កណ្តាល ៖ វាពិតជាសាហាវ និងកាន់តែសាហាវពីមួយថ្ងៃទៅមួយថ្ងៃ ស្ទើរតែគ្រប់តំបន់ កើតឡើងនូវអំពើហឹង្សា បាញ់ប្រហារ កាប់ ចាក់ សម្លាប់គ្មានញញើតដៃដនោះឡើយ ជាក់ស្តែងសម្រាប់ថ្ងៃនេះនារីវ័យក្មេងម្នាក់ ត្រូវបានអតីតប្តី ជិះម៉ូតូមកកាប់ប្រហារស្ទើរតែដាច់កធ្លាក់ក្បាលពីលើស្មាខណៈកំពុងតែជិះម៉ូតូតាមផ្លូវក្នុងភូមិ បង្កឱ្យមានការភ្ញាក់ផ្អើល ។
តាមសេចក្តីរាយការណ៍បឋមឱ្យដឹងថា ក្រោយកាប់ប្រហារប្រពន្ធវ័យក្មេងនេះហើយ ប្តីនោះបានជិះម៉ូតូយ៉ាងលឿនឆ្ពោះទៅឡើងលើស្ពានអ្នកលឿងហើយលោតទឹកទន្លេ ធ្វើអត្តឃាតខ្លួនឯងតែម្តង។
សេចក្តីរាយការណ៍បានឱ្យដឹងថា ហេតុការណ៍នេះបានកើតឡើង នៅក្នុងស្រុកលើកដែក ក្នុងសាលាកំពង់ចំលង ផ្លូវ ទៅសាឡាងអ្នកលឿងចាស់ត្រើយខាងលិច ខេត្តកណ្តាល នាវេលាម៉ោង២និង៣០នាទីរសៀលថ្ងៃទី១៩ខែមេសា ឆ្នាំ២០១៨នេះ។
លោកអ៊ាវ ចំរើន ស្នងការនគរបាលខេត្តកណ្តាល បានថ្លែងក្នុងហ្វេសប៊ុកផ្លូវថា “មុននេះបន្តិចមានករណីឃាតកម្មមួយបានកើតឡើងនៅចំណុចអនុវិទ្យាល័យកំពង់ចម្លង ភូមិកំពង់ចម្លង ឃុំព្រែកទន្លាប់ ស្រុកលើកដែក ខេត្តកណ្តាល ។ ជនរងគ្រោះឈ្មោះ ទន់ ស្រីណយ ចំណែកជនសង្ស័យឈ្មោះ រ៉ា ឆៃរ៉ាត់ ក្រោយពេលធ្វើសកម្មភាពកាប់ជនរងគ្រោះរួចជនសង្សយ័បានជិះម៉ូតូឡើងស្ពានអ្នកលឿង លុះបើកម៉ូតូដល់កណ្តាលស្ពានក៏ចតម៉ូតូហើយលោតចុះចូលទន្លេ រហូតដល់ពេលនេះជនសង្សយ័មិនទាន់ឃើញឡើងគោកនៅ ឡើយ ដោយឡែកសមត្ថកិច្ចនគរបាលស្រុកកំពុងធ្វើការព័ទ្ធជុំវិញតំបន់នោះដើម្បីចាប់ជនល្មើសមកផ្តន្ទាទោសតាមផ្លូវច្បាប់”។
ជុំវិញមូលហេតុខាងលើនេះមិនត្រូវបានគេទម្លាយឲ្យដឹងនៅឡើយទេ តែត្រូវបានគេដាក់ការសង្ស័យថា ជារឿងប្រច័ណ្ឌ ប្រពន្ធដែលលេងលះគ្នាហើយនោះ៕ ដោយ ៖ បញ្ញាស័ក្តិ
