ភ្នំពេញ ៖ អនុវត្តតាមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា រដ្ឋបាលរាជធានីភ្នំពេញ បានបញ្ចេញរថយន្តក្រុងដឹកជញ្ជូន អ្នកដំណើរចំនួន៦០គ្រឿង ដើម្បីដឹកជញ្ជូនប្រជាពលរដ្ឋដែលត្រូវចាកចេញពីរាជធានីភ្នំពេញឆ្ពោះទៅ តាមបណ្តាខេត្ត ក្រុងនានា និងពីខេត្តនានាចូលមកមករាជធានីភ្នំពេញវិញ ដោយមិនគិតថ្លៃក្នុងឱកាសបុណ្យចូលឆ្នាំថ្មី ប្រពៃណីជាតិនេះ ហើយបើគិតក្នុង១សប្តាហ៍នៃការដឹកជញ្ជូនប្រជាពលរដ្ឋនាឱកាសបុណ្យចូលឆ្នាំថ្មីនេះមានប្រជាពលរដ្ឋប្រមាណជិត១ម៉ឺន៥ពាន់នាក់ ទាំងចេញពីក្រុងនិងចូលក្រុងបានទទួលសេវានេះ។
អភិបាលរដ្ឋករស្វយ័តដឹកជញ្ជូនសាធារណៈរថយន្តក្រុង រាជធានីភ្នំពេញ លោក អ៊ាន សុឃីម បានឲ្យដឹងថា រដ្ឋករស្វយ័តដឹកជញ្ជូនសាធារណៈរថយន្តក្រុងរាជធានីភ្នំពេញ បានធ្វើការពង្រាយរថយន្តក្រុងដឹកជញ្ជូនសាធារណៈចំនួន៦០គ្រឿង ដើម្បីដឹកជញ្ជូនប្រជា ពលរដ្ឋ ក្នុងឱកាសបុណ្យចូលឆ្នាំខ្មែរចំនួន៧ថ្ងៃ។ ដោយគិតចាប់ពីថ្ងៃទី១២ ដល់ថ្ងៃទី១៨ មេសា ប្រជាពលរដ្ឋមានការសប្បាយរីករាយក្នុងការជិះរថយន្តមានចំនួន១៤.០៧៨នាក់ ក្នុងនោះប្រជាពលរដ្ឋ ជិះពីភ្នំពេញទៅខេត្តមានចំនួន៨.៨៣៣នាក់ និងពីខេត្តមកភ្នំពេញ មានចំនួន៥.២៤៥នាក់ផងដែរ។
លោកបន្តថា នេះបានបង្ហាញពីការគិតគូរ យកចិត្តទុកដាក់របស់សម្តេចអគ្គមហាសេនាតេជោ ហ៊ុន សែន ក្នុងការផ្តល់ជូនកញ្ចប់កាដូឆ្នាំថ្មីជូនប្រជាពលរដ្ឋយើង ដើម្បីកាត់បន្ថយការចំណាយក្នុងការធ្វើដំណើរ របស់ប្រជាពលរដ្ឋ៕ ដោយ៖បញ្ញាស័ក្តិ