កំពង់ធំ ៖ យុវជនម្នាក់មាន Account Facebook ឈ្មោះ Meng Hour ដែលបានបង្ហោះនៅលើហ្វេសប៊ុករបស់ខ្លួនថា ស៊ីឈ្នួលសម្លាប់មនុស្ស ត្រូវបានកម្លាំងអាវុធហត្ថខេត្ដកំពង់ធំ ស្រាវជ្រាវឃាត់ខ្លួនបានហើយ នៅថ្ងៃទី១៨ ខែមេសា ឆ្នាំ២០១៨នេះ រួចបញ្ជូនទៅកាន់មន្ទីរយុត្តិធម៌នៃអាវុធហត្ថខេត្ត ដើម្បីធ្វើការសួរនាំ។
លោកវរសេនីយ៍ទោ ប៊ុន ឃី ប្រធានមន្ទីរយុត្តិធម៌កងរាជអាវុធហត្ថខេត្តកំពង់ធំ បានបញ្ជាក់ថា “ករណីអាខោនហ្វេសប៊ុក ឈ្មោះ Meng Hour ស៊ីឈ្នួលសម្លាប់មនុស្ស ត្រូវបានកម្លាំងមន្ទីរយុត្តិធម៌យើងរកឃើញហើយ និង នាំខ្លួនមកកាន់មន្ទីរយុត្តិធម៌សាកសួរហើយ នៅថ្ងៃទី១៨មេសានេះ គឺ ឈ្មោះហ៊ីម សុខហ័រ ភេទប្រុស អាយុ១៨ឆ្នាំ មុខរបរមិនពិតប្រាកដ រស់នៅភូមិស្មោញ ឃុំផាន់ញើម ស្រុកប្រាសាទបល្ល័ង្គ ខេត្តកំពង់ធំ។ វាបានសារភាពថា វាបានសេវយករូបគេ កាន់កាំភ្លើងយកមកបង្ហោះ ហើយសរសេរថា (ស៊ីឈ្នួលសម្លាប់មនុស្ស) គ្រាន់តែចង់បង្អួតមិត្តភក្តិតែប៉ុណ្ណោះ តាមពិតពុំមានកាំភ្លើងអ្វីឡើយ”។
លោកវរសេនីយ៍ទោ ប៊ុន ឃី បានបន្ថែមថា ករណីនេះមន្ត្រីយុត្តិធម៌បានធ្វើការអប់រំ និង ឱ្យវិលត្រឡប់ទៅលំនៅដ្ឋានវិញថ្ងៃទី១៨ ខែមេសា ឆ្នាំ២០១៨៕ ដោយ ៖ បញ្ញាស័ក្តិ
