ខេត្តកោះកុង៖ សាធារណៈជនទូទៅ ជាពិសេសស្ត្រីមេផ្ទះជាថ្មីម្តងទៀត បានទទូចដល់ប្រធានអង្គភាពប្រឆាំងអំពើពុករលួយ
និងថ្នាក់ដឹកនាំក្រសួង ស្ថាប័នពាក់ព័ន្ធ ឲ្យជួយបញ្ជូនមន្ត្រីស្អាតស្អំចុះស៊ើបអង្កេតសកម្មភាព របស់មន្ត្រីជំនាញពាក់ព័ន្ធ ប្រចាំការនៅច្រកទ្វារអន្តរជាតិចាំយាមខេត្តកោះកុង ដើម្បីឲ្យប្រាកដថា តើមន្ត្រីស្ថាប័នណាខ្លះមានជាប់ពាក់ព័ន្ធការទទួលសំណូកពុករលួយ ជាថ្នូរអនុញ្ញាតឲ្យឈ្មួញនាំចូលទំនិញគេចពន្ធ និងទំនិញខូចគុណភាពចេញពីប្រទេសថៃ ចូលមកកម្ពុជា តាមច្រកព្រំដែននេះ។
ប្រជាពលរដ្ឋ និងស្ត្រីមេផ្ទះភាគច្រើនរស់នៅខេត្តកោះកុង បានផ្តល់សម្ភាសដល់អ្នកយកព័ត៌មានគេហទំព័រ cen.com.kh ប្រចាំខេត្តកោះកុង នៅថ្ងៃសុក្រ ទី២០ ខែមេសា ឆ្នាំ២០១៨ថា ពួកគេនៅតែព្រួយបារម្ភជុំវិញបទល្មើសនាំចូលទំនិញគេចពន្ធ និងទំនិញខូចគុណភាព ត្រូវឈ្មួញនាំចូលពីប្រទេសថៃ តាមច្រកព្រំដែនចាំយាម តាមផ្លូវសមុទ្រ និងច្រករបៀងផ្សេងៗទៀត ដោយគ្មានសមត្ថកិច្ចទប់ស្កាត់ឲ្យមានប្រសិទ្ធភាព។
ពួកគេសង្ស័យថា ទំនិញគេចពន្ធ ឬសាច់ស្រស់ខូចគុណភាព ដែលឈ្មួញអាចនាំចូល តាមច្រកចាំយាម និងច្រកផ្សេងៗនាខេត្តកោះកុង ទំនងជាឈ្មួញទាំងនោះ បានត្រូវដងត្រូវផ្លែគ្នា ជាមួយសមត្ថកិច្ចជំនាញស្ថាប័នពាក់ព័ន្ធប្រចាំការ នៅតាមច្រកនីមួយៗ ពិសេសមន្ត្រីជំនាញ ប្រចាំការនៅច្រកទ្វារចាំយាមតែម្តង ជាថ្នូរចែកផលប្រយោជន៍ ឲ្យគ្នាទៅវិញទៅមក ទើបសមត្ថកិច្ចមិនមានសកម្មភាពចុះបង្ក្រាប។
ប្រជាពលរដ្ឋខេត្តកោះកុង បានចោទថា រាល់ថ្ងៃនេះ ទំនិញដឹកតាមរទេះ ពិសេសដឹកតាមរថយន្តធំៗ ដែលបានឆ្លងកាត់ច្រកចាំយាម គឺទំនិញភាគច្រើន មិនត្រូវបានមន្ត្រីសាខាគយ និងរដ្ឋាករខេត្តកោះកុង និងមន្ត្រីកាំកុងត្រូលខេត្តកោះកុង ព្រមទាំងមន្ត្រីស្ថាប័នពាក់ព័ន្ធដទៃទៀត ចុះត្រួតពិនិត្យ ឲ្យបានដិតដល់ទេ ដោយឈរចាំយកលុយពីឈ្មួញ ឬពាណិជ្ជករទាំងនោះបង់ជូនជាការស្រេច។
ត្រង់ចំណុចនេះ ប្រជាពលរដ្ឋ បានស្នើដល់ លោក គុណ ញ៉ឹម អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា និងលោក ម៉ក ពេជ្ជរិទ្ធ អគ្គនាយកដ្ឋានកាំកុងត្រូល នៃក្រសួងពាណិជ្ជកម្ម ជាពិសេស លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ជួយបញ្ជូនមន្ត្រីចុះស៊ើបអង្កេត ទៅលើសកម្មភាព របស់សមត្ថកិច្ចប្រចាំការ នៅតាមច្រកព្រំដែនចាំយាម ខេត្តកោះកុង ដើម្បីឲ្យប្រាកដថា តើមន្ត្រីស្ថាប័នណាខ្លះ អាចមានជាប់ពាក់ព័ន្ធ ការអនុញ្ញាតនាំចូលទំនិញគេចពន្ធ និងទំនិញខូចគុណភាព ជាថ្នូរទទួលបានសំណូកពុករលួយពីឈ្មួញល្មើសទាំងនោះ?។
