តាកែវ ៖ ពាក្យបណ្តឹងមួយច្បាប់ត្រូវបានដាក់ជូនអាជ្ញាធរខេត្តតាកែវ បន្ទាប់ពីក្រុងដូនកែវ និងសង្កាត់ដោះស្រាយមិនចេញ ដោយសារតែការសំបើកពង្រីកទទឹងផ្លូវ (ទាល់) មួយខ្សែ ដែលពីមុនមានទំហំ ២ម៉ែត្រ អោយមកមានទំហំ ៤ម៉ែត្រ វិញដោយលោក ផង់ ពិន ជាចៅសង្កាត់រកាក្នុង បានធ្វើអោយក្រុមគ្រួសារចំនួន ៤នៅក្នុងភូមិចក នោះមានទំនាស់គ្នា អស់រយៈពេលជាច្រើនឆ្នាំ សឹងតែមានហិង្សាកើតឡើង បង្កើតជាទំនាស់ដ៏រ៉ាំរ៉ៃគ្មានដំណោះស្រាយ ។
ក្នុងនោះដែរ គ្រួសារជំទាស់ទាំង៣គ្រួសារនោះ បាននាំគ្នាឆ្ងល់ថា បើសិនជាមានពាក្យបណ្តឹង ដែលប្តឹងជំទាស់ទៅលើការសុំបើកពង្រីកផ្លូវមួយខ្សែនេះទៅហើយ ហេតុអ្វីក៏មានឯកសារចេញពីមន្ទីរជំនាញសុរិយោដីខេត្ត គូសបង្ហាញថាផ្លូវនោះមានទទឹង ៤ម៉ែត្រនោះ ដោយត្រង់ចំណុចនេះពួកគាត់បាននាំគ្នាសង្ស័យថា ពិតជាមានការឃុបឃិតជាលក្ខណៈប្រព័ន្ធដើម្បីផលប្រយោជន៍បុគ្គល ដោយមិនគិតពីផលប៉ះពាល់របស់អ្នករស់នៅជិតខាងនោះឡើយ ។
អ៊ំប្រុសឈ្មោះ ផន ផល អាយុ ៧០ឆ្នាំ តំណាងអោយគ្រួសារទាំងបី ក្នុងការប្តឹងជំទាស់លើការសុំពង្រីកផ្លូវនោះ លោកអុំបាននិយាយថា កាលពីដើមមកផ្លូវនេះគ្រាន់តែជាផ្លូវភ្លឺស្រែមួយតែប៉ុណ្ណោះ រហូតមកដល់ពេលបច្ចុប្បន្ននេះផ្លូវនេះជាក់ស្តែង គឺមានតែ ២ម៉ែត្រតែប៉ុណ្ណោះ សម្រាប់ពលរដ្ឋធ្វើដំណើរឆ្លងកាត់ ទៅដីគេដ្ឋានរបស់ពួកគាត់នៅខាងក្រោយ ហើយផ្លូវមួយខ្សែនេះផងដែរ គឺជាផ្លូវទាល់ទេ ។ ដោយកាលពីមុនពលរដ្ឋដែលរស់នៅជិតខាងគ្នា ក្នុងភូមិផងរបងជាមួយនោះ គឺមានទំនាក់ទំនងគ្នាល្អណាស់ ក៏ប៉ុន្តែ នៅពេលដែលចៅសង្កាត់ បានឡើងគម្រោងផ្លូវនេះដោយសុំបើកពង្រីកផ្លូវ ៤ម៉ែត្រ បានធ្វើអោយគ្រួសារទាំងនោះកើតជាទំនាស់យ៉ាងរ៉ាំរ៉ៃ សឹងតែកើតមានជាហឹង្សារ បង្ករការភ័យខ្លាច ដោយសារតែចង់បានផលប្រយោជន៏តែមួយមុខគត់ ។
លោកអ៊ំបាននិយាយទៀតថា រូបលោកអ៊ំចំណាស់នេះ មកហើយមិនចង់ឮ ឡើយហិង្សា និងមិនចង់ឮឡើយ ការគម្រាមកំហែង ដូច្នេះរូបលោកជាមួយនិងគ្រួសារចំនួន ២ទៀត សុំប្តឹងជំទាស់ដាច់ខាត លើការសម្រេចអោយបើកផ្លូវរបស់ចៅសង្កាត់រកាក្នុង ដែលការសម្រេចនេះគឺបានបម្រើផលប្រយោជណន៏ដល់ពលរដ្ឋតែមួយគ្រួសារ បង្ករផលប៉ះពាល់ធ្ងន់ធ្ងរដល់ពលរដ្ឋជាច្រើនគ្រួសារនោះគឺមិនអាចទៅរួចឡើយ។
