ខេត្តមណ្ឌលគិរី ៖ ប្រជាពលរដ្ឋជនជាតិដើមភាគតិចព្នងប្រហែលជាង ២០០នាក់ កំពុងអាស្រ័យលើប្រភពទឹកពីអណ្ដូងបូរាណ ១កន្លែង ដោយអណ្ដូងមួយនេះ បានផ្ដល់ប្រភពទឹកគ្រប់រដូវកាល ប៉ុន្តែប្រជាពលរដ្ឋដែលពឹងផ្អែកលើប្រភពទឹកនេះ ក៏មានការលំបាក និងជួបប្រទះជាមួយបញ្ហាប្រឈមផងដែរ ព្រោះនៅពេលមានពលរដ្ឋច្រើនមកប្រើប្រាស់ទឹកអណ្ដូងនេះក្នុងពេលតែមួយ នឹងធ្វើឲ្យទឹកនោះរីងស្ងួត ហើយមិនបានផ្ដល់ទឹកឲ្យគ្រប់គ្រាន់តាមតម្រូវការ ដែលធ្វើឲ្យក្រុមប្រជាពលរដ្ឋជាជនជាតិភាគតិចព្នងខាងលើ សំណូមពរដល់សប្បុរសជន ក៏ដូចជាអាជ្ញាធរខេត្ត មេត្តាជួយសាងសង់អាងស្តុកទឹកធំមួយ ដើម្បីអាចរក្សាទឹកបានច្រើនជាងនេះ ដើម្បីងាយស្រួលឲ្យពួកគេប្រើប្រាស់បានគ្រប់គ្រាន់។
ស្ត្រីជនជាតិដើមភាគតិចព្នងម្នាក់ឈ្មោះ ក្រែន ហួញ រស់នៅភូមិពូលូង សង្កាត់រមនា ក្រុងសែនមនោរម្យ បានលើកឡើងថា អណ្ដូងទឹកនេះគឺមានអាយុកាលរាប់សិបឆ្នាំមកហើយ ដែលមានប្រភពទឹកមិនចេះរីងស្ងួតនោះទេ ព្រោះវាជាទឹកច្រប់ក្បាលអូរច្បារ ហើយកន្លងមកក៏ធ្លាប់មានសប្បុរសជនជួយជាថវិកាចាក់សាប និងរៀបមាត់អណ្ដូងឲ្យងាយស្រួលប្រើប្រាស់ដែរ ប៉ុន្តែទោះជាយ៉ាងណាអណ្ដូងនេះនៅតែមិនអាចផ្គត់ផ្គង់ទឹកគ្រប់គ្រាន់ ខណៈដែលពលរដ្ឋក្នុងភូមិប្រមូលផ្ដុំគ្នាមកប្រើប្រាស់ទឹកនេះច្រើនក្នុងពេលតែមួយ ដែលនេះជាការលំបាកមួយ ដោយហេតុថា ត្រូវរង់ចាំទឹកនេះជ្រាបចេញមកម្ដងបន្តិចៗរហូតមានទឹកច្រើន ទើបអាចដងយកមកប្រើប្រាស់បាន ។ ជនជាតិភាគតិចព្នងខាងលើបន្តថា នៅពេលយប់ដែលពុំមានអ្នកប្រើប្រាស់ អណ្ដូងទឹកនេះ នឹងមានទឹកជ្រាបចេញរហូតពេញមាត់អណ្ដូងហៀចេញមកខាងក្រៅចោល ហើយប្រសិនបើមានអាងស្តុកទឹកធំមួយ នឹងអាចរក្សាទឹកទាំងនោះបានច្រើន ដើម្បីឲ្យប្រជាពលរដ្ឋប្រើប្រាស់គ្រប់គ្រាន់មិនខាន ។
មេភូមិពូលូង លោក ឡុង ប៉ុក ដែលជាជនជាតិភាគតិចព្នងមួយរូបដែរ បានឲ្យដឹងថា ពលរដ្ឋដែលអាស្រ័យទឹកអណ្ដូងមួយនេះសព្វថ្ងៃ មានចំនួន ៦០គ្រួសារ ស្ទើរតែពាក់កណ្ដាលភូមិពូលូងទៅហើយ ព្រោះតែពួកគេព្យាយាមជីកអណ្ដូងនៅកន្លែងផ្សេងដែរ តែមិនចេញទឹកនោះទេ ។ លោកថា បច្ចុប្បន្នទឹកនេះមិនអាចផ្គត់ផ្គង់ឲ្យប្រជាពលរដ្ឋប្រើប្រាស់បានពេញលេញនោះទេ ពីព្រោះថា មានប្រជាពលរដ្ឋច្រើននាក់ណាស់ ដែលពឹងផ្អែកទឹកអណ្ដូងនេះ ។ លោកបញ្ជាក់ថា ប្រសិនបើមានអាងស្តុកទឹកធំមួយ នឹងអាចផ្ដល់ទឹកឲ្យប្រជាពលរដ្ឋបានប្រើប្រាស់បានសមល្មមជាងនេះ ព្រមទាំងអាចលើកស្ទួយជីវភាពប្រជាពលរដ្ឋក្នុងភូមិនេះបានមួយកម្រិតទៀត ព្រោះពួកគេនឹងមានទឹកស្រោចស្រប់បន្លែបង្ការ ដើម្បីជាថ្នូរនិងការលក់ដូរបានខ្លះ ។
សូមបញ្ជាក់ថា អណ្ដូងទឹកខាងលើ មានទីតាំងនៅភូមិពូលូង សង្កាត់រមនា ក្រុងសែនមនោរម្យ ដែលជាអណ្ដូងបូរាណរបស់បងប្អូនជនជាតិព្នងសេសសល់ពីដូនតា ហើយទីតាំងនេះ ក៏ជាទីកន្លែងសក្ការៈរបស់ជនជាតិព្នងគោរពបូជា សែនព្រេនតាមប្រពៃណីរៀងរាល់ឆ្នាំផងដែរ៕ ដោយ៖ សមុទ្រឈើ