អាជីវករ និងពលរដ្ឋខេត្តកោះកុង បានអះអាងថា កន្លងមកទំនិញ ដែលឈ្មួញបានដឹកតាមរថយន្តធំៗ ចូលតាមច្រកព្រំដែនចាំយាម មិនសូវឃើញមានមន្ត្រីជំនាញស្ថាប័នពាក់ព័ន្ធ ដែលឈរប្រចាំការនៅច្រកទ្វារអន្តរជាតិកម្ពុជាថៃ ចុះត្រួតពិនិត្យទំនិញទាំងនោះឲ្យបានត្រឹមត្រូវទេ ដោយឃើញមន្ត្រីស្ថាប័នខ្លះ បានឈរចាំទទួលយកត្រឹមសំណូកលុយកាក់ ដែលឈ្មួញ ឬពាណិជ្ជករទាំងនោះបង់ជូនមន្ត្រីស្ថាប័ននីមួយៗឈរប្រចាំការ នៅច្រកទ្វារចាំយាម ប៉ុន្តែមិនបានត្រួតពិនិត្យទំនិញ ដែលដឹកតាមរទេះ ពិសេសរថយន្តធំៗទាំងនោះទេ។
បញ្ហានេះដែរ ប្រជាពលរដ្ឋរស់នៅខេត្តកោះកុង មានរបរលក់ដូរ នៅក្បែរច្រកទ្វារអន្តរជាតិកម្ពុជាថៃ ច្រកចាំយាម បានបញ្ជាក់ថា ទំនិញគេចពន្ធ និងខូចគុណភាពគជាច្រើនប្រភេទ ដែលឈ្មួញនាំចូលតាមច្រកទ្វារព្រំដែននេះ គឺមិនមែនជារឿងថ្មីទេ ពោលគឺបានកើតមានជាយូរមកហើយៗ ប៉ុន្តែមន្ត្រីស្ថាប័នជំនាញ ប្រចាំការនៅច្រកទ្វារចាំយាមមួយចំនួនរួមមាន៖ មន្ត្រីសាខាគយ និងរដ្ឋាករខេត្តកោះកុង មន្ត្រីសាខាកាំកុងត្រូលខេត្តកោះកុង និងប្រធានច្រកទ្វារអន្តរជាតិចាំយាមជាដើម បានត្រូវដងត្រូវផ្លែគ្នាជាមួយឈ្មួញទាំងនោះ ដោយបានអនុញ្ញាត ឲ្យនាំចូលទំនិញគេចពន្ធ និងអាហារ សាច់ស្រស់ខូចគុណភាពជាដើម ចូលតាមច្រកចាំយាម និងច្រកផ្សេងៗទៀតដោយរលូន និងគ្មានការហាមឃាត់ទេ។
យ៉ាងនេះក្តី អ្នកយកព័ត៌មានគេហទំព័រ cen.com.kh ប្រចាំខេត្តកោះកុង មិនទាន់អាចទាក់ទង ប្រធានសាខាគយ និងរដ្ឋាករខេត្តកោះកុង និងប្រធានសាខាកាំកុងត្រូលខេត្តកោះកុង ជាពិសេសប្រធានច្រកទ្វារអន្តរជាតិកម្ពុជាថៃច្រកចាំយាមខេត្តកោះកុង ដើម្បីបំភ្លឺជុំវិញការចោទប្រកាន់ របស់ប្រជាពលរដ្ឋ ជុំវិញបទល្មើសនាំចូលទំនិញគេចពន្ធ និងទំនិញខូចគុណភាព នាំចូលពីប្រទេសថៃ ចូលមកម្ពុជាតាមច្រកទ្វារចាំយាម បានទេ នៅថ្ងៃសុក្រ ទី២០ ខែមេសា ឆ្នាំ២០១៨។
