កំពង់ឆ្នាំង ៖ មានករណីគ្រោះថ្នាក់ចរាចររវាងរថយន្តដឹកជ្រូក១គ្រឿង រេចង្កូតបុករះម៉ូតូ និងរថយន្តជាច្រើនគ្រឿងបណ្តាលឲ្យស្លាប់១នាក់ និងរបួស២នាក់ នៅថ្ងៃព្រហស្បតិ៍ ទី១៩ ខែមេសា ឆ្នាំ២០១៨ នៅចំណុចចន្លោះគីឡូម៉ែត្រលេខ១២៣-១២៤ លើកំណាត់ផ្លូវជាតិលេខ៥ ក្នុងភូមិពន្លៃ ឃុំពន្លៃ ស្រុកបរិបូណ៍។
លោក ឈឹម សារុន នាយការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តកំពង់ឆ្នាំង បានឲ្យដឹងថា ដោយម្ចាស់រថយន្តប្រភេទ FUSO ដែលបើកបរយ៉ាងលឿន ធ្វើឲ្យបុករះរថយន្ត Highlander ចំនួន ១គ្រឿងនិងម៉ូតូចំនួន៥គ្រឿង បណ្តាលឲ្យក្មេងប្រុសស្លាប់ម្នាក់ និងបុរស ២នាក់ រងរបួសធ្ងន់ស្រាល។
រថយន្តបង្កប្រភេទ FUSO ពាក់ស្លាកលេខ តាកែវ 3A-0844 ដឹកជ្រូក និងរថយន្តដែលរងគ្រោះប្រភេទ Highlander ពាក់ស្លាកលេខភ្នំពេញ 2AC-4228 ។ ចំណែកម៉ូតូរងការខូចខាតទី១៖ Honda Dream ២០១៥ ពាក់ស្លាកលេខកំពង់ឆ្នាំង 1D-3649 ទី២៖ Honda Dream ២០១១ ពាក់ស្លាកលេខពោធិ៍សាត់1C-8120 ទី៣៖ សេរី ២០១៤ ទី៤៖ អត់ស្លាកលេខ និងទី៥៖ សេរី២០១៦ អត់ស្លាកលេខ។ អ្នកបើកបររថយន្តFUSO ឈ្មោះ ប៊ុន លីម ភេទប្រុស អាយុ៣១ឆ្នាំ រស់នៅភូមិតាណៃ ឃុំអូរតាប៉ោង ស្រុកបាកាន ខេត្តពោធិ៍សាត់ ត្រូវបានសមត្ថកិច្ច ចាប់ឃាត់ខ្លួនក្រោយកើតហេតុភ្លាមៗ។
អ្នករងរបួស ត្រូវបានសាច់ញាតិ បញ្ជូនទៅសង្គ្រោះនៅមន្ទីពេទ្យបង្អែកខេត្តកំពង់ឆ្នាំង ដោយឡែកសាកសពក្មេងរងគ្រោះ ត្រូវបានសមត្ថកិច្ច ប្រគល់ឲ្យក្រុមគ្រួសារ។
កម្លាំងជំនាញនៃអធិការដ្ឋាននគរបាលស្រុកបរិបូណ៌ បានចុះធ្វើការវាស់វែង និងឃាត់ខ្លួនអ្នកបើកបររថយន្ត ១ នាក់ ព្រមទាំងចាប់យកវត្ថុតាងមករក្សាទុកនៅអធិការដ្ឋាននគរបាលស្រុកបរិបូណ៌ ដើម្បីកសាងសំណុំរឿងតាមនីតិវិធី ៕ ដោយ ៖ បញ្ញាស័ក្តិ