ភ្នំពេញ ៖ ក្នុងជំនួបពិភាក្សានៅទីស្ដីការក្រសួងទេសចរណ៍ លោកស្រីឯកអគ្គរដ្ឋទូតឥណ្ឌា បានបញ្ជាក់ពីការខិតខំបង្កើនកិច្ច សហប្រតិបត្តិការជាមួយកម្ពុជា ពិសេសលើវិស័យទេសចរណ៍។ ឥណ្ឌានឹងរៀបចំព្រឹត្តិការណ៍សំខាន់ៗដូចរៀងរាល់ឆ្នាំ ដូចជា ព្រឹត្តិការណ៍លំហាត់ប្រាណតាមបែប យោគៈ ក្នុងខែមិថុនា ឆ្នាំ២០១៨ ការសម្ដែងសិល្បវប្បធម៌រួមគ្នាដ៏ធំមួយ នាថ្ងៃទី១០ ខែឧសភា ឆ្នាំ២០១៨ នៅរាជធានីភ្នំពេញ និងកិច្ចប្រជុំក្រុមការងារទេសចរណ៍រវាងកម្ពុជា និងឥណ្ឌាលើកទី២។
លោក ថោង ខុន រដ្ឋមន្ត្រីក្រសួងទេសចរណ៍ ក្នុងជំនួបពិភាក្សាជាមួយឯកអគ្គរដ្ឋទូតឥណ្ឌាលោកស្រី ម៉ានីកា ចេននាថ្ងៃទី១៩ ខែមេសានេះ នាទីស្តីការក្រសួង ។ លោកស្រី បានបញ្ជាក់ថា ឥណ្ឌានឹងមានរៀបចំសិក្ខាសាលាថ្មីមួយ ដែលប្រមូលផ្ដុំទៅដោយវិនិយោគិនឥណ្ឌា ទីភ្នាក់ងារទេសចរណ៍ និងការីទេសចរណ៍ល្បីៗរបស់ឥណ្ឌា ដើម្បីធ្វើបទបង្ហាញផ្លាស់ប្ដូរបទពិសោធន៍ពីគ្នាទៅវិញទៅមក សំដៅជំរុញកំណើនទេសចរពីគ្នាទៅវិញទៅមក។
លោក រដ្ឋមន្ត្រី ថោង ខុន បានលើកឡើងថា ទីផ្សារទេសចរណ៍ឥណ្ឌាជាទីផ្សារធំ ដែលកម្ពុជាត្រូវតែយកចិត្តទុកដាក់ ក្នុងការទាក់ ទាញឲ្យមកទស្សនាឲ្យបានច្រើនថែមទៀត ព្រោះបើគិតលើវិស័យទេសចរណ៍សាសនា កម្ពុជាក៏មិនខុសពីឥណ្ឌាប៉ុន្មានដែរ ដូច្នេះកម្ពុជាមិនអាចមើលរំលងទីផ្សារទេសចរណ៍ដ៏ធំនេះបានទេ ហើយលោក បានគាំទ្រ ចំពោះគំនិតផ្ដួចផ្ដើមរៀបចំព្រឹត្តិការណ៍ទេសចរណ៍នានា របស់ភាគីឥណ្ឌានៅកម្ពុជា។
លោក រដ្ឋមន្ត្រីបានស្វាគមន៍ចំពោះការហោះហើរត្រង់ពីឥណ្ឌាមកកម្ពុជា និងស្នើឲ្យលោកស្រីឯកអគ្គរដ្ឋទូតជួយជំរុញការងារឲ្យបានរហ័ស ខណៈភ្ញៀវទេសចរឥណ្ឌាដែលមកទស្សនាកម្ពុជាកំពុងមានការកើនឡើង
លោកស្រីឯកអគ្គរដ្ឋទូតបានសន្យាជំរុញ និងបានស្វាគមន៍ឲ្យក្រុមហ៊ុនអាកាសចរណ៍កម្ពុជា ហោះហើរទៅកាន់ឥណ្ឌា៕ ដោយ ៖បញ្ញាស័ក្តិ