ភ្នំពេញ ៖ ក្នុងជំនួបជាមួយអគ្គស្នងការនគរបាលជាតិ ប្រធានសន្តិសុខសារធារណៈចិន បានស្នើឲ្យរាជរដ្ឋាភិបាលកម្ពុជា ចាត់វិធានការ ទៅតាមច្បាប់ ចំពោះជនជាតិ និងអ្នកវិនិយោគចិន ដែលបានប្រព្រឹត្តខុសច្បាប់ និងទំនៀមទម្លាប់របស់ខ្មែរ ។
លោកនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានអនុញ្ញាតឲ្យលោក LIAO JINGRONG (លាង ជីងរ៉ុង) អគ្គនាយក នៃអគ្គនាយកដ្ឋានកិច្ចសហប្រតិបត្តិការអន្តរជាតិ ក្រសួងសន្តិសុខសារធារណៈ នៃសាធារណៈរដ្ឋប្រជាមានិតចិន ជួប ពិភាក្សាការងារ នាព្រឹកថ្ងៃទី១៩ ខែមេសា ឆ្នាំ២០១៨នេះ នៅអគ្គស្នងការដ្ឋាននគរបាលជាតិ ។
បន្ទាប់ពីបញ្ចប់ជំនួបនេះ លោកនាយឧត្តមសេនីយ៍ គៀត ច័ន្ទថារិទ្ធ អគ្គស្នងការរងនគរបាលជាតិ ថ្លែងប្រាប់អ្នកយកព័ត៌មានឲ្យដឹងថា ចិននៅតែបន្តសហការជាមួយកម្ពុជាជានិច្ចផ្នែកសន្តិសុខ។ លោកគៀត ច័ន្ទថារិទ្ធ បានបញ្ជាក់ថា “ចិន បានថ្លែងអំណរអគុណដល់កម្ពុជា ដែលបានចាត់វិធានការណ៍ នូវជនជាតិចិន នាពេលកន្លងមក ដែលបានប្រព្រឹត្តខុសនៅកម្ពុជា ជាក់ស្តែងកាលពីឆ្នាំកន្លងទៅ មានជនជាតិចិន ប្រមាណជាងប្រាំរយនាក់ ត្រូវបានចាប់បញ្ជូនឲ្យទៅវិញ ហើយទង្វើនេះ គឺជាកិច្ចសហប្រតិបត្តិការដ៏ល្អរវាងកម្ពុជានិងចិន” ។
លោក LIAO JINGRONG ក៏បានស្នើសុំបន្ថែមដល់លោកនាយឧត្តមសេនីយ៍ សន្តិបណ្ឌិត នេត សាវឿន ឲ្យជួយការពារ និងបង្កើនសន្តិសុខ ដល់ជនជាតិចិន និងអ្នកវិនិយោគចិន ដែលកំពុងរស់នៅកម្ពុជាផងដែរ ដោយលោកអះអាងថា អ្នកវិនិយោគចិន ដែលកំពុងរស់នៅកម្ពុជានេះ ក៏ជាការជួយដល់កម្ពុជា ឲ្យមានការអភិវឌ្ឍ បានយ៉ាងឆាប់រហ័ស ដូចសព្វថ្ងៃនេះ ។
លោកនាយឧត្តមសេនីយ៍ គៀត ច័ន្ទថារិទ្ធ បានឲ្យដឹងថា នៅក្នុងដំណើរទស្សនកិច្ចរបស់ លោកLIAO JINGRONG គឺដើម្បីរៀបចំនូវដំណើរទស្សនកិច្ចរបស់ លោក ចាវ គឺជិ រដ្ឋមន្ត្រីក្រសួងសន្តិសុខសាធារណៈចិន ដែលគ្រោងនឹងមកទស្សនកិច្ច នៅកម្ពុជា នាខែក្រោយនេះ ដើម្បីពង្រឹងកិច្ចសហប្រតិបត្តិការជាមួយកម្ពុជា បន្ថែមទៀតទាក់ទងនឹងផ្នែកសន្តិសុខទាំងជាតិ និងអន្តរជាតិ ។
លោកនាយឧត្តមសេនីយ៍ សន្តិបណ្ឌិត នេត សាវឿន ក៏ថ្លែងអំណរអគុណដល់សាធារណរដ្ឋប្រជាមានិតចិន ដែលបានសហការ និងជួយកម្ពុជា នាពេលកន្លងមក ក៏ដូចជាបច្ចុប្បន្ននេះ ហើយលោកបានសន្យាថា នឹងបង្កើនយកចិត្តទុកដាក់ក្នុងការការពារនូវជន ជាតិចិន និងអ្នកវិនិយោគចិននៅកម្ពុជាបន្ថែមទៀត ដើម្បីផលប្រយោជន៍ប្រជាជន និងប្រទេសទាំងពីរ៕ ដោយ៖បញ្ញាស័ក្តិ