ភ្នំពេញ៖ វគ្គបណ្តុះបណ្តាលគ្រូបង្គោល ស្តីពីច្បាប់ បទបញ្ជា និងនីតិវិធីដសម្រាប់ការបោះឆ្នោតនិងក្រមសីលធម៌សម្រាប់ ភ្នាក់ងារសន្តិសុខបោះឆ្នោត នៅអគ្គស្នងការដ្ឋាននគរបាលជាតិនាថ្ងៃទី១៨ ខែមេសា ឆ្នាំ២០១៨ ដែលលោក នាយឧត្តមសេនីយ៍ គៀត ច័ន្ទថារិទ្ធ អគ្គស្នងការរងនគរបាលជាតិ បានអញ្ជើញជាអធិបតី ។
ក្នុងឱកាសនោះលោក នាយឧត្តមសេនីយ៍ អគ្គស្នងការរងនគរបាលជាតិ បានមានប្រសាសន៍ថា ការសិក្សានេះមានរយៈពេលតែ៣ថ្ងៃនោះទេ ប៉ុន្តែប្រធានបទមានដល់ទៅ៩ ហើយនៅក្នុងប្រធានបទ៩នោះ គឺសុទ្ធតែពាក់ព័ន្ធទៅនឹងសកម្មភាពសន្តិសុខនៃការបោះឆ្នោតទាំងអស់ ។ លោក នាយឧត្តមសេនីយ៍ អគ្គស្នងការរងថ្លែងអំណរគុណចំពោះស្ថាប័ន (គ.ជ.ប) ដែលបានគាំទ្រនិងផ្តល់ គ្រូឧទ្ទេសនាមបណ្តុះបណ្តាលសម្រាប់វគ្គសិក្សាការបោះឆ្នោត ។
នាយឧត្តមសេនីយ៍ អគ្គស្នងការរងនគរបាលជាតិ បានមានប្រសាសន៍បន្តថា សិក្ខាកាមដែលបានបញ្ចប់វគ្គនេះមានភារកិច្ច ត្រូវយកចំណេះជំនាញទៅបង្ហាត់បង្រៀនបន្ត ព្រោះថា យើងមានកម្លាំងដែលត្រូវចូលរួមការពារការបោះឆ្នោតរហូតដល់ទៅ ៨ម៉ឺននាក់ ក្នុងនោះមកពីកងយោធពលខេមរភូមិន្ទ និងកងរាជអាវុធហត្ថ និងមានកម្លាំងប្រជាការពារត្រៀមជួយនៅតាមឃុំសង្កាត់ និងក្រុង ស្រុក ខណ្ឌ ប្រមាណជាង២ម៉ឺននាក់ផងដែរ ។ លោកបានផ្តាំផ្ញើដល់សិក្ខាកាមទាំងអស់ ត្រូវយក ចិត្តទុកដាក់ត្រងត្រាប់ស្តាប់គ្រូឲ្យមែនទែន ដើម្បីក្តាប់ជាប់គ្រប់ខ្លឹមសារ និងយកទៅបើកវគ្គបណ្តុះបណ្តាលតាមអង្គភាព និងរាជធានី ខេត្ត ឲ្យបានទាន់ពេលវេលា ដោយហេតុថា យើងនៅសល់តែ១០១ថ្ងៃ ប៉ុណ្ណោះ ដល់ថ្ងៃបោះឆ្នោតហើយ សំណូមពររបស់យើងគឺ ត្រូវធ្វើឲ្យ មន្ត្រីដែលចូលរួមការពារបោះឆ្នោតទាំងអស់ មានការយល់ដឹងបាន គ្រប់ៗគ្នា ដើម្បីធ្វើឲ្យបរិយាកាសនៃការបោះឆ្នោតប្រព្រឹត្តទៅដោយ សេរី ត្រឹមត្រូវ យុត្តិធម៌ និងគ្មានការគំរាមកំហែង ។
សូមជម្រាបថា វគ្គបណ្តុះបណ្តាលគ្រូបង្គោល ស្តីពីច្បាប់ បទបញ្ជា និងនីតិវិធីសម្រាប់ការបោះឆ្នោតនិងក្រមសីលធម៌សម្រាប់ ភ្នាក់ងារសន្តិសុខបោះឆ្នោត មានរយៈពេល៣ថ្ងៃ ចាប់ពីថ្ងៃទី១៨-២០ ខែមេសា ឆ្នាំ២០១៨ ដោយមានសិក្ខាកាមមកពីស្នងការដ្ឋាននគរបាលរាជធានី ខេត្ត និងអង្គភាពពាក់ព័ន្ធជាច្រើនទៀត៕ ដោយ៖បញ្ញាស័ក្តិ
