ភ្នំពេញ ៖ ក្រសួងទេសចរណ៍កម្ពុជា និងតួកគី នឹងខិតខំឲ្យមានការចុះហត្ថលេខា លើអនុស្សរណនៃការយោគយល់គ្នា អំពីកិច្ច សហប្រតិបត្តិការលើវិស័យទេសចរណ៍ នៅខែតុលា ឆ្នាំ២០១៨ ខាងមុខនេះ ដែលក្នុងនោះក៏នឹងមានជុំរុញការវិនិយោគ ការបណ្តុះបណ្តាល និងការហោះហើរត្រង់ពីតួកគីមកកាន់កម្ពុផងដែរ។
ជំនួបពិភាក្សាជាមួយលោក ថោង ខុន រដ្ឋមន្ត្រីក្រសួងទេសចរណ៍ លោកស្រី អេយដា អុងលូ ឯកអគ្គរដ្ឋទូតតួកគីប្រចាំកម្ពុជាធ្វើឡើងនៅទីស្ដីការក្រសួងទេសចរណ៍ នារសៀលថ្ងៃទី១៩ ខែមេសា ឆ្នាំ២០១៨។
លោកស្រី អេយដា អុងលូ បានបញ្ជាក់ថា ក្នុងអាណត្តិការងារនៅកម្ពុជា លោកស្រីនឹងជំរុញឲ្យមានជើងហោះហើរត្រង់មកកម្ពុជាឲ្យទាល់តែបាន ដើម្បីផ្លាស់ប្ដូរចរន្តភ្ញៀវទេសចរពីគ្នាទៅវិញទៅមក។
លោក រដ្ឋមន្ត្រី ថោង ខុន ក៏បានស្នើឲ្យភាគីតួកគីដែលជាប្រទេសជោគជ័យ ក្នុងការអភិវឌ្ឍវិស័យទេសចរណ៍ ពិនិត្យលទ្ធភាពក្នុងការបណ្ដាក់ទុនវិនិយោគនៅកម្ពុជា រួមមាន ការវិនិយោគលើការបង្កើតសាលាបណ្ដុះបណ្ដាលវិជ្ជាជីវៈទេសចរណ៍។
លោក រដ្ឋមន្ត្រីបានបញ្ជាក់ពីតំបន់ទេសចរណ៍ជាច្រើននៅកម្ពុជា ដូចជា ប្រាសាទអង្គរវត្ត ប្រាសាទព្រះវិហារ ប្រាសាទសំបូរព្រៃគុក និងប្រាសាទជាច្រើនកន្លែងផ្សេងទៀត តំបន់ឆ្នេរសមុទ្រដ៏ស្រស់ស្អាត តំបន់អេកូទេសចរណ៍ព្រៃកោងកាង អារ៉ែង និងភូមិភាគឦសានជាដើម។ លោកក៏បានអញ្ជើញលោកស្រីឯកអគ្គរដ្ឋទូត ទៅទស្សនាតំបន់ឆ្នេរសមុទ្រ តំបន់អេកូទេសចរណ៍នៅកម្ពុជា៕ ដោយ៖បញ្ញាស័ក្តិ