគ្រួសាររងគ្រោះ បានសម្របសម្រួលគ្នាស្ងាត់ៗ មិនឲ្យសមត្ថកិច្ចដឹង លុះដល់ពេលនេះទៀត ស្រាប់តែជននេះ មករំលោភសម្លាប់ប្អូនស្រីម្តងទៀត។
កុមារីរងគ្រោះឈ្មោះ ចាន់ ស្រីជេត អាយុ៥ឆ្នាំ នៅភូមិសទ្ធាឃុំរំចេក ស្រុកព្រះស្តេច ត្រូវបានជនដៃដល់ រំលោភសម្លាប់នៅចំណុចក្នុងចេតិយ មាត់ស្រះទឹកខាងត្បូង ឈៀងខាងកើត ក្នុងវត្តសទ្ធាភូមិសទ្ធា ឃុំរំចេក ស្រុកព្រះស្ដេច ខេត្តព្រៃវែង កាលពីវេលាម៉ោង២រសៀល ថ្ងៃទី១៧ ខែមេសា ឆ្នាំ២០១៨។
សមត្ថកិច្ចបានសន្និដ្ឋានថា ជាករណីរំលោភសម្លាប់ យកសពបោះចោលក្នុងស្រះទឹក ។ បច្ចុប្បន្នសមត្ថកិច្ច កំពុងកសាងសំណុំរឿង ដើម្បីបញ្ជូនទៅតុលាការ ចាត់ការតាមនីតិវិធី៕ ដោយ៖បញ្ញាស័ក្តិ
