កំពង់ចាម ៖ ស្ត្រីម្នាក់ពាក់ព័ន្ធករណីឃាតកម្មជះទឹកអាស៊ីត ទៅប្តីរបស់ខ្លួន បណ្តាលឲ្យស្លាប់ ត្រូវបាននគរបាលខេត្តកំពង់ចាម ចាប់ខ្លួន នៅថ្ងៃទី១៩ ខែមេសា ឆ្នាំ២០១៨ ម៉ោង១៦និង១៥នាទី លើកំណាត់ផ្លូវជាតិលេខ៧ ស្ថិតនៅភូមិត្រពាំងធំ ឃុំស្រង៉ែ ស្រុកព្រៃឈរ ខេត្តកំពង់ចាម។
ឧត្តមសេនីយ៍ត្រី ហេង វុទ្ធី ស្នងការរងផែនព្រហ្មទណ្ឌ បានឱ្យដឹងថា ក្នុងប្រតិបត្តិការស្រាវជ្រាវ តាមចាប់ខ្លួនជនសង្ស័យ កម្លាំងជំនាញព្រហ្មទណ្ឌស្រុកព្រៃឈរ សហការជាមួយលោកវរសេនីយ៍ទោ ឆាន់ គឹមលី ជំនាញនាយកដ្ឋានព្រហ្មទណ្ឌ បានឃាត់ខ្លួនជនសង្ស័យឈ្មោះ ពិន ជា ភេទស្រី អាយុ៤៤ឆ្នាំ នៅភូមិអូរជ្រក ឃុំក្រូច ស្រុកព្រៃឈរ ខេត្តកំពង់ចាម។
បច្ចុប្បន្នជនសង្ស័យត្រូវបានឃុំខ្លួនបណ្តោះអាសន្ននៅស្នងការដ្ឋាននគរបាលខេត្តកំពង់ចាមដើម្បីចងក្រងសំណុំរឿងបញ្ជូនទៅតុលាការចាត់ការតាមនីតិវិធីច្បាប់។
សូមបញ្ជាក់ថា ករណីជះទឹកអាស៊ីតនេះ កើតឡើងកាលពីថ្ងៃ១៧ ខែមេសា ឆ្នាំ២០១៨ នៅចំណុចភូមិអូជ្រូក ឃុំក្រូច ស្រុកព្រៃឈរ ខេត្តកំពង់ចាម ទៅលើបុរសជាប្ដីឈ្មោះ មិន នុន អាយុ៤១ឆ្នាំ កំពុងដេកនៅលើផ្ទះ បណ្តាលស្លាប់ក្រោយបញ្ជូនទៅសង្គ្រោះនៅមន្ទីរពេទ្យភ្នំពេញ មូលហេតុដោយសារខឹងប្តីមានស្រី៕ ដោយ ៖ បញ្ញាស័ក្តិ