បន្ទាយមានជ័យ ៖ គ្រោះថ្នាក់រថយន្តបើកបុករះ ម៉ូតូ៣គ្រឿង ក្នុងពេលយប់ បណ្តាលឲ្យរបួសជាច្រើននាក់ក្នុងនោះមានម្នាក់ដាច់ជើងខាងឆ្វេង។ ចំណែកអ្នកបើកបររត់គេចខ្លួនបាត់ បន្សល់ទុករថយន្តនៅកន្លែងកើតហេតុ។
យោងរបាយការណ៍របស់មូលដ្ឋានកងរាជអាវុធហត្ថស្រុកម៉ាឡៃ បានឲ្យដឹងថា នៅថ្ងៃទី១៨ ខែមេសា ឆ្នាំ២០១៨ វេលាម៉ោង ១៩និង១៥នាទី មានករណីគ្រោះថ្នាក់ចរាចរនៅតាមបណ្តោយផ្លូវជាតិលេខ៥៩ ចន្លោះបង្គោលគីឡូម៉ែត្រលេខ ១៥-១៦ ស្ថិតនៅភូមិអូរអំពិល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ រវាងរថយន្តម៉ាក កាម៉ារី សេរីឆ្នាំ១៩៩៥ ពណ៌ស ស្លាកលេខ ភ្នំពេញ ២A-៧៩០១ បើកបរពី លិច ទៅ កើត ( អ្នកបើកបររត់គេចខ្លួនបាត់ ) បានបុកម៉ូតូរះចំនួន ៣គ្រឿង ដែលបើកបរពីកើតទៅលិចនៅផ្នែកខាងឆ្វេងនៃរថយន្ត ម៉ូតូនិងជនរងគ្រោះមានឈ្មោះដូចខាងក្រោម៖ ម៉ូតូម៉ាក ឃ្លិក ពណ៌ស ខ្មៅ សេរីឆ្នាំ២០១០ ស្លាកលេខ បាត់ដំបង ១U-៥៤០៥ បើកបរពីកើតទៅលិច បើកបរដោយ ឈ្មោះ សេង វុទ្ធី ភេទប្រុស អាយុ២៧ឆ្នាំ រស់នៅភូមិសាស្តា ឃុំសាស្តា ស្រុកសំពៅលូន ខេត្តបាត់ដំបង ( រងរបួសធ្ងន់ ) និងអ្នករួមដំណើរ ២នាក់ទៀត ឈ្មោះ សារ៉ាយ ភេទប្រុស អាយុ៣០ឆ្នាំ រស់នៅភូមិក្តោរ ឃុំអូរស្រឡៅ ស្រុកម៉ាឡៃ ខេត្តបន្ទាយមានជ័យ ( រងរបួសធ្ងន់ ) និងឈ្មោះ សាវាម ភេទប្រុស អាយុ៣៩ឆ្នាំ ជាជនជាតិថៃ រងរបួសធ្ងន់ ( ដាច់ជើង ) ។ ម៉ូតូម៉ាក ហុងដាឌ្រីម សេរីឆ្នាំ ២០១០ ពណ៌ទឹកប៑ិច( ខៀវចាស់ ) ស្លាកលេខ បន្ទាយមានជ័យ ១C-៨៥៤២ បើកបរដោយជនមិនស្គាល់ឈ្មោះ បើកបរពីកើតទៅលិច និងអ្នករួមដំណើរម្នាក់ឈ្មោះ ជឿន ភេទស្រី អាយុ២៥ឆ្នាំ រស់នៅភូមិកោះស្នួល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ( ទាំងពីរនាក់រងរបួសធ្ងន់ ) និងម៉ូតូ ១គ្រឿងទៀត ម៉ាក ហុងដាឌ្រីម ពណ៌ខ្មៅ សេរីឆ្នាំ២០១១ ស្លាកលេខ បន្ទាយមានជ័យ ១G-១៨៩៥ បើកបរពីកើតទៅលិច បើកបរដោយឈ្មោះ ស៑ុត ភេទប្រុស អាយុ២៨ឆ្នាំ និងអ្នករួមដំណើរ១នាក់ ឈ្មោះ ខឹត នូន ភេទស្រី អាយុ៤៥ឆ្នាំ ទាំងពីរនាក់រស់នៅ ភូមិបន្ទាយទីមួយ ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ( រងរបួសស្រាល ) ។ អ្នករងរបួសទាំងអស់ ត្រូវបានបញ្ជូនទៅព្យាបាលនៅមន្ទីរពេទ្យបង្អែកក្បែរកន្លែងកើតហេតុ ។
ចំណែករថយន្ត និងម៉ូតូ ត្រូវបានយកទៅរក្សាទុកបណ្តោះអាសន្ននៅអធិការនគរបាលស្រុកម៉ាឡៃ ដើម្បីរងចាំការដោះស្រាយ ៕ ដោយ ៖ បញ្ញាស័ក្តិ