ចំណែកក្រុមអ្នកឃ្លាំមើលផែនការអភិវឌ្ឍសង្គម ប្រចាំខេត្តកោះកុង ក៏បានឲ្យដឹងដែរថា កន្លងមកពួកគេធ្លាប់ទទួលពាក្យបណ្តឹងផ្ទាល់មាត់ពីប្រជាពលរដ្ឋ ជុំវិញសកម្មភាពឈ្មួញនាំចូលទំនិញគេចពន្ធ និងសាច់ស្រស់ខូចគុណភាព ត្រូវឈ្មួញនាំចូលពីប្រទេសថៃចូល មកកម្ពុជា តាមច្រកចាំយាម និងតាមផ្លូវសមុទ្រជាដើម។ ទំនិញគេចពន្ធទាំងនោះមានដូចជា៖ ម៉ូតូសេរីទំនើបៗ សម្ភារៈសំណង់ សាច់ស្រស់ ឬអាហារសមុទ្រស្រស់ៗ គ្រឿងសម្អាង ភេសជ្ជៈ អាហារកំប៉ុងគ្រប់ប្រភេទ ដែលខូចគុណភាព ឬហួសកាលបរិច្ឆេទប្រើប្រាស់ ជាពិសេសគ្រឿងអេឡិចត្រូនិច្ចជាដើម។
អ្នកឃ្លាំមើលសង្គម បានទទួលស្គាល់ថា ការនាំចូលទំនិញទាំងគេចពន្ធ និងខូចគុណភាពភាគច្រើន តាមច្រកព្រំដែនកម្ពុជាថៃ មានច្រកចាំយាមជាដើម គឺមានលក្ខណៈជាចំហ ដោយមន្ត្រីស្ថាប័នជំនាញមួយចំនួន ដែលឈរជើងប្រចាំការនៅតាមច្រកព្រំដែននីមួយៗ ពិសេសច្រកចាំយាម បានបើកដៃឲ្យឈ្មួញនាំចូលទំនិញ តាមរថយន្តជាដើម ដោយមិនបានត្រួតពិនិត្យឲ្យត្រឹមត្រូវទេ គឺឈររង់ចាំយកលុយ ដែលឈ្មួញបង់ជូនគឺចង់រឿងតែម្តង។
ផ្តើមពីបញ្ហានេះ ស្ត្រីមេផ្ទះរស់នៅខេត្តកោះកុង បានស្នើដល់ប្រធានអង្គភាពប្រឆាំងអំពើពុករលួយ និងថ្នាក់ដឹកនាំក្រសួងពាក់ព័ន្ធថ្នាក់ជាតិ ជួយបញ្ជូនមន្ត្រីស្អាតស្អំចុះស៊ើបអង្កេតសកម្មភាព របស់មន្ត្រីស្ថាប័នជំនាញប្រចាំការ នៅតាមច្រកព្រំដែននាំចូលទំនិញពីប្រទេសថៃ ចូលមកកម្ពុជា ពិសេសនៅច្រកទ្វារចាំយាមខេត្តកោះកុង ដើម្បីទប់ស្កាត់អំពើពុករលួយ ដែលអាចនាំឲ្យខាតបង់ប្រាក់ចំណូលថវិកាជាតិនាថ្ងៃអនាគត។
ទោះជាបែបនេះក្តី កាលពីខែតុលា ឆ្នាំ២០១៧ កម្លាំងនគរបាលប្រឆាំងបទល្មើសសេដ្ឋកិច្ច ដឹកនាំដោយ លោក មីន រស្មី ស្នងការរងនគរបាលខេត្តកោះកុង បានចុះត្រួតពិនិត្យ និងបង្ក្រាប បទល្មើសនាំចូលសាច់មាន់ និងប្រហិតស្រស់ ពីប្រទេសថៃចូលមកខេត្តកោះកុង ដោយត្រៀមចែកចាយ និងនាំចេញទៅកាន់បណ្តាខេត្តមួយចំនួនទៀត ទាំងប្រទេសកម្ពុជា ប៉ុន្តែត្រូវបានសមត្ថកិច្ចនគរបាលខេត្តនេះ ចុះស្ទាក់ទប់ស្កាត់បានទាន់ពេលវេលា។ នាឱកាសនោះ កម្លាំងនគរបាលខេត្តកោះកុង បានដកហូតទំនិញខុសច្បាប់ចំនួន ១ពាន់ ៦រយ ៨៧គីឡូក្រាម។ ក្នុងនោះសាច់មាន់ខូចគុណភាពមាន ១ពាន់ ១រយ ១៤គីឡូក្រាម និងប្រហិតខូចគុណភាពមាន ៥រយ ៦៤គីឡូក្រាម ។ ក្រោយការបង្ក្រាប ទំនិញទាំងនេះ កម្លាំងនគរបាល នៃស្នងការដ្ឋាននគរបាលខេត្តកោះកុង បានប្រគល់ជូនមន្ត្រីសាខាកាំកុងត្រូលខេត្តកោះកុង ដើម្បីបន្តនីតិវិធី និងនាំយកទៅដុតបំផ្លាញចោល៕ ដែន សីមា
