តាម Business Insider, មេដឹកនាំអាមេរិក បានចំណាយពេល ២ថ្ងៃ ដើម្បីពិភាក្សាអំពីបញ្ហាកូរ៉េខាងជើងជាមួយនាយករដ្ឋមន្ត្រីជប៉ុន Shinzo Abe ។ នៅក្នុងសន្និសីទកាសែត ថ្ងៃទី ១៨ ខែមេសា (ម៉ោងតំបន់) ប្រធានាធិបតីអាមេរិកដូណាល់ ត្រាំ ស្រាប់តែបន្លឺពាក្យពេចន៍ស្ងើចសរសើរយ៉ាងខ្លាំងចំពោះប្រធានរដ្ឋចិនស៊ីជិនពៀន ។
ប្រធានរដ្ឋស៊ី ជិនពៀន និងប្រធានាធិបតីអាមេរិកដូណាល់ ត្រាំ
ប្រធានាធិបតីអាមេរិកដូណាល់ ត្រាំពោលថា ៖ ខ្ញុំចង់សម្តែងការអរគុណជាចំហចំពោះប្រធានរដ្ឋចិន ស៊ី ជិនពៀន ដែលជាអ្នកបានជួយយើងខ្ញុំ ច្រើនជាងអ្នកណាៗទាំងអស់ របស់រដ្ឋការចិន ឬច្រើនជាងមេដឹកនាំរបស់ចិនដែលធ្លាប់បានជួយដល់ប្រធានាធិបតីណា ឬរដ្ឋការណាមួយ។
គ្រាដែលត្រូវបានសួរសំណួរជុំវិញបញ្ហាកូរ៉េខាងជើង លោកត្រាំនិយាយថា ៖ គាត់រឹតបន្តឹងព្រំដែនដូចអ្នកបានឃើញ ហើយគាត់បានធ្វើៗយ៉ាងខ្លាំងក្លាបំផុត។ ប៉ុន្តែបន្ទាប់មកលោកត្រាំចោទសំណួរចំពោះខ្លួនឯងថា ៖ តើគាត់អាចធ្វើបានល្អប្រសើរជាងនេះដែរទេ? រួចលោកឆ្លើយនឹងសំណួរដែលចោទឡើងខ្លួនឯងថា ៖ ខ្ញុំគិតថា គាត់អាចធ្វើបានល្អជាងនេះទៅទៀត ។ ឯកឧត្តមប្រធានលោកគឺជាមនុស្សមហិមាម្នាក់! ។
សម្តីស្ងើចសរសើររបស់លោកត្រាំ បានបង្កនូវភាពភ្ញាក់ផ្អើលក្នុងបរិបទរបស់អាមេរិក-ចិន កំពុងផ្ទុះឡើងនូវសង្គ្រាមពាណិជ្ជកម្មប៉ុន្មានសប្តាហ៍មកនេះ ។ ពិសេស ១០ថ្ងៃមុន លោកនៅបានហៅសកម្មភាពពាណិជ្ជកម្មជាមួយចិនថា “ភ្លីភ្លើ” ។
ទង្វើនេះហាក់ដូចជាផ្នែកមួយនៃយុទ្ធសាស្ត្រចំពោះចិនរបស់លោកត្រាំ ។ ថ្វីត្បិតបានធ្វើការរិះគន់ក្រុងប៉េកាំងជុំវិញរឿងពាណិជ្ជកម្មក្តី តែលោកត្រាំបែរជាស្ងើចសរសើរចំពោះប្រធានរដ្ឋចិនទៅវិញ ។
សប្តាហ៍មុនប្រធានាធិបតីអាមេរិក បាននិយាយថា រវាងលោក និងលោកស៊ីជិនពៀនគឺជាមិត្តភក្តិទោះបីមានអ្វីកើតឡើងក្នុងជម្លោះរវាងប្រទេសទាំងពីរក្នុងបញ្ហាពាណិជ្ជកម្មក្តី ៕
