ភ្នំពេញ ៖ ក្មេងស្រី ទើបមានវ័យ១ខួប ៦ខែម្នាក់បានបាត់បង់ជីវិត ដោយរថយន្ដកាមេរីឆ្លាម១គ្រឿង បើកថយក្រោយ មកកិនធ្លាយខួរ ខណៈរោងការបិទផ្លូវទៅមុខមិនរួច បើកថយក្រោយមិនប្រយ័ត្នក៏ កិនក្មេងស្រីធ្លាយខួរស្លាប់តែម្តង។
ហេតុការណ៍គ្រោះថ្នាក់ចរាចរណ៍ដ៍គួរឲ្យអាសូរ ខាងលើនេះ បានកើតឡើងនៅម៉ោង១១និង៣០នាទីថ្ងៃទី១៩ ខែមេសា ឆ្នាំ២០១៨ ស្ថិតនៅតាមបណ្តោយផ្លូវបេតុង ត្រង់ចំណុចមុខផ្ទះគ្មានលេខ ក្នុងភូមិខ១ សង្កាត់ច្រាំងចំរេះទី២ ខណ្ឌឫស្សីកែវ រាជធានីភ្នំពេញ។
ក្មេងស្រីរងគ្រោះត្រូវបានគេស្គាល់ថាមានឈ្មោះពុទ្ធ លក្ខណា អាយុ១ខួប៦ខែ មានឳពុកឈ្មោះ ពុទ្ធ ប៊ុនថន អាយុ២៨ឆ្នាំ មុខរបរបើកឡាន នឹងម្តាយឈ្មោះ គង់ ស៊ីចាន់ អាយុ២៦ឆ្នាំ មានមុខរបរនៅផ្ទះ ស្នាក់នៅក្បែរទីតាំងកើតហេតុ។ ឯរថយន្តបង្កម៉ាកកាមរីឆ្លាម ពណ៍ស្ករ ពាក់ផ្លាកលេខភ្នំពេញ 2Q-4513 អ្នកបើកបរមានឈ្មោះសាន់នី ភេទប្រុស អាយុ៣៣ឆ្នាំ មានមុខរបរលក់ដូរ មានទីលំនៅភូមិកណ្តាលទួល ឃុំកំពង់ត្រាចលិច ស្រុកកំពង់ត្រាច ខេត្តកំពត បច្ចុប្បន្នស្នាក់នៅក្បែរភូមិ-សង្កាត់កើតហេតុ។
បើតាមស្ត្រីជាម្ដាយរបស់ក្មេងស្រីរងគ្រោះបានឲ្យដឹងថា នៅមុនពេលកើតហេតុ រូបគាត់ «ម្ដាយ» កំពុងធ្វើម្ហូប និងបានប្រើឲ្យកូនប្រុសអាយុ៥ឆ្នាំម្នាក់ទៀត ដើម្បីទៅទិញម្រេច ដោយមិនបានដឹងថាកូនស្រីអាយុ១ខួប៦ខែនោះ «ក្មេងស្រីរងគ្រោះ» រត់ទៅតាមពីក្រោយជាមួយបងប្រុសឡើយ ស្រាប់តែមួយសន្ទុះឮសូរសម្លេងស្រែក ទើបគាត់ចេញពីក្នុងផ្ទះទៅមើលបែរជាឃើញកូនស្រីអាយុ១ខួប៦ខែ ត្រូវរថយន្ដបើកកិនបែកក្បាលធ្លាយខួរស្លាប់បាត់បង់ជីវិតយ៉ាងអាណោចអាធម៌ទៅហើយ តែអ្នកបើកបរ ជាមួយនិងរថយន្ដត្រូវបានអ្នកជិតខាងឃាត់ខ្លួនប្រគល់ឲ្យសមត្ថកិច្ចមូលដ្ឋាន រងចាំបញ្ជូនទៅកាន់ការិយាល័យចរារណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីដោះស្រាយគ្នាទៅតាមច្បាប់នៅពេលក្រោយ។
ប្រភពពីកន្កែងកើតហេតុ បានឲ្យដឹងថា មុនក្មេងស្រីស្លាប់បាត់បង់ជីវិត គេបានឃើញរថយន្តខាងលើបើកតាមផ្លូវបេតុង ក្នុងទិសដៅពីលិចទៅកើត ខណៈមកដល់ចំណុចកើតហេតុ ដែលមានរោងកានៅបាំងបើកទៅមុខមិនរួច ក៏បានបើករីយែរថយន្តថយក្រោយ ដោយខ្វះការប្រុងប្រយ័ត្នបណ្ដាលឲ្យកិនកុមារីរងគ្រោះតែម្ដង។ ចំណែកឯសពក្មេងស្រីរងគ្រោះ ត្រូវបានសមត្ថកិច្ចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕ ដោយ៖បញ្ញាស័ក្តិ