ពាក់ព័ន្ធជាមួយនិងការចោទប្រកាន់ចៅសង្កាត់ថា បានចេញគំនូសវាសដោយមិនបានគិតពីផលប៉ះពាល់ជាធំ ហើយគិតតែពីផល ប្រយោជន៏បុគ្គលនោះ លោក ផង់ ពិន ចៅសង្កាត់រកាក្នុង បានឆ្លើយតបវិញថា ជាមួយនិងការសម្រេចអោយចេញ ផ្លូវគូសវាសពង្រីកផ្លូវពី ២ម៉ែត្រ អោយទៅជា ៤ម៉ែត្រនោះ គឺរូបលោក មិនមែនជាអ្នកចុះទៅគូសវាស់នោះទេ តែការគូសវាស់នេះ គឺធ្វើឡើងដោយលោកមេភូមិ និងក្រុមគណៈកម្មការសុរិយោដីជាអ្នកគូសវាស់តែប៉ុណ្ណោះ ដោយមិនបានសួរនាំពីផលប៉ះពាល់ ជាមួយនិងអ្នកជិតខាងនោះ ឡើយ ទើបបង្កើតជាទំនាស់យ៉ាងរ៉ាំរ៉ៃ លើការបើពង្រីកផ្លូវទល់នេះអោយមានទំហំ ៤ម៉ែត្រ តែធាតុពិតផ្លូវនេះមានតែទំហំជាក់ស្តែងដូចបច្ចុប្បន្ន គឺតែជាង២ម៉ែត្រតែប៉ុណ្ណោះ ។ ជុំវិញរឿងទំនាស់ខាងលើ អាជ្ញាធរសង្កាត់ និងអាជ្ញាធរក្រុងបានធ្វើការដោះស្រាយជាមួយនិងភាគីទំនាស់ជាច្រើនលើករួចមកហើយដែរ តែនៅមិនទាន់មានដំណោះស្រាយល្អឡើយ ។
លោក សំ សរ៉ន មេភូមិចក បាននិយាយថា ការគូសវាសផ្លូវនេះ គឺចាប់ផ្តើមតាំងពីឆ្នាំ ២០១៣មកម្លេះ គឺលោករួមជាមួយនិងគណៈកម្មការវាស់វែងដីមន្ទីរសូរិយោដី បានធ្វើការគូសវាស់វែងលើផ្លូវទំនាស់ខាងលើ ដោយសំបើកពង្រីកទទឹងផ្លូវចំនួន ៤ម៉ែត្រ តែក្នុងនោះ មានគ្រួសារចំនួន ៣បានធ្វើការប្តឹងជំទាស់លើការសុំពង្រីកនេះ ចំណែករឿងផ្លូវនេះចេញជាផែនទី ថា ៤ម៉ែត្រនោះយ៉ាងណា គឺពាក់ព័ន្ធនិងជំនាញរបស់លោកនោះទេ គឺជាជំនាញរបស់សូរិយោដីខេត្ត ។
សូមបញ្ជាក់ផងដែរថា ដោយសារតែទំនាស់លើការសំបើកពង្រីកផ្លូវទាល់មួយខ្សែរនេះ បានធ្វើពលរដ្ឋទាំងនោះនៅមិនទាន់មានប្លង់រឹងកាន់កាប់ជាកម្មសិទ្ធិពេញលេញនោះទេ ពីព្រោះដោយសារដែលជាប់និងព្រំនោះគឺឋិតនៅលើដីមានទំនាស់ ទើបមន្ទីរជំនាញមិនអនុញ្ញាតចេញជាប្លង់រឹងអោយ ។ ជុំវិញលើបញ្ហាខាងលើដែល នួន សុធា ប្រធានមន្ទីរសុរិយោដី និងស្ថាបត្យកម្ម បានធ្វើការឆ្លើយតបមកវិញថា ចំពោះគំនូសលើផែនទី ចេញថាប្លង់ផ្លូវទំនាស់នោះមាន ៤ម៉ែត្រ គឺលោកធ្វើតាមការគូសវាស់ទៅតាមការស្នើសុំពង្រីកអភិវឌ្ឍន៍ផ្លូវនោះ ដែលមានការទទួលស្គាល់ពីគណៈកម្មការរៀបចំវាស់វែងដីធ្លី ដោយមានទាំងអាជ្ញាធរ និងមន្ទីរជំនាញពាក់ព័ន្ធជាច្រើនទៀត ។
លោកបានបញ្ជាក់ថា ចំពោះប្លង់ដែលគូសវាសលើផែនទី ដែលបាញ់ចេញដោយមន្ទីរសូរិយោដីនោះ គឺបានគូសផ្លូវនោះ ៤ម៉ែត្រពិត ប្រាកដមែន តែនោះគឺជាប្លង់បណ្តោះអាសន្នទេ ក៏ប៉ុន្តែបើសិនជាមានការប្តឹងជំទាស់ ហើយការដោះស្រាយ និងសម្របសម្រួល និងសម្រេចយ៉ាងណាមួយពីសំណាក់អាជ្ញាធរខេត្តនោះ រូបលោកនិងធ្វើលិខិតស្នើសុំទៅអាជ្ញាធរខេត្តតាកែវ ដើម្បីសុំគោលការណ៍កែប្លង់ នៃផែនទីដែលបានគូសនោះ អោយស្របទៅតាមការសម្រេចរបស់អាជ្ញាធរខេត្ត ។
ទំនាស់ដីធ្លីដែលកើតមានឡើងរកដំណោះស្រាយមិនចេញនោះ កំពុងធ្វើការគ្រួសារទាំងបីនោះ ទទូចសុំអោយលោក អ៊ូច ភា អភិបាលខេត្តតាកែវថ្មី ជួយរកដំណោះស្រាយជូនពួកគាត់ បើមិនដូច្នោះទេ គ្រួសារទាំងបួននៅតែមានទំនាស់ និងអាចនិងកើតមានជាហិង្សាក៏មាន ៕ តាកែវ