ភ្នំពេញ ៖ ប្រជាពលរដ្ឋនៅទូទាំងខណ្ឌចំការមន បាន សម្តែងក្តី ព្រួយបារម្ភ ខណៈបទល្មើស លួច ឆក់ប្លន់ បានកើតឡើងពេញបន្ទុក ហើយសមត្ថកិច្ចបង្ក្រាបមិនបាន ។ អ្វីដែលធ្វើឲ្យប្រជាពលរដ្ឋកាន់តែមិនមានភាពកក់ក្តៅនោះគឺ សូម្បីតែអធិការរងនគរបាលខណ្ឌចំការមានទាំងឯកសណ្ឋាន សក្តិពេញស្មា មានទាំងកាំភ្លើង នៅក្នុងដៃផង ក៏ត្រូវ ចោរឆក់យក ទូរស័ព្ទ ទៅបាត់ដោយគ្មានញញើតដែរ ហើយថែមទាំងធាក់ផ្តួលម៉ូតូ លោកអធិការថែមទៀត។
អំពើឆក់នេះបានកើតឡើង កាលម៉ោងជិត៥ទៀបភ្លឺថ្ងៃអង្គារ ទី១៧ ខែមេសា ឆ្នាំ២០១៨ នៅចំណុចផ្លូវលេខ១៩៩ ស្ថិតនៅក្នុងសង្កាត់ទួលស្វាយព្រៃទី២ ខណ្ឌចំការមន។ ជនសង្ស័យ៤នាក់ម៉ូតូ២គ្រឿងធ្វើសកម្មភាពឆក់ទូរស័ព្ទឆក់ទូរស័ព្ទពីលោកអធិការរងជិះម៉ូតូដើរល្បាតក្នុងមូលដ្ឋានបានសម្រេចតែត្រូវនគរបាលប៉ុស្តិ៍ដេញតាមឃាត់បានតែម៉ូតូជនសង្ស័យចំនួន១គ្រឿង ចំណែកក្រុមជនសង្ស័យបានរត់គេចខ្លួនបាត់ស្រមោល។
លោកអធិការរង ដែលត្រូវចោរ ឆក់ទូរសព្វ័នោះ មានឈ្មោះ កុយ ខាន់ណារិទ្ធ ជាអធិការរងទទួលបន្ទុកសេនាធិការ នៅអធិការដ្ឋាននគរបាលខណ្ឌចំការមន។ ក្រោយកើតហេតុ ជនសង្ស័យបាន ផ្តួលចោល មួយគ្រឿង ម៉ាកហុងដាឌ្រីមសង់សេ១២៥ ពណ៌មាស ពាក់ស្លាកលេខភ្នំពេញ 1GJ-0828 ស៊េរីឆ្នាំ២០១៧ ចំណែកមនុស្សរត់គេចខ្លួនបាត់។
ប្រភពព័ត៌មានបានឲ្យដឹងថា នៅមុនពេលកើតហេតុលោកអធិការរងបានជិះម៉ូតូម៉ាកហុងដាឌ្រីមសង់ សេ១២៥ ពណ៌ខ្មៅស៊េរីឆ្នាំ២០១៣ ដើម្បីល្បាតក្នុងមូលដ្ឋាននិងមានដឹកលោកមេភូមិពីក្រោយគោលបំណងចប់ម៉ោងរកកន្លែងផឹកកាហ្វេជជែកគ្នាលេង ខណៈមកដល់ចំណុចកើតហេតុស្រាប់តែមានជនសង្ស័យ៤នាក់ជិះម៉ូតូម៉ាកហុងដាឌ្រីមសេ១២៥ចំនួន២គ្រឿង បានធ្វើសកម្មភាពឆក់ទូរស័ព្ទម៉ាកសាមស៊ុងពីហោប៉ាវអាវគាត់រួចបើក ម៉ូតូគេចខ្លួន ភ្លាមនោះលោកអធិការរងបានបើកម៉ូតូដេញតាម និងស្រែកតាមវិទ្យុទាក់ទងតែត្រូវបក្ខពួកជនសង្ស័យ២នាក់ជិះម៉ូតូមកពីខាងក្រោយហើយធាក់ម៉ូតូគាត់កុំឲ្យដេញតាមបក្ខពួកជនសង្ស័យហើយក្រោយមកម៉ូតូគាត់ក៏ដួលតែម្ដងទៅ។
រហូតឆ្លងស្ពានអាកាសព្រះមុនីវង្សថ្មីមកដល់ផ្លូវទាល់ក៏ជនសង្ស័យផ្ដួលម៉ូតូចោលរួចផ្លោះរបងរត់គេចខ្លួនបាត់ក្រោយមកក៏ធ្វើការដកហូតម៉ូតូរបស់ជនសង្ស័យមករក្សាទុកនៅផ្នែកព្រហ្មទណ្ឌអធិការដ្ឋានខណ្ឌចំការមនរកចាំស្រាវជ្រាវតាមរកជនសង្ស័យជាក្រោយ។
ប្រជាពលរដ្ឋបាននិយាយឲ្យដឹងថា បញ្ហា អសន្តិសុខ បានកំពុងកើតឡើងហើយនៅភូមិសាស្ត្រ ខណ្ឌចំការមន ដែលសូម្បីតែ មេប៉ូលីស ពាក់ឯកសណ្ឋានប៉ុណ្ណឹង ហើយនៅតែក្រុមចោរ ថ្លើមធំហ៊ានឆក់ទៀតបើប្រជាពលរដ្ឋ សាមញ្ញវិញ គិតមិចទៅ មិនរងា រាល់ថ្ងៃហើយ។
សូមរំលឹកថា អាណាចក្រខណ្ឌចំការមន ក្រោមការដឹកនាំពីសំណាក់ លោក យិន សាន្ត ជាអធិការបច្ចុប្បន្ន បានបណ្តែតបណ្តោយឲ្យមានល្បែងស៊ីសង ភ្នាល់បាលតាមអ៊ីនធើណិត រីកដូចផ្សិត ខណៈលោកអធិការ និងមន្ត្រីក្រោមឱវាទ សប្បាយ និងយកលុយ ដាក់ខែ។ ប្រភពដដែលបន្តថា ការដែលបើកឲ្យមានល្បែងស៊ីសង បែបនេះហើយ គឺជាប្រភពនៃបទល្មើស៕ ដោយ ៖ បញ្ញាស័ក្តិ
